“எம்மோவ் சீக்கிரம் வாமா..” வீட்டின் வெளியே உணவு தேடிய காட்டு யானையால் பரபரப்பு!

Elephant in Thadagam residential area: கோவை தடாகம் பகுதியில் உள்ள குடியிருப்புகளில் உணவு தேடி ஒற்றை காட்டு யானை உலா வரும் காட்சிகள் சிசிடிவி கேமராவில் பதிவாகியுள்ளது.

கோயம்புத்தூர்:கோடை காலம் ஆரம்பமாகி விட்டதால், கோயம்புத்தூர்ஒட்டியுள்ள மேற்கு தொடர்ச்சி மலைப் பகுதியில் தற்போது கடுமையான வறட்சி நிலவுகிறது. அதனால், வனப்பகுதியில் உள்ள விலங்குகளுக்கு தண்ணீர் தட்டுப்பாடு ஏற்பட்டுள்ளதால், தண்ணீர் பற்றாக்குறையை போக்க வனத்துறையினர் வாகனங்கள் மூலம் தொட்டிகளில் தன்ணீர் நிரப்பி வருகின்றனர்.

இருப்பினும், வன விலங்குகளுக்குத் தேவையான உணவுகளுக்கு பற்றாக்குறை நிலவுவதால், உணவு மற்றும் தண்ணீர் தேடி வன விலங்குகள் அருகில் உள்ள கிராமங்களில் புகுந்து வருகிறது. குறிப்பாக, யானைகள் உணவு மற்றும் தண்ணீர் தேடி, கூட்டம் கூட்டமாக வனப்பகுதியில் இருந்து வெளியேறி, அருகில் உள்ள குடியிருப்பு பகுதிகளில் செல்கிறது.

அந்த வகையில், கோவை வனக்கோட்டம் மதுக்கரை பகுதியில் ஏராளமான யானைகள் உள்ள நிலையில், அங்கிருந்து இடம் பெயர்ந்து, கோவை வனச்சரகத்திற்குள் புகுந்துள்ளன. இந்த யானைகள் தற்போது தடாகம் மற்றும் காளையனூர், பெரியதடாகம் பகுதிகளில் சுற்றி வருகிறது. இதனிடையே, தடாகம் மடத்தூர் பகுதியில் சுற்றி வரும் ஒற்றை யானை, குடியிருப்பு பகுதிகளில் புகுந்து உணவு தேடி வருகிறது.

இந்நிலையில், தடாகம் சோமையனூர் அருகே உள்ள மடத்தூர் கிராமத்திற்குள், நேற்று இரவு புகுந்த யானை, தோட்டத்திற்குள் புகுந்து மாமரத்தில் இருந்த மாங்காய்களை பறிக்க முயன்றுள்ளது. பின்னர், அங்குள்ள சுற்றுச்சுவரைத் தாண்டி அருகில் உள்ள கார்த்திக் கேசவமணி என்பவரது வீட்டின் முன்பு வந்து, உணவுப் பொருட்களை நீண்ட நேரம் தேடியது. அப்போது சத்தம் கேட்டு, வீட்டில் இருந்தவர்கள் வெளியே வந்து பார்த்தபோது வாசலில் யானை நிற்பதை பார்த்து அதிர்ச்சியடைந்துள்ளனர்.

மேலும், அவர்கள் கூச்சலிட்டதை அடுத்து, யானை அங்கிருந்து சென்றது. இந்த காட்சிகள் அங்கிருந்த சிசிடிவி காட்சிகளில் பதிவாகியிருந்தது. தற்போது இந்த காட்சிகள் சமூக வலைத்தளங்களில் பரவி வருகிறது. இந்த யானை, அண்மையில் வனப்பகுதியில் இருந்து வழி தவறி ஊருக்குள் சுற்றி வந்தது குறிப்பிடத்தக்கது.

இதையும் படிங்க:மாலையாக மாறிய அரசு அடையாள அட்டைகள்.. திருச்சியில் நூதன முறையில் வேட்பு மனு தாக்கல்!