ஆசிரியர்கள் சங்கம்: இரட்டை நாடகம் போடும் எடப்பாடி பழனிசாமி!

தமிழ்நாடு ஆசிரியர் முன்னேற்ற சங்கம், எதிர்க்கட்சித் தலைவர் எடப்பாடி பழனிசாமியின் ஆசிரியர், அரசு ஊழியர் கோரிக்கைகளை குறித்த திடீர் கவலைகளைப் பாராட்டாது என கடுமையாக விமர்சித்துள்ளது.

சென்னை: எடப்பாடி பழனிசாமியின் ஆட்சிக் காலத்தில் மறுக்கப்பட்ட கோரிக்கைகளை மீண்டும் வெளியே கொண்டுவந்து அரசியல் செய்வது ஏற்புடையதல்ல என தமிழ்நாடு ஆசிரியர் முன்னேற்ற சங்கம் கண்டனம் தெரிவித்துள்ளது. திமுக ஆட்சியில் பல்வேறு முக்கிய திட்டங்கள் நிறைவேற்றப்பட்டதை சுட்டிக்காட்டி, தற்போது முதலமைச்சர் மு.க. ஸ்டாலின் எங்கள் கோரிக்கைகளை நிறைவேற்றுவார் என்ற நம்பிக்கை உள்ளதாகத் தெரிவித்தார்.

இதுகுறித்து பேசிய தமிழ்நாடு ஆசிரியர் முன்னேற்ற சங்கத்தின் தலைவர் கு. தியாகராஜன், "எடப்பாடி பழனிசாமி திடீரென எங்கள் மீது அக்கறை காட்டி பேசி வரும் நிலையில், அதிமுக ஆட்சியில் எங்கள் கோரிக்கைகள் எவ்வாறு நிராகரிக்கப்பட்டன என்பதை யாரும் இன்னும் மறக்கவில்லை. அகவிலைப்படி உயர்வை நிறுத்தியது, சரண் விடுப்பு ஒப்படைப்பை தடை செய்தது, உயர்கல்விக்கான ஊக்க ஊதியத்தை நிறுத்தியது யாரோ என்கிற கேள்விகளுக்கு பதில் அதிமுக ஆட்சி மட்டுமே," என்றார்.

பழைய ஓய்வூதிய திட்டம் மற்றும் திமுக அரசின் சாதனைகள்

திமுக ஆட்சியில் ஆசிரியர், அரசு ஊழியர்கள் நலனுக்காக எடுக்கப்பட்ட பல நடவடிக்கைகள் குறித்து தியாகராஜன் பேசினார்.

• குடும்ப நலநிதி - ஆசிரியர் மற்றும் அரசு ஊழியர்களுக்கான குடும்ப நலநிதி ரூ.5 லட்சமாக உயர்த்தப்பட்டது.
• மகப்பேறு விடுப்பு - மகப்பேறு விடுப்பை ஓராண்டாக நீட்டித்தது.
• தொகுப்பூதிய ஆசிரியர்கள் - 53,000 தொகுப்பூதிய ஆசிரியர்களை காலமுறை ஊதியத்தில் கொண்டு வந்தது.
• ஊதியக்குழு மாற்றங்கள் - திமுக ஆட்சியில் பெரும்பாலான ஊதிய மாற்றங்கள் செய்யப்பட்டுள்ளன.

இதையும் படிங்க

இது போன்ற பல திட்டங்கள் திமுக ஆட்சியில் தொடங்கி நிறைவேற்றப்பட்டது என்பதில் தமிழ்நாடு ஆசிரியர்கள் பெருமிதம் கொள்கின்றனர்.

மேலும் பேசிய தியாகராஜன், "மு.க. ஸ்டாலின் எங்களின் கோரிக்கைகளுக்கு எப்போதும் செவிமடுத்து ஆதரவு அளிக்கிறார். எங்கள் கோரிக்கைகள் விரைவில் நிறைவேறும் என முழுமையான நம்பிக்கை உள்ளது. பழைய ஓய்வூதிய திட்டம் உள்ளிட்ட அனைத்தையும் நிச்சயம் அவர் நிறைவேற்றுவார். 2026 சட்டப்பேரவைத் தேர்தலில் திமுக ஆட்சிக்கு மீண்டும் ஆதரவளிக்கக் காத்திருக்கிறோம்,” என்று கூறினார்.

இதற்கிடையில், தமிழ்நாட்டில் பல்வேறு ஆசிரியர்கள் சங்கங்களின் சார்பில் ஊதிய உயர்வு, காலிப் பணியிடங்களை நிரப்புதல், பழைய ஓய்வூதியத் திட்டம் போன்றவற்காக பல இடங்களில் போராட்டங்கள் நடந்து வருவது குறிப்பிடத்தக்கது.

ஈடிவி பாரத் தமிழ்நாடு வாட்ஸ்ஆப் சேனல் (ETV Bharat Tamil Nadu)

ஈடிவி பாரத் தமிழ் வாட்ஸ்ஆப் சேனலில் இணையஇங்கே கிளிக் செய்யவும்.