10 வாக்குகளுக்காக 175 கி.மீ பயணம் செய்த அதிகாரிகள்..கன்னியாகுமரி மேல் கோதையாரில் வாக்குப்பதிவு தீவிரம்! - LOK SABHA ELECTION 2024

Kanniyakumari Kodayar: கன்னியாகுமரி மேல் கோதையார் வாக்குச்சாவடியில் மொத்தம் 10 வாக்காளர்கள் மட்டுமே உள்ள நிலையில், இவர்கள் வாக்களிக்க தேர்தல் நடத்தும் அதிகாரிகள் சுமார் 175 கி.மீ பயணித்து, அவர்களது வாக்குகளை பதிவு செய்ய நடவடிக்கை எடுத்துள்ளனர்.

கன்னியாகுமரி:தமிழ்நாடு மற்றும் புதுச்சேரியில் நாடாளுமன்ற மக்களவைத் தேர்தல் இன்று காலை 7:00 மணி முதல் துவங்கி விறுவிறுப்பாக நடைபெற்று வருகிறது. அந்த வகையில், கன்னியாகுமரி நாடாளுமன்ற தேர்தல் மற்றும் விளவங்கோடு தொகுதிக்கான இடைத்தேர்தல் விறுவிப்பாக நடைபெற்று வருகிறது.

இதில், மாவட்டத்தின் முதல் வாக்குச்சாவடியான மேல் கோதையார் வாக்குச்சாவடியில் மொத்தம் 10 வாக்காளர்கள் மட்டுமே உள்ள நிலையில், இவர்கள் வாக்களிக்க தேர்தல் ஆணையம் சார்பில் மாவட்ட நிர்வாகம் தனி கவனம் செலுத்தி அவர்கள் வாக்குகளை பதிவு செய்து வருகிறது. கன்னியாகுமரி மாவட்டத்தில் உள்ள பேச்சிப்பாறை ஊராட்சியில் உள்ள 1ஆம் வார்டு பகுதியான மேல் கோதையார் பகுதியில் அமைந்துள்ள மாவட்டத்தின் முதல் வாக்குச்சாவடிக்கு வாக்குபதிவு இயந்திரங்கள் நேற்று கொண்டு செல்லப்பட்டன.

இங்குள்ள மின் நிலைய ஊழியர்களான 6 ஆண் வாக்காளர்கள் மற்றும் 4 பெண் வாக்காளர்கள் உட்பட மொத்தம் 10 வாக்காளர்களின் வாக்குகளை பதிவு செய்ய பேச்சிப்பாறையில் இருந்து செல்வதற்கு சாலை வசதி இல்லாததால், இந்த வாக்குச்சாவடிக்கு, திருவட்டாரில் இருந்து நாகர்கோவில் பணக்குடி, களக்காடு, அம்பாசமுத்திரம், மணிமுத்தாறு, மாஞ்சோலை வழியாக சுமார் 175 கிலோ மீட்டர் பயணித்து, மேல் கோதையாறு வாக்குச்சாவடிக்கு தேர்தல் நடத்தும் அலுவலர்கள் வாக்குப்பதிவு இயந்திரங்களுடன் இரு வாகனங்களில் நேற்று கொண்டு சென்றனர்.

இந்நிலையில், தற்போது மேல் கோதையாறில் உள்ள 10 வாக்காளர்களிடமும் வாக்குப்பதிவு செய்து கொண்டு நாளை அதிகாலையில் வாக்குப்பதிவு இயந்திரங்களுடன், தேர்தல் நடத்தும் அதிகாரிகள் திரும்ப உள்ளனர் என்பது குறிப்பிடத் தக்கது.

குமரி தொகுதி வாக்காளர் எண்ணிக்கை: குமரி மாவட்டத்தில் 7 லட்சத்து 76 ஆயிரத்து 127 ஆண் வாக்காளர்களும், 7 லட்சத்து 78 ஆயிரத்து 834 பெண் வாக்காளர்களும், 135 இதர வாக்காளர்களும் என மொத்தம் 15 லட்சத்து 55 ஆயிரத்து 96 வாக்காளர்கள் உள்ளனர். இடைத்தேர்தல் நடைபெரும் விளவங்கோடு சட்டமன்ற தொகுதியை பொருத்தமட்டில் 1 லட்சத்து 17 ஆயிரத்து 694 ஆண் வாக்காளர்களும், 1 லட்சத்து 19 ஆயிரத்து 685 பெண் வாக்காளர்களும், 3 இதர வாக்காளர்களும் என மொத்தம் 2 லட்சத்து 37 ஆயிரத்து 382 வாக்காளர்கள் உள்ளனர். குமரி நாடாளுமன்ற தொகுதியில் மொத்தம் ஆயிரத்து 698 வாக்குச்சாவடிகள் அமைக்கப்பட்டு வாக்குப்பதிவு நடைபெற்று வருகிறது.