అస్సాంలో ఒంగోలు టీచర్​ హత్య - తరగతి గదిలో కత్తితో పొడిచిన విద్యార్థి - Student Stabs Teacher to Death

Student Stabs Teacher to Death in Assam : విద్యాబుద్ధులు నేర్పిన టీచర్​ను తరగతి గదిలోనే హతమార్చిన సంఘటన అస్సాం రాష్ట్రంలో జరిగింది. ఈ సంఘటన ప్రకాశం జిల్లాకు చెందిన రాజేశ్​బాబు ప్రాణాలు కోల్పోయారు

Student Stabs Teacher to Death in Assam : అజ్ఞానమనే అంధకారాన్ని పారద్రోలి, విజ్ఞానమనే వెలుగును నింపేవారే టీచర్​. అలాంటి టీచర్​కు పురాణాలు సైతం పెద్దపీట వేశాయి. పిల్లలు తప్పు చేస్తే ఓ అమ్మలాగా, నాన్నలాగా దండించే హక్కు టీచర్​కు ఉంది. విద్యార్థులను క్రమశిక్షణతో నడిపిస్తూ భావిభారత పౌరులుగా తయారు చేస్తారు. వారి భవిష్యత్తు బాగుపడాలని నిరంతరం శ్రమిస్తారు. పరీక్షల్లో మార్కులు తక్కువగా వస్తే మందలిస్తారు. అలా చేసినందుకు ఓ టీచర్​ను​ అతి కిరాతకంగా కత్తితో పొడిచి చంపిన సంఘటన అస్సాంలో చోటు చేసుకుంది

AP Teacher Murder in Assam :విద్యాబుద్ధులు నేర్పిన గురువును తరగతి గదిలోనే విద్యార్థి కడతేర్చిన సంఘటన అస్సాం రాష్ట్రంలో జరిగింది. ఈ ఘటనలో ప్రకాశం జిల్లాకు చెందిన రాజేశ్‌బాబు ప్రాణాలు కోల్పోయారు. ఒంగోలు నగరం అన్నవరప్పాడుకు చెందిన బెజవాడ రాజేశ్‌బాబు రసాయన శాస్త్రం (Chemistry) అధ్యాపకుడు. విశాఖలోని ఓ ప్రైవేటు కళాశాలలో దాదాపు పదేళ్ల పాటు రసాయన శాస్త్ర అధ్యాపకుడిగా పని చేశారు. అనంతరం స్నేహితులతో కలిసి అస్సాంలోని శివసాగర్‌ ప్రాంతంలో సొంతంగా కళాశాల నెలకొల్పారు. పదమూడేళ్లుగా రాజేశ్​బాబు ప్రిన్సిపల్‌గా వ్యవహరిస్తున్నారు. ఆయన భార్య అపర్ణ ఆ కళాశాలల్లోనే డైరెక్టర్‌గా ఉన్నారు. కళాశాలలో ఇంటర్‌ ఫస్ట్​ ఇయర్​ చదువుతున్న ఓ విద్యార్థికి గణితంలో మార్కులు తక్కువగా రావడంతో పాటు అతడి ప్రవర్తన సైతం సరిగా లేకపోవడంతో గణిత అధ్యాపకుడు శనివారం మందలించారు. అతడు ఇంటికెళ్లి పెద్దలను తీసుకురావాలని ఆదేశించారు.

గణితం టీచర్​ విద్యార్థిని మందలించే సమయంలో ప్రిన్సిపల్‌ రాజేశ్‌బాబు అక్కడే ఉన్నారు. దీన్ని అవమానంగా భావించిన ఆ విద్యార్థి ఆయనపై కక్ష పెంచుకున్నాడు. శనివారం సాయంత్రం తన వెంట ఓ కత్తి తెచ్చుకుని తరగతి గదిలో కూర్చున్నాడు. రాజేశ్‌బాబు రసాయన శాస్త్ర పాఠాలు చెబుతుండగా, ఒక్కసారిగా కత్తితో దాడి చేశాడు. ఆ విద్యార్థి రాజేశ్​బాబు తల, ఛాతీపై పొడవడంతో తీవ్ర గాయాలయ్యాయి. కళాశాల పనిచేసే సిబ్బంది రాజేశ్​బాబును వైద్యశాలకు తీసుకెళ్లేలోపే ప్రాణాలు కోల్పోయారు. ఆయనకు ఓ కుమారుడు, కుమార్తె ఉన్నారు. ఆయన భౌతిక కాయాన్ని సోమవారం( జులై 8న) ఒంగోలుకు తీసుకువచ్చి అంత్యక్రియలు పూర్తి చేశారు. దాడికి పాల్పడ్డ విద్యార్థి తండ్రి చనిపోగా తల్లి మాత్రమే ఉందని రాజేశ్​బాబ్ సోదరుడు నవీన్​ తెలిపారు. తండ్రికి నేరచరిత్ర ఉన్నట్లు తర్వాత తెలిసిందని పేర్కొన్నారు.