சென்னை:காவல்துறையால் சுடப்பட்ட பாம் சரவணனுக்கு தனியார் மருத்துவமனையில் சிகிச்சை அளிக்கக்கோரி அவரது மனைவி தொடர்ந்த வழக்கில், அவரின் மருத்துவ அறிக்கையைத் தாக்கல் செய்ய காவல்துறைக்கு சென்னை உயர் நீதிமன்றம் உத்தரவிட்டுள்ளது.
பிரபல ரவுடி பாம் சரவணனின் மனைவி மகாலக்ஷ்மி சென்னை உயர்நீதிமன்றத்தில் தாக்கல் செய்துள்ள மனுவில், "பல வழக்குகளில் காவல் துறையால் தேடப்பட்டு வந்த தனது கணவரை ஜனவரி 14ஆம் தேதி, போலீசார் சுட்டுப்பிடித்ததாகக் கூறியுள்ளனர். இதில், தனது கணவருக்கு இடது காலில் துப்பாக்கி குண்டுக் காயம் ஏற்பட்டதாகவும், பின்னர் ஸ்டான்லி அரசு மருத்துவமனையில் அனுமதிக்கப்பட்டு அந்த குண்டு அகற்றப்பட்டதாகத் தெரிவித்துள்ளார்.
மேலும், குண்டு அகற்றப்பட்ட பின்னரும் தொடர்ந்து ரத்தக் கசிவு உள்ளதாகவும், அதனை சரி செய்வதற்காக தனியார் மருத்துவமனையில் சிகிச்சை அளிக்க அனுமதிக்கோரி ஜனவரி 18ஆம் தேதி சிறை நிர்வாகத்திடம் அளித்த மனு பரிசீலிக்கப்படவில்லை எனவும் கூறியுள்ளார். எனவே, தனியார் மருத்துவமனையில் சிகிச்சை அளிக்க அனுமதிக்கோரி அளித்த விண்ணப்பத்தை பரிசீலிக்க உத்தரவிட வேண்டுமெனவும் கோரிக்கை வைத்துள்ளார்.