தருமபுரி:தருமபுரி மாவட்டம், பென்னாகரம் அருகே உள்ள ஒகேனக்கல் வனப்பகுதிக்கு உட்பட்ட பகுதிகளில் வனத்துறைக்குச் சொந்தமான இடங்களில் குடியிருப்பவர்களை வனத் துறையினர் வெளியேற்றீ வருகின்றனர். பென்னாகரம் அருகே உள்ள ஏமனூர், சிங்காபுரம், ஒகேனக்கல், மணல் திட்டு உள்ளிட்ட பகுதிகளில் குடியிருக்கும் கால்நடை வளர்ப்போர், மீனவர்கள் உள்ளிட்டடோரை வனத்துறையினர் வெளியேற்றி வருகின்றனர்.
இந்நிலையில், ஒகேனக்கல் அருகே உள்ள எடத்திட்டு, வேப்பமரத்து கோம்பு ஆகிய பகுதிகளில் 15க்கும் மேற்பட்ட குடும்பத்தினர் குடியிருந்து வருகின்றனர். இவர்கள் கால்நடை வளர்ப்பு மற்றும் மீன்பிடித் தொழிலை செய்து வருகின்றனர்.
கடந்த ஐந்து தலைமுறைகளாக குடியிருந்து வரும் அவர்களை, வனப்பகுதி நிலத்தில் குடியிருப்பதாகக் கூறி வனத்துறையினர் அடிக்கடி அவர்களை தொந்தரவு செய்து வருவதாக அப்பகுதி மக்கள் குற்றம் சாட்டுகின்றனர். மேலும், கடந்த சில மாதங்களாக வனத் துறையினர் நோட்டீஸ் கொடுத்து வெளியேற்றும் முயற்சியில் ஈடுபட்டிருந்ததாகக் கூறப்படுகிறது.
இந்நிலையில், கடந்த இரண்டு நாட்களுக்கு முன்பு 10க்கும் மேற்பட்ட வனத் துறையினர் பொதுமக்களை வலுக்கட்டாயமாக அப்புறப்படுத்தும் பணியில் ஈடுபட்டுள்ளனர். அப்பொழுது இருதரப்புக்கும் இடையே வாக்குவாதம் ஏற்பட்டுள்ளது. இதில் வனத்துறையினர் வீடுகளின் கூரைகளைப் பிரித்துள்ளனர். இதற்கு எதிர்ப்பு தெரிவித்து அப்பகுதி பொதுமக்கள், தற்கொலைக்கு முயன்றுள்ளனர். இதனால் வனத்துறையினருக்கும், பொதுமக்களுக்கும் இடையே தள்ளுமுள்ளு ஏற்பட்டது.
இதில் பெண்கள் ஒரு சிலருக்கு லேசான காயம் ஏற்பட்டு, பென்னாகரம் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர். இதற்கிடையில், இரவோடு இரவாக வந்த வனத் துறையினர், அப்பகுதியில் மூன்று வீடுகளின் மேற்கூரைகளை அடித்து உடைத்து, இடித்து தள்ளியுள்ளனர்.
இதனைத் தொடர்ந்து மருத்துவமனையில் இருந்து இரவு வந்து பார்த்தவர்கள், வீடு இடிந்து கிடந்ததைக் கண்டு அதிர்ச்சி அடைந்துள்ளனர். மேலும் நேற்று இரவு பென்னாகரம் ஒகேனக்கல் பகுதியில் கன மழை பெய்ததால், வீட்டிலிருந்த உணவுப் பண்டங்கள், ஆதார் அட்டை, குடும்ப அட்டை போன்ற ஆவணங்கள் சேதமடைந்துள்ளதாக அப்பகுதி மக்கள் வேதனை தெரிவிக்கின்றனர்.