ఇంకా ITR ఫైల్ చేయలేదా? గడువు ముంచుకొస్తోంది - త్వరపడండి! - ITR Filing 2024 Deadline

ITR Filing 2024 Deadline : ఆదాయపు పన్ను చెల్లింపుదారులకు బిగ్ అలర్ట్. ఐటీఆర్​ ఫైల్ చేయడానికి ఆఖరు తేదీ జులై 31. ఈ గడువులోగా కచ్చితంగా మీ ఆదాయ పన్ను రిటర్నులు దాఖలు చేయాలి. ఒకవేళ గడువు దాటితే భారీగా పెనాల్టీలు పడతాయి. కొన్నిసార్లు చట్టపరమైన చిక్కులూ ఎదుర్కోవాల్సి రావచ్చు. పూర్తి వివరాలు మీ కోసం.

ITR Filing 2024 Deadline :ఆదాయపు పన్ను రిటర్నులు దాఖలు చేసే వారికి జులై నెల చాలా ముఖ్యమైనది. ఎందుకంటే ఐటీఆర్ దాఖలుకు ఆఖరు తేదీ జులై 31. ఆదాయ పన్ను శాఖ నుంచి ఎలాంటి ఇబ్బందులు, సమస్యలు ఎదురుకాకుండా ఉండాలంటే, ఇన్​కమ్ ట్యాక్స్ క్యాలెండర్​ను కచ్చితంగా ఫాలో కావాల్సిందే. లేదంటే భారీగా పెనాల్టీలు, అదనపు ఛార్జీలు చెల్లించాల్సి రావొచ్చు. కొన్నిసార్లు గడువు దాటితే చట్టపరమైన సమస్యలను ఎదుర్కోవాల్సి ఉంటుంది.

డెడ్​లైన్​
ఈ 2024-25 అసెస్మెంట్ ఇయర్ కోసం ఐటీఆర్ ఫైల్ చేయడానికి చివరి తేదీ 2024 జులై 31. కనుక ఈ గడువులోగా మీరు కచ్చితంగా మీ ఆదాయ పన్ను రిటర్నులు దాఖలు చేయడం చాలా మంచిది. ఎందుకంటే?

పొరపాట్లు చేయకుండా చూసుకోవచ్చు!
గడువు కన్నా ముందుగానే ఐటీఆర్ఫైల్ చేయడం మంచిది. ఎందుకంటే, మీకు కావాల్సిన సమాచారం, డాక్యుమెంట్లను సమకూర్చుకునేందుకు తగినంత సమయం దొరుకుతుంది. దీంతో ట్యాక్స్ రిటర్న్స్ దాఖలు చేయడంలో ఎలాంటి పొరపాట్లు జరగకుండా చూసుకోవచ్చు. మీ ఐటీఆర్​తో ఆధార్, పాన్, ఫారం-16, సాలరీ స్లిప్, బ్యాంకులు, పోస్టాఫీసుల నుంచి వడ్డీ సర్టిఫికెట్లు, ట్యాక్స్ సేవింగ్ పెట్టుబడుల ధ్రువీకరణ పత్రాలు, హెల్త్ ఇన్సూరెన్స్ ప్రీమియం రిసిప్టులు మొదలైన పత్రాలను జత చేసుకోవచ్చు.

తప్పులు సరిదిద్దుకోవచ్చు!
ఐటీఆర్ ఫైలింగ్ చేస్తే, సగం పని మాత్రమే పూర్తయినట్లు లెక్క. తరువాత దానిని వెరిఫై చేసుకోవాల్సి ఉంటుంది. ప్రస్తుతం ఉన్న పన్ను చట్టాల ప్రకారం, ఫైలింగ్ చేసిన 30 రోజుల్లోగా వెరిఫై చేసుకోవాలి. ముందస్తుగా ఐటీఆర్ ఫైలింగ్ చేయడం ద్వారా వెరిఫై చేసుకుని తప్పులను సరిచేసుకునేందుకు మనకు తగినత సమయం లభిస్తుంది.

పెనాల్టీల నుంచి తప్పించుకోవచ్చు!
2024 జులై 31 తర్వాత కూడా ఐటీఆర్ ఫైల్ చేసుకోవచ్చు. దానికి 2024 డిసెంబర్ 31 వరకు అవకాశం ఉంటుంది. అయితే, అందుకు కొంత ఆలస్య రుసుము లేదా పెనాల్టీ చెల్లించాల్సి ఉంటుంది. ముఖ్యంగా రూ.5 లక్షలకుపైగా వార్షిక ఆదాయం ఉన్నవారు కనీసం రూ.5 వేల వరకు జరిమానా కట్టాల్సి వస్తుంది. ఆపైన ఆదాయం ఉంటే రూ.10 వేల వరకు పెనాల్టీ కట్టాల్సి రావచ్చు. ఒకవేళ మీరు నిల్ ఐటీఆర్ ఫైల్ చేస్తే ఎలాంటి పెనాల్టీలు ఉండవు. అందువల్ల మీరు ఈ జులై 31లోపే ఐటీఆర్​ ఫైలింగ్ చేయడం చాలా మంచిది.

త్వరగా రీఫండ్ పొందవచ్చు!
ఎలాంటి జాప్యం లేకుండా వీలైనంత త్వరగా ఐటీఆర్ ఫైల్ చేస్తే, దాని ప్రాసెసింగ్ వేగంగా అయ్యేందుకు అవకాశం ఉంటుంది. వేగంగా ప్రాసెసింగ్ పూర్తయితే, అంతే వేగంగా రీఫండ్ వస్తుంది. ఇది మీకు ఆర్థికంగా ఎంతో లాభదాయకంగా ఉంటుంది.

ఇన్‌కమ్ ట్యాక్స్ నోటీసులు రాకుండా జాగ్రత్త పడవచ్చు!
గడువులోగా మీరు ఐటీఆర్ దాఖలు చేయకపోతే, మీపై ఐటీ శాఖ నిఘా పెట్టే అవకాశాలు ఎక్కువగా ఉంటాయి. ఒక వేళ ఏమైనా అవకతవకలు కనిపిస్తే ఐటీ నోటీసులు సైతం పంపించే అవకాశం ఉంటుంది. దీంతో మీకు అనవసర తలనొప్పులు వస్తాయి. అందుకే మీరు గడువులోగా ఐటీఆర్​ ఫైల్ చేస్తే, ఇలాంటి ఇబ్బందులు ఏమీ రాకుండా చూసుకోవచ్చు.