திருச்சி: திருச்சி சத்திரம் பேருந்து நிலையம் அருகே உள்ள மதிமுக திருச்சி தலைமை அலுவலகத்தில், திருச்சி எம்பியும், மதிமுக முதன்மை செயலாளருமான துரை வைகோ செய்தியாளர்களை சந்தித்தார்.
அப்போது பேசிய அவர், "நடிகர் விஜயை பொருத்தவரை எல்லாருக்கும் எல்லாம், சமூக நீதி, மதசார்பின்மை இதனை அரசியலுக்கு வரப்போவதற்கு முன்பே செய்தார் அதனை வரவேற்கிறேன். தற்போது இருக்கக்கூடிய அரசியலில் மதவாத பிரிவினைவாதிகளை எதிர்க்கும் இரண்டாவது அணியாக திராவிடம் இருக்கிறது. அதற்குப் பிறகு மூன்றாவது அணிக்கு வாய்ப்பு குறைவு தான்" என்றார்.
தொடர்ந்து பேசிய அவர், "தமிழகத்திற்கும் தமிழக மக்களுக்கும் நடிகர் விஜயின் சேவை தேவை என்ற நிலை உள்ளது. மதவாத சக்திகளுக்கு மறைமுகமாக வாய்ப்பு கொடுக்கக்கூடிய சூழல் ஏற்படக்கூடாது. எந்த சூழ்நிலையிலும் யோசித்து நிதானமாக முடிவு எடுக்க வேண்டும். யாரோ சொல்கிறார்கள் என்று முடிவெடுத்து மதவாத சக்திகளுக்கு ஆதரவாக போய் விடக்கூடாது" என பேசினார்.