ముగ్గురాయి టెండరూ అస్మదీయులకే - డిమాండ్‌ ఉన్నా తక్కువ ధరకే

YSRCP Government Scam on Muggurai Mines Tenders: అస్మదీయులకు మేలు చేకూర్చడానికి రాష్ట్ర ప్రయోజనాలను పణంగా పెట్టేందుకూ వైసీపీ నేతలు, ప్రభుత్వ అధికారులు వెనుకాడటం లేదు. ఏపీ ఖనిజాభివృద్ధి సంస్థకు చెందిన మంగంపేట ముగ్గురాయి విక్రయాల టెండర్లలో అధికార పార్టీ నేతలకు భారీ మేలు చేకూర్చేలా విశ్వ ప్రయత్నాలు చేస్తున్నారు. మార్కెట్‌లో సీ, డీ, డబ్ల్యూ గ్రేడ్‌ల ముగ్గురాయికి మంచి డిమాండ్‌ ఉన్నప్పటికీ కనీస ధర తగ్గించి టెండర్లు పిలవడం ద్వారా సంస్థకు 470 కోట్ల రూపాయలకు పైగా నష్టమొచ్చేలా వ్యవహరిస్తున్నారు. డిమాండ్‌ను బట్టి రాబడి పెంచుకోవాల్సిన గనుల శాఖ అధికారులు ఎవరి కోసం ‘కనీస ధర’లో లాలూచీ పడ్డారన్నది చర్చనీయాంశంగా మారింది.

YSRCP Govt Scam on Muggurai Mines Tenders:అన్నమయ్య జిల్లా ఓబుళవారిపల్లి మండలం మంగంపేట వద్ద ఏపీఎండీసీ పరిధిలోని గనుల్లో సీ, డీ, డబ్ల్యూ గ్రేడ్ల ముగ్గురాయి విక్రయాలకు జనవరి 24న టెండర్లు పిలిచారు. ఇందులో కనీస ధర మెట్రిక్‌ టన్నుకు పన్నెండు వందలుగా నిర్ణయించారు. వివిధ పన్నులు, ఫీజులు అదనంగా ఉంటాయని పేర్కొన్నారు. రెండేళ్ల కిందట ముగ్గురాయి విక్రయాలకు ఖరారుచేసిన టెండర్లలో కనీస ధర 1670గా ఉంది. దీనికి సీనరేజ్‌ ఫీజు, సెస్, జిల్లా ఖనిజ నిధి, మెరిట్, లోడింగ్, వేయింగ్‌ ఛార్జెస్, జీఎస్టీ తదితరాలన్నీ కలిపి 2108 చొప్పున ఇప్పటిదాకా విక్రయిస్తున్నారు.

ఈ లెక్కన తాజా టెండర్లలో కనీస ధర మెట్రిక్‌ టన్నుకు 1670గా పేర్కొనాలి. కానీ 470 రూపాయిల చొప్పున తగ్గించడం వెనుక అస్మదీయులకు భారీ ప్రయోజనం కల్పించే ఉద్దేశమున్నట్లు తెలుస్తోంది. కోటి మెట్రిక్‌ టన్నులకు లెక్కిస్తే 470 కోట్ల మేర కేవలం కనీస ధర రూపంలోనే ఏపీఎండీసి నష్టపోనుంది.

ప్రస్తుతం మార్కెట్‌లో ఎ, బి గ్రేడ్‌ల ముగ్గురాయికి కొరత ఉంది. సీ, డీ, డబ్ల్యూ గ్రేడ్‌లకు డిమాండ్‌ ఉంది. మంగంపేట గనుల్లోనూ ఒకటి రెండేళ్లలో ఏ గ్రేడ్‌ ముడిఖనిజం పూర్తిగా అయిపోతుంది. తర్వాత బీ గ్రేడ్‌తోపాటు, సీ, డీ, డబ్ల్యూకి మరింత డిమాండ్‌ వచ్చి ధర పెరుగుతుంది. ఇవన్నీ తెలిసి కూడా కనీస ధర తగ్గించారు. పైగా ఏడాదికోసారి టెండర్లు పిలిస్తే, రేపటి ధరలకు అనుగుణంగా అధిక రేట్లు నిర్ణయించి, ఎక్కువ రాబడిని పొందే అవకాశం ఉండేది. అలా కాదని, ఐదేళ్ల కాలానికి ఒకేసారి కోటి మెట్రిక్‌ టన్నులకు టెండర్లు పిలిచారు. టెండర్‌ నిబంధనలు ఎక్కువ మంది పోటీ పడకుండా పొందుపరిచారు. టెండరు దరఖాస్తు డౌన్‌లోడ్‌ చేసుకోవాలంటేనే ఫీజు, జీఎస్టీ కలిపి 29.5 లక్షలు చెల్లించాలి. ఇది వెనక్కి ఇవ్వరు. అంత సొమ్ము ఎందుకు వెచ్చించాలనే ఉద్దేశంతో కొందరు వెనక్కి తగ్గుతారు.

ధరావతుగా 90 కోట్లు చెల్లించాలనే నిబంధనతో మరికొందరు వెనక్కి తగ్గేలా చేశారు. బిడ్‌ దక్కించుకునే గుత్తేదారు లెటర్‌ ఆఫ్‌ ఎలాట్‌మెంట్‌ పొందిన నెలలోనే కోటి మెట్రిక్‌ టన్నుల ముగ్గురాయి విలువలో 50 శాతం మేర డిపాజిట్‌ చేయాలనే నిబంధన పెట్టారు. అంటే కనీసం 600 కోట్లకు పైగా డిపాజిట్‌ చేయాల్సి ఉంటుంది. ఇది బడా కాంట్రాక్టర్లు, వందల కోట్ల లావాదేవీలు చేసేవారికే సాధ్యమవుతుంది. ఇలాంటి నిబంధనలతో పోటీని బాగా తగ్గించారు. ఈ వాస్తవాలను కప్పిపుచ్చుతూ ఎక్కువ మంది బిడ్డర్లు పాల్గొనేలా కనీస ధర తగ్గించామంటూ అధికారులు వింత వాదన చేస్తున్నారు.

ముగ్గురాయి టెండర్లను ప్రభుత్వ పెద్దలు తమకు ప్రాణప్రదంగా భావించే గుత్తేదారు సంస్థకు కట్టబెట్టేందుకే వ్యూహాత్మకంగా వ్యవహరిస్తున్నారు. అధికార పార్టీ గుత్తేదారు గతంలో నాలుగు పల్వరైజింగ్‌ మిల్లులు ఏర్పాటుచేసుకొని, ప్రభుత్వ పెద్దలు, ముఖ్య అధికారుల సహకారంతో ఎక్కువ ముగ్గురాయిని విదేశాలకు ఎగుమతి చేశాడు. నేడు బడా గుత్తేదారుగా ఎదిగాడు. అధికారుల సహకారంతో అతను అమెరికన్‌ కంపెనీలతో ముగ్గురాయి సరఫరా ఒప్పందాలు చేసుకున్నట్లు తెలిసింది. తాజా టెండర్లు అతని సంస్థకే దక్కేలా చూస్తున్నారని తెలుస్తోంది. అతను డిపాజిట్‌ సొమ్మును కూడా అమెరికన్‌ కంపెనీల నుంచే తెచ్చి సర్దుబాటు చేయబోతున్నాడని ఈ రంగంలోని వ్యాపారులు చెబుతున్నారు.