ప్రపంచ దేశాలు రాష్ట్రం వైపు తలెత్తి చూసే సమయం ఆసన్నమైంది - సింగపూర్​ మీట్ అండ్ గ్రీట్​లో సీఎం రేవంత్

సింగపూర్​లో నిర్వహించిన మీట్ అండ్ గ్రీట్ కార్యక్రమం - ముఖ్య అతిథిగా హాజరైన సీఎం రేవంత్ రెడ్డి - తెలంగాణలో పలు రంగాలలో చేస్తున్న అభివృద్ధిని వివరించిన సీఎం

Meet and Greet Program in Singapore : తెలంగాణ కల్చరల్ సొసైటీ(సింగపూర్) ఆధ్వర్యంలో నిర్వహించిన మీట్ అండ్ గ్రీట్ కార్యక్రమం సింగపూర్​లోని వన్ వరల్డ్ ఇంటర్నేషనల్(GIIS) స్కూల్ ఆడిటోరియంలో జరిగింది. ఈ కార్యక్రమానికి ముఖ్య అతిథిగా సీఎం రేవంత్​రెడ్డి విచ్చేశారు. ఐటీ మంత్రి శ్రీధర్ బాబు, ప్రభుత్వ సలహాదారులు పోచారం శ్రీనివాస రెడ్డి, డీసీసీ ప్రెసిడెంట్ రోహిణ్ కుమార్ రెడ్డి, నాగార్జున సాగర్ ఎమ్మెల్యే జయవీర్ కుందూరు, తెలంగాణ కల్చరల్ సొసైటీ(సింగపూర్) వ్యవస్థాపక అధ్యక్షులు బండ మాధవ రెడ్డి తదితరులు పాల్గొన్నారు.

సీఎం రేవంత్ రెడ్డిని సింగపూర్ తెలుగు ప్రజల సమక్షంలో ఆహ్వానించారు. ముందుగా సీఎం రేవంత్ రెడ్డి జ్యోతి ప్రజ్వలనతో కార్యక్రమాన్ని ప్రారంభించారు. చిన్నారుల నృత్య ప్రదర్శనతో, స్వాగత గీతంతో ముఖ్యమంత్రిని ఆహ్వానించారు. ఆ తర్వాత తెలంగాణ రాష్ట్ర గీతాన్ని ఆలపించి కార్యక్రమాన్ని ప్రారంభించారు.

సీఎం రేవంత్​ రెడ్డికి సత్కారం (ETV Bharat)

ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ, తెలంగాణలో పలు రంగాలలో చేస్తున్న అభివృద్ధిని, తెలంగాణ ఔన్నత్వాన్ని భావితరాలకు అందించే ప్రణాళికను, ప్రపంచ దేశాలు రాష్ట్రం వైపు తలెత్తి చూసే సమయం ఆసన్నమైందని తెలిపారు. దానికి విదేశాలలో నివసిస్తున్న తెలంగాణ, తెలుగు ప్రజల సహాయ సహకారాలు ఉండాలని చెప్పారు. ఆ తర్వాత ఐటీ మంత్రి శ్రీధర్ బాబు డిజిటల్ రంగంలో చేస్తున్న అభివృద్ధిని వివరించారు.

సీఎం రేవంత్​కు ఘనంగా సత్కారం :ముఖ్యమంత్రి రేవంత్ రెడ్డి, ఐటీ మంత్రి శ్రీధర్ బాబు, ఇతర సభ్యులు అతిథిలు అందరినీ తెలంగాణ కల్చరల్ సొసైటీ(సింగపూర్) కమిటీ, సాంస్కృతిక కళాసారధి అధ్యక్షుడు కవుటూరు రత్నకుమార్, జీఐఐఎస్ ఛైర్మన్ అతుల్ తెముర్ణికల్ ఘనంగా సత్కరించారు.

అంతకు ముందు తెలంగాణ కల్చరల్ సొసైటీ(సింగపూర్) అధ్యక్షులు గడప రమేశ్ స్వాగత ప్రసంగంతో తెలంగాణ కల్చరల్ సొసైటీ స్థాపన, తెలుగు సంప్రదాయాలు, ఆచారాలు, ఆధ్యాత్మిక తత్వాలను భావితరాలకు అందించే కృషిలో సొసైటీ నిర్వహిస్తున్న కార్యక్రమాలను వివరించారు. తెలంగాణ మీద ప్రేమను చూపించడానికి విచ్చేసిన ముఖ్యమంత్రి రేవంత్ రెడ్డి, మంత్రి శ్రీధర్ బాబు ఇతర సభ్యులకు ధన్యవాదాలు తెలిపారు.

చిన్నారులతో సీఎం రేవంత్ రెడ్డి ఫొటో (ETV Bharat)

అదే విధంగా తెలంగాణ కల్చరల్ సొసైటీ వెన్నంటి ముందుండి నడిపించి, తమ సహాయ సహకారాలను ఎల్లవేళల అందించే వ్యవస్థాపక అధ్యక్షులు బండ మాధవ రెడ్డి, పూర్వ అధ్యక్షులు నీలం మహేందర్, ఎన్​ఆర్​ఐ సెల్ మంద భీంరెడ్డి, జీఐఏ గ్లోబల్ ఛైర్మన్ కల్వల విశ్వేశ్వర్ రెడ్డి, జీఐఐఎస్ ఛైర్మన్ అతుల్ తెముర్ణికల్, సాంస్కృతిక కళాసారధి అధ్యక్షుడు కవుటూరు రత్నకుమార్, కార్యక్రమానికి సహకరించిన బసిక శ్రీకాంత్ రెడ్డికి ఆయన ప్రత్యేక కృతజ్ఞతలు చెప్పారు. 2025 క్యాలెండర్( సింగపూర్ కాలమానం ప్రకారం)ను అందరికీ పంపిణీ చేశారు. అనంతరం మీట్ అండ్ గ్రీట్ కార్యక్రమాన్ని నిర్వహించి విజయవంతం చేశారు.

తెలంగాణ కల్చరల్ సొసైటీ(సింగపూర్) (ETV Bharat)