திருச்சிராப்பள்ளி: உலகம் முழுவதும் இன்று (ஜனவரி 1) புதன்கிழமை ஆங்கில புத்தாண்டை மக்கள் கோலாகலமாக கொண்டாடி வருகின்றனர். புத்தாண்டு தினத்தை அடுத்து நாட்டின் பல்வேறு பகுதிகளில் கொண்டாட்டங்கள் களைக்கட்டியுள்ளது. தமிழகத்தில், சென்னை உட்பட பல்வேறு நகரங்களில் வானவேடிக்கையுடன் மக்கள் புத்தாண்டை வரவேற்றுள்ளனர்.
இதன் ஒரு பகுதியாக, திருச்சியில் பல்வேறு பகுதிகளில் பொதுமக்கள் புத்தாண்டை கொண்டாடியுள்ளனர். குறிப்பாக, மாவட்டத்தின் முக்கிய இடமான காவிரி பாலத்தில் புத்தாண்டு கொண்டாட்டம் கோலாகலமாக நடைபெற்றுள்ளது. இதில், ஏராளமான இளைஞர்கள் மற்றும் பொதுமக்கள் கலந்துக்கொண்டு ஆட்டம், பாட்டம், கொண்டாட்டம் என வானவேடிக்கையுடன் புத்தாண்டை வரவேற்றுள்ளனர்.
புத்தாண்டு கொண்டாட்டத்தில் ஈடுபட்ட இளைஞர்கள் (ETV Bharat Tamil Nadu) இளைஞர்கள் கொண்டாட்டம்:
காவிரி மேம்பாலம், பாரதிதாசன் சாலை, டிவிஎஸ் டோல்கேட், ஜங்ஷன் மேம்பாலம், சென்னை தேசிய நெடுஞ்சாலை உள்ளிட்ட பல்வேறு பகுதிகளில் புத்தாண்டைக் கொண்டாடும் வகையில், இளைஞர்கள் சாலையில் கூட்டம் கூட்டமாக வாகனத்தில், அதிக ஒலிகளை எழுப்பிக் கொண்டு அதிவேகத்தில் சென்றும், பட்சாசுகளை வெடித்தும் புத்தாண்டை கொண்டாடியுள்ளனர்.
தொடர்ந்து, காவிரி மேம்பாலத்தில் பாதுகாப்பில் இருந்த போலீசார், அங்கு கூடிய பொதுமக்களுடன் கேக் வெட்டி புத்தாண்டை பாதுகாப்பான முறையில் கொண்டாடியுள்ளனர். இருப்பினும், புத்தாண்டு நாளில் மதுபோதையில் வாகனங்களில் சென்றவர்கள் மற்றும் போக்குவரத்து விதிமுறைகளை மீறி அதிவேகமாகச் சென்ற வாகனங்களின் பதிவு எண்ணைச் சேகரித்து போக்குவரத்து போலீசார் அபராதம் விதித்துள்ளனர்.
பொதுமக்களுடன் புத்தாண்டை கொண்டாடிய போலீசார் (ETV Bharat Tamil Nadu) மேலும், பொதுமக்களுக்கு இடையூறு மற்றும் எந்த ஒரு அசம்பாவித சம்பவங்களும் ஏற்படாத வண்ணம் காவல்துறையினர் பல கட்டுப்பாடுகளை விதித்து, திருச்சி மாநகர் மற்றும் புறநகரின் முக்கிய பகுதியில் போலீசார் பாதுகாப்புப் பணியில் ஈடுபட்டுள்ளனர்.
இதையும் படிங்க:"நல்லவங்களை ஆண்டவன் கை விட மாட்டான்"... பாட்ஷா ஸ்டைலில் புத்தாண்டு வாழ்த்து சொன்ன ரஜினிகாந்த்!
அதனைத்தொடர்ந்து, இன்று காலையில் கோயில்கள் மற்றும் தேவாலயங்களில் புத்தாண்டு சிறப்பு வழிபாடுகள் செய்யப்பட்டுள்ளது. அனைத்து கிறிஸ்தவ சபைகளிலும் இரவு 10 மணி முதல் புத்தாண்டு சிறப்பு ஆராதனைகள் நடைபெற்றுள்ளனர். இதில் ஏராளமானோர் கலந்துக்கொண்டு ஒருவருக்கொருவர் புத்தாண்டு வாழ்த்துக்களைப் பரிமாறிக் கொண்டுள்ளனர்.
திருச்சி காவிரி பாலத்தில் புத்தாண்டு கொண்டாட்டம் (ETV Bharat Tamil Nadu) தொடர்ந்து பேசிய ஶ்ரீவர்சினி கூறுகையில், "புத்தாண்டு கொண்டாட்டத்திற்கு முதன் முறையாக நாங்கள் காவிரி பாலத்திற்கு வந்துள்ளோம். நாங்கள் குடும்பத்தினரோடு கேக் வெட்டி கொண்டாடினோம். இங்கு பட்டாசுகளை வெடித்து சிறப்பாக கொண்டாடினர். அனைத்து பகுதிகளிலும் காவல்துறையினர் பாதுகாப்பில் ஈடுபட்டிருந்தனர்," என்றார்.
அதன் பின்னர் பேசிய யாஷிதா கூறுகையில், "எனக்கு 2024 வேகமாக சென்றுவிட்டது. பிறந்துள்ள 2025 பொறுமையாக, நிதானமாக செல்ல வேண்டும் என்று நான் ஆசைப்படுகிறேன். இந்த புத்தாண்டை நாங்கள் மகிழ்ச்சியுடன் கொண்டாடினோம்," என்றார்.
