రాష్ట్రంలో హెచ్​సీఎల్​ విస్తరణకు ఏర్పాట్లు - ఉపాధికి ఊతం - HCL Team Meeting With Nara Lokesh

HCL Team Meeting With Minister Nara Lokesh : ఆంధ్రప్రదేశ్‌లో తన కార్యకలాపాలను భారీగా విస్తరించేందుకు హెచ్​సీఎల్​ సన్నాహాలు చేస్తోంది. ఐటీ శాఖ మంత్రి నారా లోకేశ్​తో భేటీ అయిన హెచ్​సీఎల్​ కార్పొరేట్‌ వైస్‌ ప్రెసిడెంట్‌ శివశంకర్‌, అసోసియేట్‌ వైస్‌ ప్రెసిడెంట్‌ శివప్రసాద్‌లు మరో 15 వేల ఉద్యోగాల కల్పనకు సుముఖత వ్యక్తం చేశారు.

HCL Team Meeting With Minister Nara Lokesh : రాష్ట్రంలో భారీగా కార్యాకలాపాల విస్తరణకు హెచ్​సీఎల్​ సన్నాహాలు చేస్తోంది. హెచ్​సీఎల్​ ప్రతినిధులు వైస్​ ప్రెసిడెంట్​ శివ శంకర్​, అసోసియేట్ వైస్ ప్రెసిడెంట్ శివప్రసాద్ ఐటీ శాఖ మంత్రి నారా లోకేశ్​తో భేటీ అయ్యారు. మరో 15 వేల ఉద్యోగాల కల్పనకు సుముఖత వ్యక్తం చేశారు. 2014 తెలుగుదేశం హయాంలో కార్యకలాపాలు ప్రారంభించిన హెచ్​సీఎల్​లో​ ప్రస్తుతం 4 వేల 500 మందికి ఉద్యోగాలు లభించాయి. విస్తరణ ద్వారా మరో 5 వేల 500 మందికి ఉద్యోగలు కల్పించాలని లక్ష్యంగా పెట్టుకున్నట్లు హెచ్​సీఎల్​ ప్రతినిధులు తెలిపారు.

ఫేజ్‌ 2లో భాగంగా నూతన కార్యాలయ భవన నిర్మాణం చేపట్టి మరో 10 వేల మందికి ఉపాధి కల్పిస్తామని వెల్లడించారు. ఐటీలో ప్రస్తుతం అంతర్జాతీయంగా ఉన్న ట్రెండ్స్​కు అనుగుణంగా అధునాతన సాంకేతిక సేవలను అందుబాటులోకి తెస్తామన్నారు. దీని ద్వారా పెద్ద ఎత్తున ఉద్యోగాలు కల్పించేందుకు ప్రణాళికలు సిద్ధం చేశామన్నారు. రాష్ట్ర ప్రభుత్వం ప్రతిష్ఠాత్మకంగా చేపట్టబోతున్ననైపుణ్యగణన, నైపుణ్యాభివృద్ధిలో తాము భాగస్వామ్యం వహిస్తున్నామన్నారు. విస్తరణకు సంబంధించి గత ప్రభుత్వంలో నిలిపివేసిన అనుమతులు విడుదల చేయాలని మంత్రి లోకేశ్​ని కోరారు.

Lokesh Comments On Jagan Regime :మరోవైపు జగన్ ఐదేళ్ల పాలన దుష్పరిణామాలు ప్రపంచవ్యాప్తంగా ఏపీ బ్రాండ్ ఇమేజ్​ను​ దారుణంగా దెబ్బతీశాయని ఐటీ శాఖ మంత్రి లోకేశ్​ దుయ్యబట్టారు. కంపెనీలకు ఇవ్వాల్సిన ఇన్సెంటివ్‌లు కూడా జగన్ దోచేశారని ఆగ్రహం వ్యక్తం చేశారు. ప్రభుత్వ పరంగా అందాల్సిన ప్రోత్సాహకాలు అందడం లేదనే విషయాన్ని జపాన్ కంపెనీల అసోసియేషన్ ప్రెసిడెంట్ సీఎం చంద్రబాబు దృష్టికి తీసుకొచ్చారన్నారు. జగన్‌ అసమర్థ, అవినీతి పాలనతో, ఏపీ బ్రాండ్ ఇమేజ్ ఎలా దెబ్బతిందో చూడాలంటూ సంబంధిత వీడియోను ఎక్స్‌లో లోకేశ్​ పోస్ట్‌ చేశారు.

28th Day of Praja Darbar in Undavalli : ఇదిలా ఉండగా నేడు ఉండవల్లిలో 28వరోజు ప్రజాదర్బార్ కు ప్రజలు క్యూ కట్టారు. ప్రజల నుంచి లోకేశ్​ స్వయంగా వినతులు స్వీకరించి, వాటిని పరిష్కరిస్తామని హామీ ఇచ్చారు. భూవివాదాలపై ప్రజల నుంచి అధికంగా విజ్ఞప్తులు వస్తున్నందున సమస్యల సత్వర పరిష్కారానికి చర్యలు తీసుకోవాలని మంత్రి లోకేశ్​ అధికారులను ఆదేశించారు. సంబంధిత శాఖతో సమన్వయం చేసుకోవాలని సిబ్బందికి సూచించారుఅమరావతి నిర్మాణం కోసం పెదవడ్లపూడికి చెందిన 40 మంది వృద్ధులు సేకరించిన 28 వేల రూపాయల విరాళాన్ని లోకేశ్​కు అందజేశారు. భూకబ్జాలు, పరిహారం, ఉద్యోగ నియామకాలకు సంబంధించి పలువురు వినతిపత్రాలు అందజేశారు.