சென்னையில் அதிநவீன சாலைக்கு ரூ.400 கோடி ஒதுக்கீடு - பட்ஜெட்டில் மேயர் பிரியா அறிவிப்பு!

Chennai Corporation Budget: சென்னை பெருநகர மாநகராட்சிக்கு உட்பட்ட பகுதிகளில் சாலைகள் மற்றும் நடைபாதைகள் மேம்படுத்தும் பணி சுமார் ரூ.404 கோடி மதிப்பீட்டில் மேற்கொள்ளப்படும் என சென்னை மாநகருக்கான பட்ஜெட்டில் மேயர் பிரியா அறிவித்துள்ளார்.

சென்னை: சென்னை மாநகராட்சியின் நடப்பாண்டிற்கான (2024 - 2025) பட்ஜெட் கூட்டத் தொடர் இன்று (பிப்.21) தலைமைச் செயலகத்தில் நடைபெற்றது. மேலும் இந்த ஆண்டுக்கான நிதிநிலை அறிக்கையில், ஒட்டுமொத்தமாக 82 புதிய அறிவிப்புகளை மேயர் பிரியா வெளியிட்டார்.

பெருநகர சென்னை மாநகராட்சிக்கு உட்பட்ட பகுதிகளில் NSMT, TURIF, SFC ஆகிய திட்டங்களின் கீழ், 4 ஆயிரத்து 750 கீழான சாலைகள் மற்றும் நடைபாதைகள் மேம்படுத்தும் பணி ரூ.404 கோடி மதிப்பீட்டில் மேற்கொள்ளப்படும் எனவும், சென்னை பெருநகர மாநகராட்சியின் எல்லைக்கு உட்பட்ட பகுதிகளில் சேதமடைந்த சாலைகளில் புனரமைக்கும் பணிகள் மேற்கொள்ளப்படும் எனவும் தெரிவித்தார்.

இதில் சாலை அமைக்கும் COLD MIX INJECTION POT HOLE REPAIRING MACHINE- இயந்திரத்தை ரூ.1.50 கோடி மதிப்பீட்டில் சென்னை மாநகராட்சிக்கு கொள்முதல் செய்யப்பட்டு, ஒப்பந்ததாரர் கொண்டு இயக்குதல் மற்றும் பராமரிப்பு பணிகளை மேற்கொள்ளும் பணி எடுக்கப்படும் என அறிவிக்கப்பட்டது.

வெளி மாநிலங்கள் மற்றும் வெளி மாவட்டங்களில் இருந்து சென்னை மாநகராட்சி எல்லைக்கு வரும் மக்கள் சென்னை மாநகராட்சியின் எல்லை ஆரம்பத்தை தெரிந்து கொள்ளும் விதமாக நுழைவு வாயில்கள் அமைக்கப்படும். இதில் 5 பிரதான சாலைகளில் நுழைவு வாயில்கள் சுமார் ரூ.15 கோடி மதிப்பீட்டில் அமைக்கப்படும்.

குறிப்பாக இசிஆர் சாலை, அக்கறை, ஓஎம்எஸ் சாலை, செம்மஞ்சேரி, மீனம்பாக்கம், எஸ்.ஆர்.எம்.சி மருத்துவமனை, புழல் ஆகிய பகுதிகளில் நுழைவு வாயில்கள் அமைக்கும் பணி தொடங்கப்படும். மேலும் சென்னை மாநகரை அழகுபடுத்தும் பொருட்டு உயர்மட்ட மேம்பாலத்தின் கீழ் பகுதியினை, ரூ.2.85 கோடி செலவில் அழகுபடுத்தும் பணி மேற்கொள்ளப்படும்" எனவும் மேயர் பிரியா அறிவித்தார்.