விருதுநகர்: விருதுநகர் மாவட்டம், ஸ்ரீவில்லிபுத்தூர் மேற்கு தொடர்ச்சி மலை அடிவாரத்தில் ராக்காச்சி அம்மன் கோயில் உள்ளது. அப்பகுதியில் ராக்காச்சி அம்மன் கோயில் ஆறு, அருவி ஆகியவற்றில் ஆண்டு முழுவதும் தண்ணீர் வருவதால், விருதுநகர் மாவட்டத்தைச் சேர்ந்த மக்கள் சாமி தரிசனம் செய்வதற்கும், குளிப்பதற்கும் வருகின்றனர்.
அந்த வகையில், இன்று தீபாவளி மறுநாள் விடுமுறை தினம் என்பதால், ராக்காச்சி அம்மன் கோயிலில் சாமி தரிசனம் செய்வதற்கும், ஆற்றில் குளிப்பதற்கும் ஆயிரக்கணக்கான மக்கள் திரண்டனர். இந்த நிலையில், மாலை நேரத்தில் வனப்பகுதியில் கனமழை பெய்துள்ளது.
இதன் காரணமாக, ராக்காச்சி அம்மன் கோயில் ஆற்றில் காட்டாற்று வெள்ளம் பெருக்கெடுத்து ஓடத் தொடங்கி உள்ளது. இதனால் கோயிலில் இருந்தவர்கள் ஆற்றைக் கடக்க முடியாமல் சிக்கித் தவித்தனர். பின்னர், இதுகுறித்து ஸ்ரீவில்லிபுத்தூர் தீயணைப்புத் துறைக்கு தகவல் தெரிவிக்கப்பட்டது.