தென்காசி: தென்காசி மாவட்டம், சங்கரன்கோவில் அருகே உள்ள கே.கரிசல்குளம் கிராமத்தில் சாலை வசதி, வடிகால், தெருவிளக்கு உள்ளிட்ட அடிப்படை வசதிகள் செய்து தராததைக் கண்டித்து கிராம மக்கள் போராட்டத்தில் ஈடுபட்டு வருகின்றனர். மேலும், அக்கிராமத்தின் அருகே உள்ள டாஸ்மாக்கை அகற்ற வேண்டும்.
இது சம்பந்தமாக பலமுறை மாவட்ட ஆட்சித் தலைவர், பஞ்சாயத்துத் தலைவர் உள்ளிட்ட அனைத்து துறை சார்ந்த அதிகாரியிடம் புகார் அளித்தும் எந்தவித நடவடிக்கையும் எடுக்காததால், இன்று நடைபெற்றுக் கொண்டிருக்கின்ற தென்காசி மக்களவைத் தொகுதிக்கான தேர்தலை கே.கரிசல்குளம் கிராமத்தைச் சேர்ந்த பெரும்பாலான கிராம மக்கள் புறக்கணித்து போராட்டத்தில் ஈடுபட்டு வருகின்றனர்.
1,045 ஓட்டுகள் உள்ள கிராமத்தில் வெறும் பத்து ஓட்டுகள் மட்டுமே பதிவாகியுள்ளது. வெறிச்சோடிக் காணப்படும் வாக்குச்சாவடி மையத்தில் செய்தி சேகரிக்கச் சென்ற செய்தியாளர்களைக் காவல்துறையினர் தடுத்து நிறுத்தியதால் காவல்துறையினருக்கும், செய்தியாளர்களுக்கும் இடையே வாக்குவாதம் ஏற்பட்டது. இதனைத் தொடர்ந்து, தேர்தல் நடத்தும் அலுவலரிடம் செய்தியாளர்கள் பேசியதைத் தொடர்ந்து, வாக்குச்சாவடி மையத்தில் செய்தியாளர்கள் செய்திகளைச் சேகரித்தனர்.