நெல்லை தீபக் ராஜா பசுபதிபாண்டியன் ஆதரவாளரா? பழிக்குப்பழியாக கொலையா? - திடுக்கிடும் பின்னணி - nellai youth murder case

Tirunelveli Deepak Raja murder case: நெல்லையில் காதலியுடன் ஹோட்டலுக்கு சென்ற தீபக் ராஜன் என்ற இளைஞர் வெட்டிப் படுகொலை செய்யப்பட்டது குறித்து பாளையங்கோட்டை போலீசார் வழக்குப்பதிவு செய்து குற்றவாளிகளை வலைவீசித் தேடிவருகின்றனர். இந்நிலையில், கொலை செய்யப்பட்ட தீபக் ராஜனின் பின்னணி குறித்த தகவல்கள் வெளியாகி பரபரப்பை ஏற்படுத்தியுள்ளன.

திருநெல்வேலி:நெல்லை மாவட்டம், மூன்றடைப்பு அருகே வாகைக்குளத்தைச் சேர்ந்தவர் தீபக் ராஜா (30). இவர் நேற்று தனது காதலியுடன் பாளையங்கோட்டை அடுத்த கேடிசி நகரில் உள்ள ஒரு ஹோட்டலுக்கு சாப்பிட சென்றபோது, மர்ம நபர்களால் அரிவாளால் ஓட ஓட விரட்டி வெட்டி படுகொலை செய்யப்பட்டார். அப்போது, அங்கிருந்தவர்கள் எழுப்பிய சத்தம் கேட்டு ஹோட்டலுக்குள் இருந்து வெளியே வந்த அவரது காதலி, ரத்த வெள்ளத்தில் கிடந்த தனது காதலன் தீபக் ராஜாவைக் கண்டு கதறி அழுது துடித்துள்ளார்.

பட்டப் பகலில் நடைபெற்ற இக்கொலை சம்பவம் நெல்லையை உலுக்கியது. மேலும், தீபக் ராஜா கொடூரமாக கொலை செய்யப்பட்ட சிசிடிவி காட்சிகளும் வெளியானது. அதில், மர்மகும்பல் தீபக் ராஜா துரத்தி துரத்தி வெட்டி படுகொலை செய்துவிட்டு சாவகாசமாக காரில் புறப்பட்டு செல்வது பதிவாகியுள்ளது. குறிப்பாக மர்ம கும்பல் தீபக் ராஜாவின் முகத்தை குறி வைத்து வெட்டியிருப்பதால், பகை மற்றும் பழிக்கு பழியால் இக்கொலை நடந்திருக்கலாம் என தெரிகிறது.

இது குறித்து பாளையங்கோட்டை போலீசார் வழக்கு பதிவு செய்து உடனடியாக விசாரணையில் இறங்கினர். குறிப்பாக சிசிடிவி காட்சிகளை ஆராய்ந்து தப்பி ஓடிய மர்ம கும்ப கும்பலை தீவிரமாக தேடி வருகின்றனர். ஆனால், கொலையாளிகளில் சிலர் முகத்தில் மாஸ்க் அணிந்திருந்தனர். பிறர் துணியால் முகத்தை மறைத்திருந்தனர். இதனால், அவர்களை உடனே அடையாளம் காண்பதில் போலீசாருக்கு சிரமம் ஏற்பட்டுள்ளது.

மேலும், சம்பந்தப்பட்ட ஓட்டலில் அருகில் உள்ள பிற சிசிடிவி காட்சிகளையும் போலீசார் கைப்பற்றி அந்த கார் எந்த வழியாக வந்தது, மீண்டும் எந்த வழியாக திரும்பி சென்றது என்பதையும் விசாரித்து வருகின்றனர். மேலும், குற்றவாளிகளைப் பிடிக்க மாநகர காவல் ஆணையர் மூர்த்தி உத்தரவின் பேரில், ஐந்து தனிப்படைகள் அமைக்கப்பட்டுள்ளன. இதற்கிடையில் கொலை செய்யப்பட்ட தீபக் ராஜன் குறித்த திடுக்கிடும் தகவல்கள் வெளியாகியுள்ளன.

தீபக் ராஜா பின்னணி:தீபக் ராஜா மீது ஏற்கனவே பல்வேறு காவல் நிலையங்களில் கொலை வழக்கு உட்பட பல்வேறு வழக்குகள் நிலுவையில் இருப்பதாக கூறப்படுகிறது. குறிப்பாக தூத்துக்குடி மாவட்டம், மூலக்கரையில் சுபாஷ் பண்ணையார் தோட்டத்தில் நடைபெற்ற இரட்டை கொலை வழக்கு, வல்லநாடு அருகே நடைபெற்ற தாத்தா, பேரன் கொலை வழக்கு, நெல்லை மாவட்டம் தாழையூத்தில் நடந்த கட்டிட கான்ட்ரக்டர் கண்ணன் கொலை வழக்கு உட்பட பல முக்கிய கொலை வழக்குகளில் தீபக் ராஜன் குற்றவாளியாக சேர்க்கப்பட்டிருப்பதாக கூறப்படுகிறது.

பசுபதி பாண்டியன்: குறிப்பாக சாதி ரீதியாக நடைபெற்ற பல்வேறு குற்ற சம்பவங்களில் தீபக் ராஜனுக்கு தொடர்பு இருப்பது தெரியவந்துள்ளது. பட்டியல் இனத்தைச் சேர்ந்த தீபக் ராஜா, குறிப்பிட்ட பிற சமுதாய நபர்களுடன் தொடர்ச்சியாக மோதல் போக்கை கடைபிடித்து வந்துள்ளார். மேலும் தீபக் ராஜா, 2012ம் ஆண்டு கொலை செய்யப்பட்ட பசுபதி பாண்டியன் ஆதரவாளர் என்றும் கூறப்படுகிறது.

அதேபோல், சில ஆண்டுகளுக்கு முன் நெல்லை பாளையங்கோட்டை மத்திய சிறையில் வைத்து இதே வாகைக்குளத்தைச் சேர்ந்த முத்து மனோ என்ற கைதி கொலை செய்யப்பட்டார். இக்கொலைக்கு பழிக்குப்பழியாகவே நெல்லை தாரையூத்தைச் சேர்ந்த கண்ணன் கொலை செய்யப்பட்டார். கண்ணன் கொலை வழக்கில் தீபக் ராஜா கைது செய்யப்பட்டிருந்தார். அதன் தொடர்ச்சியாக, தீபக் ராஜா பல்வேறு பொது நிகழ்ச்சிகளில் மிகவும் ஆக்ரோஷமாக பேசி வந்துள்ளார்.

பழிக்குப் பழி?:மேலும், தனது சமூகத்தைச் சேர்ந்த மக்களுக்கு பிரச்சினை ஏற்பட்டால், குரல் கொடுக்கும் நபராகவும் இவர் அறியபட்டுள்ளார். தனக்கென சில ஆதரவாளர்களை கையில் வைத்துக்கொண்டு, பொது இடங்களில் கெத்தாக இருப்பதாக எண்ணிக்கொண்டு வலம் வந்துள்ளார். ஒட்டு மொத்தமாக தனது சமூக மக்கள் மத்தியில் ஒரு சாதி தலைவராக உருவெடுக்கும் விதமாக தீபக் ராஜா செயல்பட்டதாக தெரியவருகிறது.

இந்த நிலையில் தான், தீபக் ராஜா நேற்று மர்ம கும்பலால் கொடூரமாக வெட்டி கொலை செய்யப்பட்டுள்ளார். எனவே, சாதி பின்னணியோடு தான் தீபக் ராஜா கொலை செய்யப்பட்டிருக்க வேண்டும் எனப் போலீசாருக்கு சந்தேகம் ஏற்பட்டுள்ளது. குறிப்பாக, 2018 ஆம் ஆண்டு தூத்துக்குடி மாவட்டம், வல்லநாடு தாத்தா பேரன் கொலை வழக்கில் பழிக்குப்பழியாக தீபக் ராஜா கொல்லப்பட்டு இருக்கலாம் எனவும் கூறப்படுகிறது.

பரபரப்பில் நெல்லை: இது குறித்தும் தனிப்படை போலீசார் தீவிரமாக விசாரணை மேற்கொண்டு வருகின்றனர். இதற்கிடையில், கொலை செய்யப்பட்ட தீபக் ராஜா உறவினர்கள் நேற்று குற்றவாளிகளை உடனே கைது செய்யக் கோரி, நெல்லை அரசு மருத்துவக் கல்லூரி மருத்துவமனையின் பிரேத பரிசோதனை மையத்தின் அருகே சாலை மறியலில் ஈடுபட்டனர்.

தொடர்ந்து இன்றும் அவர்கள் போராட்டத்தில் ஈடுபடலாம் என்பதால் அங்கு போலீசார் பாதுகாப்பு பணியில் ஈடுபட்டு வருகின்றனர். நெல்லையில் சாதி மோதல் காரணமாக, பல்வேறு கொலை சம்பவங்கள் தொடர்ச்சியாக அரங்கேறி வரும் சூழலில், சாதி பின்னணியோடு செயல்பட்டு வந்த இளைஞர் பட்டப்பகலில் கொடூரமாக கொலை செய்யப்பட்ட சம்பவம் போலீசார் இடையே அதிர்ச்சியை ஏற்படுத்தியுள்ளது.

இது தொடர்பாக ஈடிவி பாரத் தமிழ்நாடு நெல்லை மாவட்ட செய்தியாளர் நெல்லை மாநகர காவல் ஆணையர் மூர்த்தியிடம் கேட்டதற்கு, 'தீபக் ராஜன் கொலை வழக்கு தொடர்பாக தொடர்ந்து விசாரித்து வருகிறோம். மாநகர காவல்துறை சார்பில் நான்கு தனிப்படைகள் மாவட்ட காவல்துறை சார்பில் ஒரு தனிப்படைகள் அமைக்கப்பட்டு விசாரணை நடைபெற்று வருகிறது. சிசிடிவி காட்சிகளை ஆய்வு செய்து வருகிறோம். அதன் அடிப்படையில் குற்றவாளிகளை வலைவீசித் தேடிவருகிறோம்' எனப் பதிலளித்துள்ளார்.

இதையும் படிங்க: நெல்லை வாலிபர் கொடூர கொலை.. கதறிய காதலி.. பதைபதைக்கும் சிசிடிவி காட்சி! - Nellai Youth Murder