హరిత దీపావళిని ఇలా చేసుకుందాం - ఈ కుటుంబమే మనందరికీ స్ఫూర్తి

ఇల్లంతా దీపాల వెలుగులతోనే పండుగ వాతావరణం - టపాసుల జోలికి పోకుండా దశాబ్దాల కాలంగా దీపావళి వేడుకలు

Environmental Friendly Diwali: జీవితానికి జిలుగులు, దీపావళి వెలుగులు. దీపావళి దీపాల అంతరార్ధం ఇదే. పంచభూతాత్మకమైన సృష్టికి ప్రతీక దీపం. మట్టి ప్రమిద భూతత్వానికీ, వత్తి ఆకాశతత్వానికీ, తైలం జలతత్వానికీ, వెలగడానికి తోడ్పడే గాలి వాయుతత్వానికీ, జ్యోతి అగ్ని తత్వానికీ ప్రతీకలు. పంచభూతాల సమాహారమే- మనిషి శరీరం. అందుకే దీపాన్ని వెలిగించడమంటే మనల్ని మనం వెలిగించుకోవడమే. మనలోని అజ్ఞానపు అంధకారాల్ని నశింపజేసే ఆ పరమాత్మకు సమీపంగా వెళ్లడమేననేది పురాణ వచనం. వెలుగుల పండుగ దీపావళిని కులమతాలకు అతీతంగా అంతా చేసుకుంటారు.

ప్రతి ఒక్కరి మోములో సంతోషాలు వెళ్లివిరిసే ఈ తరుణంలో పండగ పేరుతో కాల్చే టపాసుల వల్ల పంచభూతాలు కాలుష్య కోరల్లోకి వెళ్తున్నాయి. మన సరదాల కోసం అద్భుతమైన వేడుకను పర్యావరణానికి శత్రువుగా మార్చేస్తున్నాం. ఆరునెలల్లో వచ్చే కాలుష్యాన్ని ఒక్క రాత్రిలోనే ప్రకృతికి అంటిస్తున్నాం. చేతులారా ఉపద్రవాల్ని స్వాగతిస్తున్నాం. హానికరమైన టపాసుల జోలికిపోకుండా దశాబ్దాలుగా దీపాల కాంతులతోనే ఈ పండుగను సంతోషంగా చేసుకుంటున్నాం అంటున్నారు కృష్ణా జిల్లా గూడవల్లికి చెందిన పొట్లూరి సాంబశివరావు కుటుంబీకులు, సన్నిహితులు. అదేంటో ఇప్పుడు చూద్దాం.

హరిత దీపావళి చేసుకొని ఆనందంగా ఉందాం: బాణసంచా కాల్చడం వల్ల పొందే సంతోషం క్షణకాలమే. తాత్కాలిక ఆనందమే కాదు ఆర్ధిక స్థితిగతులు, ఆరోగ్యాన్ని దృష్టిలో ఉంచుకోవడం అందరి బాధ్యత. ఈ క్రమంలో నిరాడంబరంగా హరిత దీపావళి చేసుకొని ఆనందంగా ఉందామంటున్నారు కృష్ణా జిల్లా గూడవల్లికి చెందిన పొట్లూరి సాంబశివరావు కుటుంబీకులు. మాటల్లో కాదు చేతల్లో దశాబ్దాలుగా చేసి చూపిస్తున్నారు. తమ లోగిలే కాదు, తమ బంధుమిత్రుల లోగిళ్లలోనూ ఈ తరహా ఆనందం ఉండేలా వారిలోనూ చైతన్యం తీసుకొస్తున్నారు. అంతా కలిసికట్టుగా అందమైన రంగవళ్లులు, పుష్పాల అలంకరణల నడుమ దీపాల వెలుగులతో ప్రకృతి కాంతను పరవశించేలా చేస్తున్నారు. సృష్టి, స్థితి, లయలకు ఉండే సన్నిహితమైన సంబంధమే దీపం. ఆ కాంతిలో అంతర్లీనంగా కనిపించే నీలవర్ణం విష్ణువుకు, తెల్ల రంగు శివునకు, ఎర్ర రంగు బ్రహ్మకు సంకేతాలంటారు పండితులు. విద్య, శక్తి, సంపదలను ప్రసాదించే సరస్వతి, దుర్గ, లక్ష్మీ ఆ కాంతిలో కొలువై ఉంటారన్నది పెద్దల మాట.

దీపం పరబ్రహ్మ స్వరూపం: దీపం మనోవికాసానికీ, ఆనందానికీ, సద్గుణ సంపత్తికి నిదర్శనం. అందుకే ‘దీపం పరబ్రహ్మ స్వరూపం’ అని భావిస్తూ ఆరాధిస్తారు. ‘వెలిగించడం’ సనాతన భారతీయ సంస్కృతి. వయోబేధాలు లేకుండా జాతి యావత్తు జరిపే పర్వదినం దీపావళి. టపాకాయలు, మతాబులు, చిచ్చుబుడ్లు, కాకరొత్తుల కాల్చడమే దీపావళి కాదు. దీపాలు వెలిగించడం, లక్ష్మిపూజ చేయడం, తద్వారా ఇంటికి సిరులను ఆహ్వానించే సంప్రదాయాన్ని ఇప్పటికే ఇలాంటి అనేక కుటుంబాలు కొనసాగిస్తున్నాయి. సనాతన సంప్రదాయాలను ముందు తరాల వారికి అందించే క్రమంలో సాంబశివరావు దంపతులు గత పాతికేళ్లుగా ప్రతి దీపావళికి వెయ్యికిపైగా దీపాలు వెలిగిస్తున్నారు.

అదే అందరికీ శ్రేయోదాయకం: దీపావళి వేళ టపాసులు కాల్చటం ఒక్కటే ముఖ్యమైన సంప్రదాయమే అనే భావన అనేక మందిలో ఉంది. కానీ దీపావళిని బాణాసంచా మోతలతో కాకుండా ఎక్కువ పొగ, శబ్దం, కాలుష్యం చేసే టపాసులకు బదులు గ్రీన్‌కాకర్స్‌ను వినియోగించాలని దేశ అత్యున్నత న్యాయస్థానం సుప్రీంకోర్టు సూచించింది. పశుపక్ష్యాదులు, పర్యావరణ పరిస్థితులకు ఇబ్బంది కలుగకుండా సాధ్యమైనంత వరకు దీపాలు పెట్టుకుని నిర్వహించాలని తెలిపింది. ప్రస్తుత పరిస్థితుల్లో ఈ తరహా సూచనలను ఆచరించడం అందరికీ శ్రేయోదాయకం. రెండు గంటల మాత్రమే సంబరాలు జరుపుకోవాలని అత్యున్నత న్యాయస్థానం ఆంక్షలు విధించిందంటే పరిస్థితి తీవ్రతను అర్థం చేసుకోవచ్చు. టపాసులు ఏ స్థాయిలో హాని చేస్తున్నాయో. అందుకే పర్యావరణ హితమైన దీపావళిని ప్రోత్సహించేందుకు ఇలాంటి కుటుంబాలు, స్వచ్ఛంద సంస్థలు, యువత నడుంబిగిస్తున్నాయి.

మేము ఈ పండగని గత 20 సంవత్సరాలుగా చేస్తున్నాము. భారతదేశంలో ముఖ్యమైన పండగలలో దీపావళి కూడా ఒకటి. పది మంది కలిసి చేసుకునేదే పండగ. ఏ రోజు కూడా టపాసులు కాల్చము. మొదటి పది సంవత్సరాలు 365 దీపాలు వెలిగించేవాళ్లం. గత పది సంవత్సరాల నుంచి 1116 దీపాలు వెలిగిస్తున్నాము. - పొట్లూరి సాంబశివరావు, గూడవల్లి, కృష్ణా జిల్లా