விரைவில் சென்னையில் ஓட்டுநர் இல்லா மெட்ரோ ரயில்! - Driverless Metro Train

சென்னை மெட்ரோ ரயில் 2ஆம் கட்ட திட்டத்தில் ஓட்டுநர் இல்லா முதல் மெட்ரோ ரயிலின் உற்பத்தியை அல்ஸ்டோம் டிரான்ஸ்போர்ட் இந்தியா நிறுவனம் வெற்றிகரமாக நிறைவு செய்துள்ளதாக தெரிவிக்கப்பட்டுள்ளது.

சென்னை:சென்னை மெட்ரோ ரயில் நிறுவனத்தின் (Chennai Metro Rail Limited) இரண்டாம் கட்ட வழித்தடத்தில் ஒட்டுநர் இல்லாமல் இயக்கப்படும் மெட்ரோ ரயிலை 3 பெட்டிகள் வீதம், மொத்தம் 108 பெட்டிகளைக் கொண்ட 36 மெட்ரோ ரயில்களை வழங்குவதற்கான வடிவமைப்பு, உற்பத்தி, சோதனை, பணியாளர்களுக்கு பயிற்சி, உதிரி பாகங்கள் வழங்கல் மற்றும் குறைபாடு பொறுப்பு போன்றவற்றை உள்ளடக்கிய ஒப்பந்தம், அல்ஸ்டோம் டிரான்ஸ்போர்ட் இந்தியா நிறுவனத்திற்கு (Alstom Transport India Limited) ரூ.1,215.92 கோடி மதிப்பில் வழங்கப்பட்டுள்ளது.

இந்த ஒப்பந்தத்தின் கீழ், முதல் மெட்ரோ ரயிலுக்கான பெட்டிகளை உற்பத்தி செய்யும் பணியை அல்ஸ்டோம் டிரான்ஸ்போர்ட் இந்தியா நிறுவனம், ஸ்ரீ சிட்டியில் கடந்த பிப்ரவரி 8ஆம் தேதி தொடங்கியது. முதல் மெட்ரோ ரயில் பெட்டிக்கான உற்பத்தி தொடங்கிய நிலையில், பெட்டியில் உள்ள பல்வேறு உபகரணங்களைப் பொருத்தும் பணிகள் நடைபெற்றன.

அதனைத் தொடர்ந்து, முதல் மெட்ரோ ரயிலுக்கான அனைத்து பணிகளும் வெற்றிகரமாக நிறைவடைந்தது. இந்த நிலையில், ஒட்டுநர் இல்லா முதல் மெட்ரோ ரயிலை, அல்ஸ்டோம் டிரான்ஸ்போர்ட் இந்தியா நிறுவனத்தின் சோதனை தடத்திற்கு இன்று (செப்.22) மாற்றப்பட்டது.

இதையும் படிங்க:ஆண்டுக்கு ரூ.70 ஆயிரம் உதவித்தொகை; இளங்கலை, முதுகலை மாணவர்களுக்கு SBI வழங்கும் பம்பர் சலுகை..அக்.1ம் தேதிக்குள் விண்ணப்பியுங்கள்!

இந்த நிகழ்ச்சியில், சிறப்பு முயற்சிகள் துறை முதன்மைச் செயலாளர் ஹர் சகாய் மீனா, சென்னை மெட்ரோ ரயில் நிறுவனத்தின் இயக்குனர் ராஜேஷ் சதுர்வேதி, மெட்ரோ ரயில் தலைமை பொது மேலாளர் ஏ.ஆர்.ராஜேந்திரன், அல்ஸ்டோம் டிரான்ஸ்போர்ட் இந்தியா நிறுவனத்தின் நிர்வாக இயக்குநர் அனில்குமார் சைனி, சென்னை மெட்ரோ ரயில் நிறுவனம் மற்றும் அல்ஸ்டோம் டிரான்ஸ்போர்ட் இந்தியா நிறுவனம் ஆகியவற்றின் பொது ஆலோசகர்கள் நிறுவனத்தின் உயர் அலுவலர்கள் மற்றும் பணியாளர்கள் உடனிருந்தனர்.

இதுமட்டுமல்லாது, உற்பத்தியாளர் வளாகத்தில் அனைத்து நிலையான சோதனைகளும் முடிந்த பின்னர், மெட்ரோ ரயில் பூந்தமல்லி பணிமனைக்கு அனுப்பப்படும். அதன் பிறகு, மெட்ரோ ரயில் 2ஆம் கட்ட வழித்தடத்தில் பல்வேறு நிலையில் சோதனை ஓட்டங்களுக்கு உட்படுத்தப்படும். அதனைத் தொடர்ந்து, சட்டப்பூர்வமான ஒப்புதல்களைப் பெற்ற பிறகு பயணிகளின் சேவையைத் தொடங்கும் என்று தெரிவிக்கப்பட்டுள்ளது.