Varun Dhawan About Citadel Honey Bunny :స్టార్ హీరోయిన్ సమంత, బాలీవుడ్ నటుడు వరుణ్ ధావన్ జంటగా నటించిన యాక్షన్ థ్రిల్లింగ్‌ వెబ్‌సిరీస్‌ 'సిటడెల్: హనీ-బన్నీ'. ప్రముఖ ఓటీటీ ప్లాట్ఫామ్ అమెజాన్‌ ప్రైమ్‌ వేదికగా ప్రస్తుతం స్ట్రీమ్ అవుతున్న ఈ సిరీస్ నెట్టింట విశేష ప్రేక్షకాదరణను సొంతం చేసుకుంటోంది. అయితే ఇప్పుడు ఈ స్టోరీని పార్ట్ 2గా తెరకెక్కించనున్నట్లు తెలుస్తోంది. దీని గురంచి తాజాగా హీరో వరుణ్ ధావన్ ఓ ఆసక్తికర కామెంట్‌ చేశారు.
తాజాగా సోషల్‌ మీడియాలో అభిమానులతో ముచ్చటించిన ఆయన ఆ సమయంలో దీని పార్ట్ 2 గురించి మాట్లాడారు. రెండో భాగం ఎప్పుడు అని ఓ నెటిజన్‌ అడగ్గా, "ప్రస్తుతం నేను వరుస ప్రాజెక్టులతో బిజీగా ఉన్నాను. అవన్నీ విడుదలకు సిద్ధమవుతున్నాయి. అయితే 'సిటడెల్: హనీ-బన్నీ' మేకర్స్‌ ఈ సిరీస్ పార్ట్ 2ను సినిమాగా తీసుకురావాలని అనుకుంటున్నారు. దీనిపై ప్రస్తుతానికి చర్చలు జరుగుతున్నాయి. కానీ త్వరలోనే దీనిపై నిర్ణయం తీసుకుంటారని తెలుస్తోంది." అని వరుణ్ చెప్పారు.
స్టోరీ ఏంటంటే?
హనీ (సమంత) నైనిటాల్‌లోని ఓ కెఫేలో పనిచేస్తుంటుంది. ఆమెకు నాడియా (కశ్వీ మజ్ముందార్‌) అనే ఐదేళ్ల కూతురు ఉంటుంది. కెఫే కోసం సరకులు తీసుకురావడానికి మార్కెట్‌కు వెళ్లిన సమయంలో హనీని ఓ వ్యక్తి అనుసరిస్తూ ఉంటాడు. అది గమనించిన ఆమె అక్కడి నుంచి తప్పించుకునే క్రమంలో పట్టుబడుతుంది. అయితే ఆ చెర నుంచి ఎలాగోలా తప్పించుకుని తన కుమార్తెను తీసుకుని వేరే ఊరికి వెళ్తుంది. కానీ హనీ ఉన్న ప్రదేశం తెలుసుకుని కొందరు వ్యక్తులు అక్కడికీ వెళ్తారు.