கரூரில் பிரசித்தி பெற்ற மாரியம்மன் கோயில் வைகாசி திருவிழா கோலாகலமாக துவக்கம்! - Karur Mariamman temple

Karur mariyamman festival: கரூர் மாநகரில் பிரசித்தி பெற்ற மாரியம்மன் வைகாசித் திருவிழா கோலாகலமாகத் துவங்கியுள்ளது.இதில் 200க்கும் மேற்பட்ட போலீசார் பாதுகாப்புப் பணியில் ஈடுபடுத்தப்பட்டனர்.

கரூர்: பிரசித்தி பெற்ற கரூர் மாரியம்மன் வைகாசி திருவிழா நேற்று மே 12ஆம் தேதி இரவு கம்பம் நடும் விழாவோடு துவங்கியுள்ளது.கரூர் மாவட்டத்தில் ஆண்டுதோறும் வைகாசி மாதத்தில், நடைபெறும் முக்கிய திருவிழாக்களில், மிகவும் பிரசித்தி பெற்ற கரூர் மாரியம்மன் திருவிழாவும் ஒன்றாக உள்ளது. இத்திருவிழாவிற்குத் தமிழ்நாட்டின் பிற பகுதிகளில் இருந்து சுமார் ஒரு லட்சத்திற்கும் மேற்பட்ட பக்தர்கள் கலந்து கொள்வார்கள் என எதிர்பார்க்கப்படுகிறது.

கரூர் மாரியம்மன் வைகாசி திருவிழாவின் முதல் நிகழ்வாக மே 12ஆம் தேதி ஞாயிற்றுக்கிழமை இரவு கம்பம் நடும் விழா கோலாகலமாக அமராவதி ஆற்றங்கரையில், மூன்று கொப்புகள் கொண்ட வேம்பு கம்பத்திற்கு புனித நீரூற்றி, ஊர்வலம் புறப்பட்டு முக்கிய வீதிகள் வழியாகக் கரூர் மாரியம்மன் ஆலயத்திற்கு வந்தடைந்தது.

அப்பொழுது வழிநெடுகிலும் வேம்பு கம்பத்திற்கு வேப்பிலை மற்றும் பூக்கள் அணிவித்தும் புனித நீர் ஊற்றியும் மக்கள் வழிபாடு நடத்தினர். பின்னர் ஆலயத்தில் நுழைவாயிலில் வேம்பு கம்பம் நடப்பட்டது.இவ்விழாவில் ஆயிரக்கணக்கான பக்தர்கள் கலந்து கொண்டதால் பாதுகாப்பு ஏற்பாடுகளைக் கரூர் குற்றப்பிரிவு காவல் துணை கண்காணிப்பாளர் முத்துக்கிருஷ்ணன் தலைமையில் காவல் ஆய்வாளர்கள் மேற்பார்வையில், 200க்கும் மேற்பட்ட போலீசார் பாதுகாப்புப் பணியில் ஈடுபடுத்தப்பட்டனர்.

கரூர் மாரியம்மன் ஆலயத்தில் மே 13ஆம் தேதி இன்று முதல் மே 29 ஆம் தேதி வரை தொடர்ந்து 17 நாட்களுக்கு அதிகாலை முதல் ஏராளமான பெண்கள் குழந்தைகள் புனித நீர் ஊற்றி வழிபாடு நடத்துவார்கள் என்பதால் தனியாகக் காவல் கண்காணிப்பு கட்டுப்பாட்டு அறை அமைக்கப்பட்டு சிசிடிவி கேமராக்கள் மூலம் போலீசார் பாதுகாப்புப் பணியில் ஈடுபடுத்தப்பட்டுள்ளனர்.

தொடர்ந்து கரூர் மாரியம்மன் ஆலய வைகாசி திருவிழாவின் முக்கிய நிகழ்வாக மே17 ம் தேதி வெள்ளிக்கிழமை இரவு பூச்சொரிதல் விழா 49 பூத்தட்டுகளோடு கரூர் மாநகரில் உள்ள பகுதி மக்கள் சார்பாக மாரியம்மனுக்குக் கொண்டுவரும் நிகழ்வு நடைபெற உள்ளது.

தினந்தோறும் இரவு கரூர் மாரியம்மன் பல்லாக்கில், புலி வாகனம், பூத வாகனம், சிம்ம வாகனம், அன்ன வாகனம், சேஷ வாகனம், பானை வாகனம், குதிரை வாகனம், காமதேனு வாகனம், புஷ்ப வாகனம், கருட வாகனம் மயில்வாகனம் மற்றும் கிரிவாகனம் என தினந்தோறும் விமர்சையாக அம்மன் அலங்காரத்தில் திருவீதி உலா நடைபெற உள்ளது.

மே 19ஆம் தேதி ஞாயிற்றுக்கிழமை காப்புக் கட்டுதல், மே 26ம் முதல் தேதி வரை மாவிளக்கு அக்னி சட்டி எடுத்தல், அழகு குத்துதல் மற்றும் காவடி எடுத்தல் என நேர்த்திகடன்கள் செலுத்தும் நிகழ்ச்சி தொடர்ந்து நடைபெற உள்ளது. பின்னர் மே 27ஆம் தேதி கரூர் மாரியம்மன் கோயில் வைகாசி தேரோட்டம் நடைபெற உள்ளது.

இதனைத் தொடர்ந்து, மே 29ஆம் தேதி புதன்கிழமை மாலை கம்பம் ஆற்றில் விடும் நிகழ்வு நடைபெற உள்ளது அன்று இரவு சுமார் 2 மணி நேரத்திற்குக் கண் கவரும் வான வேடிக்கை நிகழ்வு நடைபெற உள்ளது. இந்நிகழ்வினை காண , கரூர் மாவட்டத்தின் பல்வேறு பகுதிகளில் இருந்தும், தமிழகத்தின் பல்வேறு மாவட்டங்களில் இருந்தும் ஒரு லட்சத்துக்கு மேற்பட்ட பக்தர்கள் கலந்து கொள்வார்கள் என்பதால் கரூர், திருச்சி மற்றும் புதுக்கோட்டை உள்ளிட்ட பல்வேறு மாவட்டங்களில் இருந்து ஆயிரத்துக்கும் மேற்பட்ட போலீசார், கரூர் மாவட்ட காவல் கண்காணிப்பாளர் பிரபாகர் தலைமையில், பாதுகாப்புப் பணியில் ஈடுபடுத்தப்பட உள்ளனர்.

கரோனா ஊரடங்கு உத்தரவு காரணமாகத் தொடர்ந்து இரண்டு ஆண்டுகள் புகழ்பெற்ற கரூர் மாரியம்மன் வைகாசித் திருவிழா தற்காலிகமாக நிறுத்தப்பட்டு இருந்த நிலையில், கடந்த ஆண்டு விமர்சையாக மீண்டும் திருவிழா நடைபெற்றது. தொடர்ந்து, இந்த ஆண்டும் திருவிழா விமர்சையாக நடைபெற உள்ளது என்பது குறிப்பிடத்தக்கது.

இதையும் படிங்க:இம்மாத இறுதியில் தருமபுரம் ஆதீனத்தை பல்லக்கில் தூக்கும் பட்டினப் பிரவேச விழா! - Adheenam Pattina Pravesam