இரண்டொரு மாதங்களில் ஸ்ரீபெரும்புதூர் பாலம் பணிகள்.. செல்வப்பெருந்தகை கேள்விக்கு அமைச்சர் எ.வ.வேலு பதில்!

TN Assembly: இன்று தமிழ்நாடு சட்டப்பேரவையில், நீண்ட நாட்களாக முடிக்கப்படாமல் உள்ள ஸ்ரீபெரும்புதூர் பாலம் கட்டுமானப் பணிகளை விரைந்து முடிக்க அரசு நடவடிக்கை எடுக்குமா என சட்டமன்ற காங்கிரஸ் கட்சித் தலைவர் செல்வப்பெருந்தகை கேள்வி எழுப்பினார்.

சென்னை: தமிழ்நாடு சட்டப்பேரவையின் 2ஆம் நாள் அமர்வு, இன்று தொடங்கி நடைபெற்று வருகிறது. முதலில் சபாநாயகர் அப்பாவு, மறைந்த முன்னாள் சட்டப்பேரவை உறுப்பினர்களுக்கு இரங்கல் குறிப்புகள் வாசித்தார். பின்னர், உயிரிழந்த முக்கிய பிரமுகர்களுக்கு இரங்கல் தீர்மானம் தெரிவிக்கப்பட்டது.

பின்னர் கேள்வி நேரத்தில், "முதலமைச்சர் வெளிநாடு சென்று வரலாறு காணாத அளவிற்கு நிதிகளைப் பெற்று வந்துள்ளார். அந்த முதலீடுகள் எல்லாம் ஸ்ரீபெரும்புதூர் பகுதியை நோக்கி வருகின்றது. தமிழ்நாட்டில் 36 சதவீதத்திற்கு அதிகமான தொழிற்சாலைகள் இருக்கின்ற பகுதி, ஸ்ரீபெரும்புதூர். ஆனால், அங்கு போக்குவரத்து நெரிசல் நாளுக்கு நாள் அதிகரித்து வருகின்றது.

இந்த பிரச்னையை போக்குவதற்கும், நிவாரணம் செய்து தருவதற்கும் அரசிடம் ஏதாவது புதிய திட்டம் இருக்கின்றதா? அதே போல் ஸ்ரீபெரும்புதூர் பாலம் கட்டுமானப் பணிகள் நீண்ட நாட்களாக முடிக்கப்படாமல் இருக்கின்றது. அதனை விரைந்து முடிக்க அரசு நடவடிக்கை எடுக்குமா?" என சட்டமன்ற காங்கிரஸ் கட்சித் தலைவர் செல்வப்பெருந்தகை கேள்வி எழுப்பினார்.

இதற்கு பதிலளித்த பொதுப்பணித் துறை அமைச்சர் எ.வ.வேலு, "ஸ்ரீபெரும்புதூரில் புதிய திட்டம் தொடங்கப்பட்டு, பணிகள் ஐந்து கட்டமாகப் பிரிக்கப்பட்டு, ஒப்பந்தம் கோரப்பட்டு, புறவழிச்சாலை அமைத்துள்ளோம். திருவள்ளூரில் ஆரம்பித்து, ஸ்ரீபெரும்புதூர் வரையிலும், ஸ்ரீபெரும்புதூரில் இருந்து சிங்கப்பெருமாள் கோயில், அங்கிருந்து மகாபலிபுரத்தில் உள்ள பூஞ்சேரி கிராமம் வரை இணைக்கும் திட்டமாகும்.

அந்த திட்டத்தில், ஸ்ரீபெரும்புதூர் முதல் சிங்கபெருமாள் கோவில் வரை இணைக்கும் பகுதியில்தான் அதிக தொழிற்சாலைகள் அமைந்துள்ளது. எங்கெல்லாம் நான்கு வழி சந்திப்புகள் இருக்கின்றதோ, அங்கெல்லாம் பாலம் அமைக்க வேண்டும் என்ற அடிப்படையில் பணிகள் நடைபெற்று வருகிறது. இன்னும்கூட போக்குவரத்து நெரிசலைக் குறைப்பதற்கு பாலங்கள் போட முடியுமா என்பதை ஆய்வு செய்து வருகிறோம். ஸ்ரீபெரும்புதூர் பாலம் என்பது நீண்ட நாள் கோரிக்கை. இரண்டொரு மாதங்களில் அந்த பணிகளும் தொடங்கப்பட இருக்கின்றது.

அந்த சாலையைப் பொறுத்தவரை, முதலமைச்சர் மிகவும் முக்கியத்துவம் அளிக்க வேண்டும் எனத் தெரிவித்துள்ளார். காரணம் என்னவென்றால், உற்பத்தி செய்யக்கூடிய பொருட்கள் ஏற்றுமதி செய்வதற்கு துறைமுகத்திற்கோ அல்லது விமான நிலையத்திற்கோ செல்வதற்கு சாலைகள் தேவை.

ஆகவே, அரசு அந்த சாலைகள் போடுவதற்கு முன்னுரிமை அளிக்கின்ற காரணத்தால்தான், இந்தத் துறையில் 24 மணி நேரமும் வேலை செய்து வருகிறோம். எனவே, நீங்கள் சொல்கின்ற கோரிக்கைக்கும் கட்டாயம் முக்கியத்துவம் அளிக்கப்படும்" எனவும் தெரிவித்துள்ளார்.

இதையும் படிங்க:மறைந்த விஜயகாந்திற்கு தமிழ்நாடு சட்டப்பேரவையில் இரங்கல்..!