திருச்சியில் நடிகை மஞ்சு வாரியர் ஓட்டி வந்த வாகனம் திடீர் சோதனை! - Actress Manju warrier - ACTRESS MANJU WARRIER

திருச்சி: நாடாளுமன்றத் தேர்தலை முன்னிட்டு, நாடு முழுவதும் தேர்தல் நடத்தை விதிமுறைகள் அமலில் உள்ள நிலையில், பணப்பட்டுவாடாவை தடுக்கும் வகையில், பறக்கும் படை அதிகாரிகள் பல்வேறு பகுதிகளில் தீவிர சோதனையில் ஈடுபட்டுள்ளனர். அந்த வகையில், திருச்சி தேசிய நெடுஞ்சாலைப் பகுதியில் வாகன சோதனை நடைபெற்றது.

அப்போது, தேர்தல் பறக்கும் படை அலுவலர் ரஞ்சித் குமார் தலைமையில், காவல்துறை துணை ஆய்வாளர் கவுசல்யா குழுவினர் சோதனை மேற்கொண்டனர். அப்போது‌, கேரள பதிவெண் கொண்ட கார் ஒன்று வந்துள்ளது. அந்த காரை சோதனை மேற்கொண்டதில், காரை ஓட்டி வந்தது திரைப்பட நடிகையான மஞ்சு வாரியர் என்பது தெரிய வந்தது.

இதனை அடுத்து, சோதனைக்காக நிறுத்தி வைக்கப்பட்டிருந்த மற்ற வாகனத்தில் இருந்தவர்கள் நடிகை மஞ்சு வாரியருடன் செல்ஃபி எடுப்பதற்காக விரைந்தனர். இதனை அடுத்து, கூட்டம் அதிகமாவதைத் தடுக்க மஞ்சு வாரியரின் வாகனத்தை விரைவாக சோதித்து உடனடியாக அனுப்பி வைத்தனர்.

இந்நிலையில், திருச்சி அடுத்த லால்குடி பகுதியில் நடைபெற்று வரும் இயக்குநர் வெற்றிமாறனின் விடுதலை படத்தின் இரண்டாம் பாகத்தின் படப்பிடிப்பில் கலந்து கொள்ள மஞ்சு வாரியர் வருகை தந்திருப்பதாக தகவல் வெளியாகியுள்ளது.