Sand Mining on Perni Nani Godown : రేషన్ బియ్యం మాయం కేసులో పీకల్లోతు కూరుకుపోయిన వైఎస్సార్సీపీ నేత పేర్నినానికి మరిన్ని చిక్కులు తప్పేలా లేవు. రేషన్ బియ్యం నిల్వ కోసం లీజుకిచ్చిన గోదాము స్థలం మెరకకోసం అక్రమంగా బుసక తరలించినట్లు గనులశాఖకు ఫిర్యాదు అందింది. ఎంత తరలించుకెళ్లారో లెక్కలు వేసి జరిమానాతోపాటు క్రిమినల్‌ కేసులు పెట్టేందుకు గనులశాఖ అధికారులు సిద్ధం అవుతున్నారు. మరోవైపు బియ్యం మాయం కేసులో పేర్ని నాని భార్య గడువులోగా పౌరసరఫరాల శాఖకు జరిమానా చెల్లించలేదు.
వైఎస్సార్సీపీ అధికారంలో ఉండగా అడిగేవారు లేరన్నట్లు అడ్డగోలుగా చెలరేగిన మాజీ మంత్రి పేర్నినాని ఇప్పుడు మూల్యం చెల్లించుకుంటున్నారు. ప్రధానంగా నాడు అధికారిన్ని అడ్డుపెట్టుకుని నిర్మించిన గోదాములే ఆయన్ను చిక్కుల్లోకి నెడుతున్నాయి. మచిలీపట్నం పరిధిలోని పొట్లపాలెంలో పేర్ని కుటుంబం దాదాపు ఏడున్నర ఎకరాల వ్యవసాయ భూములు కొనుగోలు చేసి 6 ఎకరాల విస్తీర్ణంలో 2 గోదాములు నిర్మించింది. ఐతే నిర్మాణ పనుల్లో భాగంగా స్థలాన్ని మెరక చేసేందుకు సమీపంలోని బుసకను తరలించారు. కానీ దానికి ఎలాంటి రాయల్టీ చెల్లించలేదని కృష్ణా జిల్లా గనుల శాఖతోపాటు, విజిలెన్సు అధికారులకు ఫిర్యాదు అందింది. ఈ మేరకు అసిస్టెంట్‌ జియాలజిస్టు గోదాముల వద్దకు తన బృందంతో కలిసివెళ్లారు. గేట్లకు తాళం వేసి ఉంది. బుసక తరలింపువిషయంలో గోదాముల యాజమాజ్యానికి నోటీసులు ఇచ్చి విచారణ చేయాలని అధికారులు భావిస్తున్నారు.
బియ్యం దందా పేర్ని పన్నాగమే - రిమాండ్ రిపోర్ట్లో కీలక విషయాలు
గోదాముల నిర్మాణ స్థలం చదును కోసం ఎంత మేర బుసక తరలించారనేది గనులశాఖ అధికారులు లెక్కగట్టే పనిలో ఉన్నారు. గనుల శాఖలో ఖనిజాల కింద బుసక లేదు. దీన్ని ఇసుకగానే పరిగణిస్తారు. ఏడెకరాలు చదును చేసి మెరక చేసేందుకు దాదాపు 94వేల క్యూబిక్‌ మీటర్ల బుసక వినియోగించారని అంచనా వేస్తున్నారు. వైఎస్సార్సీపీ హయాంలో టన్ను ఇసుకపై రాయల్టీ దాదాపు 60 రూపాయలుగా ఉంది. ఏ ఖనిజమైనా అక్రమంగా తవ్వితే దానికి పది రెట్ల జరిమానా వేస్తారు. ఒక ట్రాక్టర్‌ ఇసుక అక్రమంగా తవ్వితే 2వేల రూపాయల జరిమానా విధిస్తారు.
దాదాపు 31వేల ట్రాక్టర్ల బుసక తోలుకుని ఉంటారని భావిస్తున్నారు. అంటే ట్రాక్టరుకు 2వేల రూపాయల చొప్పున రూ.6కోట్ల వరకూ జరిమానా కట్టాల్సి ఉంది. ఒకవేళ అది ఇసుక కాదని, తాము మట్టినే తవ్వుకెళ్లామని పేర్ని కుటుంబం వితండ వాదం చేసినా మట్టిపైనా జరిమానా విధించే అవకాశం ఉంది. మట్టి రవాణాపై 100 రూపాయల వరకూ రాయల్టీ చెల్లించాల్సి ఉండగా దానికి పది రెట్లు జరిమానా వేస్తారు. అంటే వెయ్యి రూపాయల చొప్పున 94వేల క్యూబిక్‌ మీటర్లకు 9లక్షల 40 వేలు చెల్లించాల్సి ఉంటుంది.
'తెలియదు, గుర్తులేదు' - ఆ వ్యవహారాలన్నీ మా మేనేజరే చూసుకున్నారు!
మెత్తం అసైన్డ్ భూముల నుంచే బుసకను అక్రమంగా తవ్వకుని తరలించినట్లు గనులశాఖ అధికారులు భావిస్తున్నారు. గోదాముల చదును కోసం ఎంత బుసక నింపారనేది ఇంకో రెండ్రోజుల్లో లెక్కతేలుస్తామని కృష్ణాజిల్లా గనుల శాఖ ఇంఛార్జ్‌ శ్రీనివాసకుమార్‌ తెలిపారు. ఈ విషయంపై గనుల శాఖ కేసు నమోదు చేసి క్రిమినల్‌ చర్యలకు సిఫార్సు చేసే అవకాశం ఉంది. గోదాముల యాజమాన్యాన్ని విచారణకు పిలుస్తారనే చర్చ జరుగుతోంది. బుసక అక్రమ తరలింపులో సహకరించిన అప్పటి MPDO, గనులశాఖ అధికారిపైనా చర్యలు తీసుకోనున్నారు. మరోవైపు గోదాములో రేషన్ బియ్యం మాయానికి సంబంధించి రూ.3 కోట్ల 37లక్షల జరిమానాకుగాను పేర్ని జయసుధ పౌరసరఫరాల శాఖకు రూ.కోటి 70లక్షలే చెల్లించారు. మిగిలిన రూ.కోటి 67 లక్షలు కట్టేందుకు జేసీ గీతాంజలి శర్మ ఇచ్చిన గడువు ముగిసినా జయసుధ ఇంకా చెల్లించలేదు.
