'వైఎస్సార్సీపీ పాలనలో పర్యాటక, అతిథ్య రంగాలు నిర్లక్ష్యానికి గురయ్యాయి' - Hotels Association Meeting

Hotels Association Meeting in Guntur: జగన్‌ హయాంలో రాష్ట్రానికి రాజధాని లేకుండా చేసి ఆతిథ్య రంగాన్ని నాశనం చేశారని ఎమ్మెల్యే శ్రీనివాసరావు విమర్శించారు. గుంటూరులో జరిగిన ఏపీ హోటల్స్‌ అసోసియేషన్ సమావేశానికి ఎమ్మెల్యే గల్లా మాధవితో కలిసి ఆయన హాజరయ్యారు. హోటళ్ల యాజమానులు ఆహార నాణ్యత విషయంలో రాజీపడ వద్దని ఎమ్మెల్యే శ్రీనివాసరావు సూచించారు.

Hotels Association Meeting in Guntur:వైఎస్సార్సీపీ పాలనలో పర్యాటకం, ఆతిథ్య రంగాలు పూర్తిగా నిర్లక్ష్యానికి గురయ్యాయని ఎమ్మెల్యే యరపతినేని శ్రీనివాసరావు ఆరోపించారు. గుంటూరులో జరిగిన ఏపీ హోటల్స్‌ అసోసియేషన్ రాష్ట్ర కార్యవర్గ సమావేశానికి ఎమ్మెల్యే గల్లా మాధవితో కలిసి ఆయన హాజరయ్యయారు. రాష్ట్రంలోని వివిధ జిల్లాల నుంచి వచ్చిన హోటళ్ల యాజమానులు తమ సమస్యల్ని ఎమ్మెల్యే దృష్టికి తీసుకువచ్చారు. జగన్‌ హయాంలో రాష్ట్రానికి రాజధాని లేకుండా చేసి ఆతిథ్య రంగాన్ని నాశనం చేశారని శ్రీనివాసరావు విమర్శించారు. కూటమి ప్రభుత్వం ఆతిథ్య రంగాన్ని నిలబెట్టేందుకు చర్యలు తీసుకుంటుందన్నారు.

పరిపాలన చేతకాని వ్యక్తి చేతిలోకి రాష్ట్రం వెళ్లిపోయినప్పుడు అన్ని రంగాలపైనా ప్రభావం చూపుతుందని ఎమ్మెల్యే శ్రీనివాసరావు అన్నారు. ఏ రాష్ట్రానికైనా రాజధాని ఉండాలన్నారు. ఏ ప్రభుత్వం రాజధాన్ని అంశాన్ని మొదలుపెట్టినా పూర్తి చేయాల్సిన బాధ్యత తర్వాత అధికారంలోకి వచ్చినవారు తీసుకోవాలని ఆయన అన్నారు. అన్ని వర్గాల ప్రజలు బాగున్నప్పుడు అన్ని వ్యాపారులు సవ్యంగా సాగుతాయన్నారు. హోటళ్ల యాజమానులు ఆహార నాణ్యత విషయంలో రాజీపడ వద్దని ఎమ్మెల్యే శ్రీనివాసరావు సూచించారు. ఐదేళ్లలో పర్యాటకం, ఆతిథ్య రంగాలు తీవ్ర ఇబ్బందులకు గురయ్యాయని వారి సమస్యల పరిష్కారానికి తాము కృషి చేస్తానని హామీ ఇచ్చారు.

ఆతిథ్య రంగాలు బాగుంటే ఉపాధి అవకాశాలు మెరుగవుతాయని తప్పకుండా యాజమాన్యలకు సహాయ సహకారాలు అందిస్తామని గల్లా మాధవి తెలిపారు. గడిచిన ఐదు సంవత్సరాలలో హోటళ్ల రంగం ఎన్నో ఇబ్బందులు పడిందని ఎమ్మెల్యే మాధవి అన్నారు. గత ప్రభుత్వానికి చిత్తశుద్ధి ఉంటే టూరిజంను అభివృద్ధి చేయవచ్చని కానీ దానిని పట్టించుకోలేదని ఆమె ఆరోపించారు. తన నియోజకవర్గ పరిధిలో ఏ రంగానికైనా తాను పూర్తి సహకారం అందిస్తానని ఎమ్మెల్యే మాధవి అన్నారు.

కొద్ది రోజులలో సీఎం చంద్రబాబుని కలిసి హోటళ్ల రంగంలో ఉన్న పరిస్థితులపై రిప్రజెంటేషన్​​ రూపంలో తెలియజేయడం జరుగుతుందని హోటల్స్‌ అసోసియేషన్ రాష్ట్ర అధ్యక్షుడు ఆర్​వీ స్వామి అన్నారు. అర్ధరాత్రి వరకు హోటళ్లు తెరిచేందుకు అవకాశం ఇవ్వాలని ఆర్​వీ స్వామి ప్రభుత్వానికి విజ్ఞప్తి చేశారు. ఈ హోటళ్ల అసోసియేషన్ సమావేశానికి వచ్చినందుకు ఆయన ఇద్దరు ఎమ్మెల్యేలకు ప్రత్యేక ధన్యవాదాలు తెలిపారు.