தமிழில் மொழிபெயர்க்கப்பட்ட 100 சட்டப் புத்தகங்களை வெளியிட்டார் மு.க.ஸ்டாலின்! - 100 Law Books

CM MK Stalin released 100 law books: தமிழ்நாடு மாநிலச் சட்ட ஆட்சிமொழி ஆணையத்தின் மூலமாக தமிழில் மொழிபெயர்க்கப்பட்ட 100 சட்டப் புத்தகங்களை தமிழ்நாடு முதலமைச்சர் மு.க.ஸ்டாலின் வெளியிட்டார்.

சென்னை: தமிழ்நாடு முதலமைச்சர் மு.க.ஸ்டாலின் இன்று தலைமைச் செயலகத்தில், கலைஞர் நூற்றாண்டு நிறைவு விழாவினை முன்னிட்டு, தமிழ்நாடு மாநிலச் சட்ட ஆட்சி மொழி ஆணையத்தின் மூலமாக ஆங்கிலத்திலிருந்து தமிழில் மொழிபெயர்க்கப்பட்ட 37 மையச் சட்டங்கள் மற்றும் 63 தமிழ்நாடு மாநிலச் சட்டங்கள் என மொத்தம் 100 சட்டப் புத்தகங்களை வெளியிட்டார்.

அதன்படி, தமிழில் மொழிபெயர்க்கப்பட்ட 37 மையச் சட்டங்கள் மற்றும் 63 தமிழ்நாடு சட்டங்களில் 43 மறுமதிப்பு செய்யப்பட்ட சட்டங்கள், 20 புதிய பதிப்பு செய்யப்பட்ட சட்டங்கள் என மொத்தம் 100 சட்டப் புத்தகங்கள் வெளியிடப்பட்டன. இதில் தேசிய உணவு பாதுகாப்புச் சட்டம் 2013, குலுக்குச் சீட்டுகள் சட்டம் 1998, இந்திய அரசுச் சின்னம் (முறையற்று பயன்படுத்தப்படுவதை தடை செய்தல்) சட்டம் 2005, சிறப்புப் பொருளாதார மண்டலங்கள் சட்டம் 2005 உள்ளிட்ட சட்ட புத்தகங்களை வெளியிட்டார்.

பேரழிவினைச் சமாளித்தல் சட்டம் 2005 உள்ளிட்ட 100 சட்டங்களுக்கான புத்தகங்களையும், தமிழ்நாடு அரசின் இணையதளத்திலிருந்து (www.tn.gov.in) பதிவிறக்கம் செய்து பயன்படுத்திக் கொள்ளும் வகையில் நடவடிக்கை எடுக்கப்பட்டுள்ளது. இந்த நிகழ்ச்சியில் சட்டத்துறை அமைச்சர் ரகுபதி, தலைமைச் செயலாளர் சிவ்தாஸ் மீனா, சட்டத்துறை அரசு செயலாளர் ஜார்ஜ் அலெக்சாண்டர், மாநில சட்ட ஆட்சிமொழி ஆணையத்தின் தலைவரும், ஓய்வு பெற்ற சென்னை உயர்நீதிமன்ற நீதியரசர் தாரணி உள்ளிட்டோர் கலந்து கொண்டனர்.

இதையும் படிங்க:மெட்ரோ நிலையங்களில் மாற்றுத்திறனாளிகளுக்கான சாய்வுதள வசதி எங்கே? தமிழ்நாடு அரசு அறிக்கை தாக்கல் செய்ய உத்தரவு - DISABLED FRIENDLY METRO STATION