"ஊழல் பல்கலைக்கழகத்தின் வேந்தர் மோடி" - மு.க.ஸ்டாலின் விமர்சனம் - Lok Sabha Election 2024

M.K.Stalin Campaigned In Theni: ஊழலுக்குப் பல்கலைக்கழகம் கட்டினால் அதற்கு மோடி தான் வேந்தராக இருப்பார். ஊழலை சட்டப்பூர்வமாக்கிய சாதனையாளர் மோடி என்று மு.க.ஸ்டாலின் விமர்சித்துள்ளார்.

தேனி: திமுக சார்பில் தேனி மற்றும் திண்டுக்கல் நாடாளுமன்றத் தொகுதிகளில் போட்டியிடும் வேட்பாளர்களை ஆதரித்து பிரச்சார பொதுக்கூட்டம் தேனி லட்சுமிபுரம் அருகே நடைபெற்றது. இந்த கூட்டத்தில் முதலமைச்சர் மு.க.ஸ்டாலின் கலந்துகொண்டு தேனி தொகுதி திமுக வேட்பாளர் தங்க தமிழ்ச்செல்வன் மற்றும் திண்டுக்கல் தொகுதி மார்க்சிஸ்ட் கம்யூனிஸ்ட் கட்சி வேட்பாளர் சச்சிதானந்தம் ஆகியோரை ஆதரித்து பிரச்சாரம் செய்தார்.

அப்போது பொதுக்கூட்டத்தில் பேசிய முதலமைச்சர் மு.க ஸ்டாலின், "மோடி மீண்டும் ஆட்சிக்கு வரக் கூடாது என்பதைப் பொதுமக்கள் மனதில் வைக்க வேண்டும். மோடி மீண்டும் பிரதமரானால் இந்தியாவில் ஜனநாயகம் இருக்காது, நாடாளுமன்றத்தில் விவாதம் இருக்காது, மாநில அரசுக்கு அதிகாரம் இருக்காது முற்றிலும் ஒற்றை சர்வாதிகார நாடக மாற்றி விடுவார்கள் சமூக நீதியைச் சீர்குலைத்து விடுவார்கள்.

ஊழலுக்குப் பல்கலைக்கழகம் கட்டினால் அதற்கு மோடி தான் வேந்தராக இருப்பார். ஊழலை சட்டப்பூர்வமாக்கிய சாதனையாளர் மோடி. தேர்தல் பத்திரம் மூலமாக ஊழல் பணத்தை நேரடியாகக் கட்சியின் கணக்கிற்குக் கொண்டுவந்த உத்தமர்தான் மோடி.

10 ஆண்டுகளாக இந்தியப் பிரதமராக இருந்து சாதனைகளைச் சொல்ல முடியாமல் மக்களைப் பிளவு படுத்தும் வேலையைச் செய்கிறார். இந்தியா கூட்டணி ஆட்சி அமைந்தால் இந்தியா வளம்பெறும் குறிப்பாகத் தமிழகம் வளம்பெறும்.

மத்தியில் ஆட்சியில் இருப்பவர்களுடன் அதிமுக கூட்டணி வைத்திருந்தால், எடப்பாடி பழனிசாமி இரண்டு விஷயங்களைத்தான் மத்திய அரசிடம் கேட்பார். ஒன்று திமுக ஆட்சி நடைபெற்றால் அதைக் கலைக்க சொல்வார்கள் அல்லது தங்கள் மீதான ஊழல் வழக்குகளைத் தள்ளுபடி செய்யச் சொல்லுவார்கள்.

நாடாளுமன்றத் தேர்தலோடு சட்டமன்றத் தேர்தலும் நடைபெறும் என்று 'இலவு காத்த கிளி' போல் இருந்தார் எடப்பாடி பழனிசாமி. ஆனால், அது நடைபெறவில்லை அதனால் வாய்க்கு வந்தபடி பேசுகிறார். அடுத்த சட்டமன்ற தேர்தலிலும் திமுக தான் வெற்றி பெற வேண்டும்.

குடியுரிமை திருத்தச் சட்டத்திற்கு அதிமுக, பாமக கட்சிகள் ஆதரிக்காமல் இருந்திருந்தால் அந்த சட்டம் நிறைவேறி இருக்காது. இந்த இரண்டு கட்சிகளும் மக்களுக்குத் துரோகங்கள் செய்த கட்சி. பாஜக உடன் சேர்ந்தால் தற்கொலைக்குச் சமம் என்று கூறினார் டிடிவி தினகரன்.

நோட்டாவோடு போட்டிப் போடுகின்றன கட்சி தான் பாஜக என்று சொன்னவர் இன்று அவர்களுடன் கூட்டணி வைத்துள்ளார். மோடி வைத்திருக்கும் வாஷிங் மெஷினில் ஊழல்வாதிகள் உள்ளே போய் வந்தால் சுத்தாமகி விடுவார்கள் அப்படி வந்தவர் தான் டிடிவி தினகரன்.

அந்நிய செலாவணி மோசடி வழக்கில் சிக்கியவர தினகரன். ஜெயலலிதா இருந்தவரை போயஸ் கார்டன் செல்ல தடை செய்யப்பட்டவர் தினகரன் இன்று சசிகலாவால் மீண்டும் கட்சிக்குள் நுழைந்து மோடியுடன் கூட்டணி வைத்துள்ளார்.

தேனி மக்கள் கடந்த முறை ஓ.பி.ரவீந்திரநாத் இடம் ஏமாந்து விட்டீர்கள் இந்த முறை டிடிவி தினகரனிடம் ஏமாந்து விடாதீர்கள். பாஜக கட்சிக்கு தமிழகத்தில் சொந்த செல்வாக்கு இல்லாததால் ஓபிஎஸ் மற்றும் டிடிவி தினகரன் போன்றவர்களை வாடகைக்கு எடுத்துத் தேர்தலில் நிற்க வைக்கின்றனர்" என்று விமர்சித்துப் பேசினார்.

இதையும் படிங்க:மேட்டுப்பாளையம் மோடி பொதுக்கூட்டத்தில் நமீதாவிற்கு அனுமதி மறுப்பா? போலீசாருடன் வாக்குவாதம்!