విజయనగరం జిల్లా మహారాజా ఆసుపత్రికి సుస్తీ - Maharaja Sarvajana Hospital

Lack of Facilities in Maharaja Sarvajana Hospital : విజయనగరం జిల్లా సర్వజన ఆసుపత్రిలో సౌకర్యాల కొరతతో రోగులు తీవ్ర ఇబ్బందులు పడుతున్నారు. గత ప్రభుత్వం హయాంలో స్థానిక వైద్యశాలను బోధనాసుపత్రిగా మార్చింది. రోగులకు తగ్గట్టు సౌకర్యాలు పెంచడంలో జగన్​ సర్కారు విఫలం అయ్యింది. తాగునీరు, మరుగుదొడ్ల నిర్వహణ సరిగా లేదంటు రోగులు ఆవేదన వ్యక్తం చేస్తున్నారు.

Lack of Facilities in Maharaja Sarvajana Hospital : ఆసుస్పత్రి అంటే ప్రజలకు రోగాల నుంచి ఉపశమనం కల్పించాలి. కానీ విజయనగరం సర్వజన ఆసుపత్రికి వెళ్లేవారికి మాత్రం కొత్త కష్టాలు వస్తున్నాయి. వైఎస్సార్సీపీ ప్రభుత్వం బోధనాసుపత్రిగా మార్చింది కానీ సేవలు మెరుగుపర్చ లేదు. రోగులు కూర్చోవడానికి కుర్చీలూ లేని పరిస్థితి. ఆసుపత్రి అభివృద్ధి కోసం కూటమి ప్రభుత్వం దృష్టి సాగించింది.

మహారాజా ఆసుపత్రికి అనారోగ్యం :జిల్లా ఆసుపత్రి అంటే మండల, పట్టణ స్థాయిల్లోని పీహెచ్​సీ (PHC), సీహెచ్​సీల్లో (CHC) అత్యవసర కేసులుగా పరిగణించే రోగులను అక్కున చేర్చుకుని ఉన్నత వైద్యం అందించాలి. కానీ విజయనగరం జిల్లా మహారాజా సర్వజన ఆసుపత్రిలో సౌకర్యాల కొరత రోగులను వేధిస్తోంది. ఏడాదిన్నర క్రితం వరకు జిల్లా కేంద్ర ఆసుపత్రిగా ఉండగా వైఎస్సార్సీపీ ప్రభుత్వం స్థానిక వైద్యశాల బోధనాసుపత్రిగా మార్చింది. వైద్య సేవలు మెరుగవుతాయని స్థానికులు హర్షం వ్యక్తం చేశారు. 600 నుంచి 800 ఉండే ఓపీ రోగుల సంఖ్య వెయ్యి నుంచి 1200 వరకు పెరిగింది. అయితే రోగులకు తగ్గట్టు సౌకర్యాలు పెరగకపోగా మరింత దిగజారాయి.

వసతులు కల్పించని జగన్‌ ప్రభుత్వం :రోగులకు కూర్చునేందుకు సరైన సౌకర్యాలు లేవు. రోగులను తీసుకొచ్చేందుకు కావాల్సిన వీల్‌ఛైర్స్‌, స్ట్రెచర్లు అరకొరగానే ఉన్నాయి. ఎంఆర్​ఐ (MRI) స్కానర్‌ ఏడాదిగా పనిచేయక రోగులు ప్రైవేటు ల్యాబ్‌లకు పరుగులు తీయాల్సి వస్తుంది. మధ్యాహ్నం తర్వాత వైద్య నిపుణులు అందుబాటులో ఉండటం లేదని రోగుల బంధువులు చెబుతున్నారు. నీటి కొరతా వేధిస్తోంది. మరుగుదొడ్ల నిర్వహణ సరిగా లేక రోగాలు రెట్టింపు అవుతున్నాయని రోగులు వాపోతున్నారు.

"చాలా మంది రోగులు వస్తున్నారు. ఎక్కడా ఏ డాక్టర్​ ఉంటారో సరియైన గైడెన్స్​ ఇవ్వడం లేదు. ఆసుపత్రిలో సిబ్బంది కొరతగా ఉన్నారు. ఎవరూ వస్తున్నారో ఎవరు వెళున్నారో తెలియదు. ఇక్కడ మంచినీటి సదుపాయం సరిగా లేదు. వీల్​ఛైర్స్​ కొరతగా ఉన్నాయి. వచ్చిన వారికి కూర్చొవడానికి కుర్చీలు, ఫ్యాన్లు లేవు. ఆసుపత్రి భవనం ఇరుక్కుగా ఉండటం వల్ల వచ్చిపోయే వారికి చాలా ఇబ్బందికరంగా ఉంది" _ రోగులు

ఆసుపత్రికి ప్రభుత్వమే చేయాలి వైద్యం :ఆసుపత్రి దుస్థితి గురించి తెలుసుకున్న కూటమి ప్రభుత్వం సేవలు మెరుగుపరిచేందుకు చర్యలు చేపట్టింది. మంత్రి కొండపల్లి శ్రీనివాస్‌, ఎమ్మెల్యేలు అదితి గజపతిరాజు, జిల్లా కలెక్టర్‌ అంబేడ్కర్‌, కోళ్ల లలిత కుమారితో కలిసి ఆసుపత్రిని సందర్శించారు. వివిధ విభాగాలను పరిశీలించారు. సమస్యల పరిష్కారానికి వైద్యులు, అధికారులతో సమీక్ష నిర్వహించారు. మరింత మెరుగైన సేవలు అందించే దిశగా చర్యలు చేపడతామన్నారు.

వైద్య కళాశాల ఏర్పాటు తర్వాత జీజీహెచ్‌, మాతా శిశు వైద్యశాలను ఒకే గొడుగు కిందకి తెచ్చారు. దీంతో రెండు వైద్యశాలల్లోనూ పర్యవేక్షకులు, వైద్య నిపుణులు పనిచేయాల్సి వస్తోంది. మాతా, శిశు వైద్యశాల రోగులు ఈసీజీ (ECG), ఎంఆర్​ఐ (MRI),సీటీ (CT) స్కాన్‌ పరీక్షల కోసం ఐదారు కిలోమీటర్ల దాటి జీజీహెచ్​కి (GGH) వెళ్లాల్సి వస్తుంది. కొత్త ప్రభుత్వం ఈ సమస్యనూ తీర్చాలని రోగులు కోరుతున్నారు.

"ఇక్కడ తాగునీటి సమస్య ఉంది. తాగు నీటి సమస్యను తీర్చడానికి రెండు బోర్లు ఇవ్వమని కలెక్టర్​కు విజ్ఞప్తి చేశాం. ఇందుకు కలెక్టర్​ సానుకూలంగా స్పందించి మున్సిపల్​ అధికారులతో చర్చించి ఫండ్స్​ విడుదల చేయడం జరిగింది. ఇక్కడ వీల్​ఛైర్స్​ సమస్యను గుర్తించాం. ఇందుకు 20 వీల్​ఛైర్స్, 10 స్ట్రెచర్స్​కు ఆదేశాలు జారీ చేశాం"_కొండపల్లి శ్రీనివాస్‌, మంత్రి