மாட்டுப் பொங்கல் சிறப்பு: கோசாலையில் நாட்டு மாடுகள் குறித்து விழிப்புணர்வு!

சேலம் மாவட்டம் ஏற்காடு மலையடிவாரத்தில் உள்ள குப்பனூர் குமரகிரி கோசாலையில் மாட்டு பொங்கலை முன்னிட்டு பொங்கல் வைத்து கால்நடைகளை வழிபட்டு, நாட்டு மாடுகள் குறித்து விழிப்புணர்வு ஏற்படுத்தப்பட்டது.

சேலம்:சேலம் மாவட்டம் ஏற்காடு மலையடிவாரத்தில் உள்ள குப்பனூரில் குமரகிரி கோசாலை இயங்கி வருகிறது. இங்கு காங்கேயம் மாடுகள், காரி, செந்தூரா உள்ளிட்ட 10 வகையான மாடுகளும் ஆலம்பாடி, திருஞ்சல், தொண்டைகுட்டை, புலிகுளம், மலை மறை மாடுகள், உம்பளாச்சேரி, மதுரை குட்டை, சர்க்கரை குட்டை உள்ளிட்ட 48 வகையான நாட்டு மாடுகளும் பராமரிக்கப்பட்டு வருகின்றன.

மேலும் இங்கு ஜல்லிக்கட்டு காளைகள், நாட்டு சேவல்கள், ஆடுகள், புறாக்கள், நாய்கள் என நூற்றுக்கணக்கான கால்நடைகள் இந்த கோசாலையில் பாதுகாக்கப்பட்டு வருகின்றன. 'வீட்டுக்கு ஒரு நாட்டு மாடு' என்ற இலக்கை மையப்படுத்தி செயல்படுத்தப்பட்டு வருகிறது. இந்நிலையில் மாட்டு பொங்கலான நேற்று (ஜன.15) இந்த கோசாலையில் மாட்டுப் பொங்கல் விழா வெகு சிறப்பாக கொண்டாடப்பட்டது. மாடுகளின் கொம்புகளுக்கு வர்ணம் தீட்டப்பட்டு, மஞ்சள், குங்கும்ம் வைத்து அலங்கரிக்கப்பட்டது. மற்ற கால்நடைகளும் இளைஞர்கள் மற்றும் குழந்தைகள் முன்பு காட்சிப்படுத்தப்பட்டன. பின், அனைத்து கால்நடைகளுக்கும் சிறப்பு தீவனங்கள் வழங்கப்பட்டு பூஜைகள் நடத்தப்பட்டன.

இதையும் படிங்க:மாட்டு பொங்கல் கோலாகலம்: கிராமத்து மக்களுடன் குத்தாட்டம் போட்ட வெளிநாட்டினர்! - பொங்கல் 2024

இதுகுறித்து பேசிய கோசாலை நிர்வாகி சக்திவேல், “விவசாயிகளின் உற்ற தோழனான திகழும் நாட்டு மாடுகளை பாதுகாக்க வேண்டியது அவசியம். அதற்கு முதலில் நாட்டு மாடுகள் குறித்து விழிப்புணர்வு ஏற்படுத்த வேண்டும். அந்த வகையில் நாட்டு மாடுகளின் பராமரிப்பு மற்றும் அவற்றால் விளையும் நன்மைகள் குறித்து அனைவருக்கும் இன்று நடந்த விழிப்புணர்வு நிகழ்ச்சியில் எடுத்துக் கூறப்பட்டது. தமிழகத்தில் ஒவ்வொரு மாவட்டத்திற்கும் ஒவ்வொரு வகையான மாடுகள் உள்ளன.

கொங்கு மண்டலத்தை பொறுத்தவரை காங்கேயம் மாடுகள் அதிகபடியாக காணப்படுபவை. அதில் 10 வகையான காங்கேயம் மாடு வகை உள்ளது. டெல்டா மாவட்டங்களில் உம்பளச்சேரி என்ற மாடு வகை உள்ளது. தமிழ்நாட்டில் மொத்தம் 48 வகையான மாடுகள் உள்ளன. அதில் 31 வகையான மாடுகள் இந்த விழிப்புணர்வு நிகழ்ச்சியில் கலந்து கொண்டுள்ளனர்." என்றார்.