சென்னை: சென்னை பெரம்பூர் பகுதியில் கடந்த ஐந்தாம் தேதி பகுஜன் சமாஜ் கட்சி மாநில தலைவர் ஆம்ஸ்ட்ராங் வெட்டி படுகொலை செய்யப்பட்டார். இந்த வழக்கில் மொத்தமாக 16 நபர்களை இதுவரை செம்பியம் காவல் நிலைய தனிப் படை போலீசார் கைது செய்துள்ளனர்.
இந்த நிலையில், கைது செய்யப்பட்ட குற்றவாளிகளை 5 நாட்கள் போலீசார் காவலில் எடுத்து தீவிர விசாரணை நடத்தினர். இந்த விசாரணையில், பல்வேறு தகவல்கள் வெளியாகியது. அதன்படி, பல்வேறு ரவுடிகள் ஒன்றிணைந்து திட்டம் தீட்டி ஆம்ஸ்ட்ராங்கை வெட்டி படுகொலை செய்தது தெரியவந்தது.
அதன் தொடர்ச்சியாக, இந்த வழக்கில் சம்மந்தப்பட்ட ஒவ்வொரு நபரையும் போலீசார் கைது செய்து விசாரணை நடத்தி வருகின்றனர். இந்த நிலையில், ஏற்கனவே கைது செய்யப்பட்டு காவலில் எடுத்து விசாரணை நடத்தி சிறையில் அடைக்கப்பட்டுள்ள குற்றம் சுமத்தப்பட்ட சிலரை மீண்டும் போலீசார் காவலில் எடுத்து விசாரணை நடத்தத் திட்டமிட்டிருந்தனர்.
அதன் அடிப்படையில், எழும்பூர் நீதிமன்றத்தில் செம்பியம் காவல் நிலைய போலீசார் மனு ஒன்றினைத் தாக்கல் செய்திருந்தனர். அந்த மனு மீதான விசாரணை இன்று (ஜூலை 22) விசாரணைக்கு வந்தது.