"என் மனைவி குஷ்புவுக்குக் கூட ஆதரவாக நான் அரசியல் மேடை ஏறிப் பேசியது இல்லை" - நடிகர் சுந்தர்.சி! - lok sabha election 2024

Sundar.C Election Campaign In Vellore: என் மனைவி குஷ்புவுக்குக் கூட ஆதரவாக நான் அரசியல் மேடை ஏறிப் பேசியது இல்லை ஏ.சி.சண்முகத்திற்கு வந்து இருக்கிறேன் காரணம் அவர் பொதுமக்களுக்குச் செய்த உதவிகள் தான் என நடிகர் சுந்தர்.சி வேலூர் பிரச்சாரத்தில் பேசினார்.

வேலூர்:வேலூர் நாடாளுமன்றத் தொகுதியில் பாஜக சார்பில் தாமரை சின்னத்தில் போட்டியிடும் ஏ.சி.சண்முகத்திற்கு ஆதரவு கேட்டு இயக்குநர் சுந்தர்.சி, வேலூர் மாநகர் பகுதிகளான சங்கரன் பாளையம், சாய்நாதபுரம், விருபாட்சிபுரம், ஓட்டேரி, பாகாயம், மண்டித்தெரு, காந்திரோடு, உள்ளிட்ட பகுதிகளில் வாக்கு சேகரித்தார்.

அப்போது பேசிய அவர், " சினிமாவில் ரஜினி போன்ற எத்தனையோ ஹீரோக்கள் கூட வேலை பார்த்து இருக்கிறேன். ஆனால், என் வாழ்நாளில் முதல் முறையாக ஒரு நிஜ ஹீரோவுடன் வேலை பார்க்கிறேன் என்றால் அது ஏ.சி.சண்முகம் கூடத் தான். ஏனென்றால் எத்தனையோ உதவிகள், பொதுச் சேவைகள், மாணவர்களுக்கு இலவசமாகப் பள்ளி வகுப்பறைகள் கட்டிக் கொடுப்பது போன்ற சேவைகள்தான் அவரை ஒரு ஹீரோவாகக் காட்டுகிறது.

சிவபெருமான் உலக மக்களுக்குப் படி அளப்பது போன்று ஏ.சி.எஸ் அவர்கள் ஏழை எளிய மக்களுக்கு உதவி செய்கிறார். வேலூர் மக்கள் ஏ.சி.எஸ்ஸை வெற்றிபெறச் செய்து நாடாளுமன்றம் அனுப்பினால் அவர், மத்திய அமைச்சராகத் திரும்பி வந்து அனைத்தையும் பூர்த்தி செய்வார்.

என் மனைவி குஷ்புவுக்குக் கூட ஆதரவாக நான் அரசியல் மேடை ஏறிப் பேசியது இல்லை. ஏ.சி.சண்முகத்திற்கு வந்து இருக்கிறேன். காரணம் அவர் பொதுமக்களுக்குச் செய்த உதவிகள் தான்" என்று பேசினார்.

இதையும் படிங்க:"தேர்தல் பத்திர விவகாரத்தில் எதிர்க்கட்சிகள் பொய் பிரசாரம்.. அனைவரும் வருந்துவர்" - பிரதமர் மோடி! - Lok Sabha Election 2024