கோயம்புத்தூர்: கோவை போத்தனூர் திருமண மண்டபத்தில் கோவை மாவட்ட திமுக நிர்வாகிகளுடன் முதல்வர் ஸ்டாலின் ஆலோசனை மேற்கொண்டார். இந்த ஆலோசனைக் கூட்டத்தில் 200க்கும் மேற்பட்ட நிர்வாகிகள் பங்கேற்றனர்.
இதனைத் தொடர்ந்து, கூட்டத்தினர் மத்தியில் பேசிய மு.க.ஸ்டாலின், "எந்த எதிர்பார்ப்புமின்றி கழகத்திற்காக உழைக்கும் தொண்டர்களுக்கு நாம் என்ன செய்கிறோம் என்பதை நினைத்துப் பார்க்க வேண்டும். உங்களுக்கு கீழாக உள்ள கழகத்தினருக்கு நீங்கள்தான் பலமாகவும், பாலமாகவும் இருக்க வேண்டும்.
இளைஞர்களுக்கு கொள்கைகளை விதைப்பது மிக முக்கியம். அவர்கள்தான் எதிர்காலத்திற்கான விதைகள். பேச்சாளர்களை அழைத்து பாசறைக் கூட்டங்களை நடத்துங்கள். ஒவ்வொரு பகுதியிலும் கொள்கை வீரர்களாக பத்து அல்லது பதினைந்து இளைஞர்களை உருவாக்க வேண்டியது உங்கள் ஒவ்வொருவரின் கடமை.
நிர்வாகிகள் அவரவர் குடும்பத்திற்கும் நேரத்தை செலவிடுங்கள். தொழில் செய்பவர்களாக இருந்தால் அதற்கும் கவனம் செலுத்துங்கள். அதே சமயம் ஒரு நாளில் இரண்டு மணி நேரத்தை கட்சிக்காக ஒதுக்குங்கள். வார இறுதியில் ஒரு நாளை முழுமையாக கட்சிப்பணிக்கு ஒதுக்குங்கள்" என அறிவுறுத்தினார்.
நிர்வாகிகளுடனான ஆலோசனைக் கூட்டத்திற்கு பின்பு செய்தியாளர்களை சந்தித்து பேசிய அவர், "கோவை மக்கள் பல கோரிக்கைகளை முன்வைத்திருக்கின்றனர் அவை நிச்சயம் நிறைவேற்றித் தரப்படும். இதுமட்டும் அல்லாது, தங்க நகை தொழில் பூங்கா குறித்த கோவை மக்களின் கோரிக்கை பரிசீலிக்கப்படும். மேலும், 2026ஆம் ஆண்டு திமுக ஆட்சி தான் என்பதை உறுதிப்படுத்தும் வகையில் கோவை மக்களின் வரவேற்பு சிறப்பாக இருந்தது" என்று தெரிவித்தார்.