Karthika Deepotsavam Organized by ETV in Nellore:ఈటీవీ ఆంధ్రప్రదేశ్, ఈటీవీ తెలంగాణ, ఈటీవీ లైఫ్ ఆధ్యాత్మిక ఛానళ్ల ఆధ్వర్యంలో నెల్లూరులో కార్తిక దీపోత్సవం కన్నున పండువగా జరిగింది. ఏసీ కూరగాయల మార్కెట్‌ పక్కన ఉన్న వైఎంసీఏ మైదానంలో నిర్వహించిన దీపోత్సవానికి మహిళలు పెద్దఎత్తున తరలివచ్చారు. మహిళలకు నిర్వహకులు పూజాసామాగ్రి ఉచితంగా పంపిణీ చేశారు.
వేల దీపాల కాంతులతో మైదానమంతా ఆధ్యాత్మికంగా వెల్లివిరిసింది. సంప్రదాయ వస్త్రధారణలో దీపోత్సవానికి వచ్చిన మహిళలు, యువతుల ఓంకార నాదాలు, వేదమంత్రాలతో హోరెత్తింది. దీపోత్సవంలో సనాతన ధర్మంలోని గోవు విశిష్టత, గోపూజ ఫలాలపై శ్రీనివాస బంగారయ్య శర్మ ప్రవచనం చెప్పారు. అనంతరం మహిళలతో సాముహికంగా దీపోత్సవ పూజ చేశారు. రెండు గంటలపాటు జరిగిన ఈ కార్యక్రమంలో మహిళలు భక్తి ప్రవత్తులతో దీపాలు వెలిగించి కైలాసనాథుడ్ని ప్రార్థించారు.