ஜாபர் சாதிக் வழக்கை கையில் எடுக்கிறதா டெல்லி என்ஐஏ?.. அடுத்தகட்ட நடவடிக்கை என்ன?

Jaffer Sadiq case update: போதைப்பொருள் கடத்தல் வழக்கில் கைது செய்யப்பட்டுள்ள ஜாபர் சாதிக்கின் வழக்கு தொடர்பான ஆவணங்களை டெல்லி தேசிய புலனாய்வு முகமை அதிகாரிகள் கேட்டுள்ளதாக தகவல் வெளியாகி உள்ளது.

சென்னை:டெல்லியில் 2,000 கோடி மதிப்புள்ள போதைப்பொருட்கள் கடத்தப்பட்ட வழக்கில், மூளையாகச் செயல்பட்டதாக தமிழ் திரைப்படத் தயாரிப்பாளரும், முன்னாள் திமுக நிர்வாகியுமான ஜாபர் சாதிக்கை கடந்த 9ஆம் தேதி டெல்லியில் வைத்து போதைப்பொருள் தடுப்புப் பிரிவு போலீசார் கைது செய்தனர்.

மேலும், ஜாபர் சாதிக்கை ஏழு நாட்கள் காவலில் எடுத்து மத்திய போதைப்பொருள் தடுப்பு பிரிவு அதிகாரிகள் தீவிர விசாரணை நடத்தி வருகின்றனர். இந்த நிலையில், ஜாபர் சாதிக்கின் போதைப்பொருள் கடத்தல் வழக்கு தொடர்பான ஆவணங்களை டெல்லி தேசிய புலனாய்வு முகமை அதிகாரிகள் கேட்டுள்ளதாக தகவல் வெளியாகி உள்ளது.

ஜாபர் சாதிக் தடை செய்யப்பட்டுள்ள ஏதேனும் அமைப்பினருக்கு பணம் கொடுத்து உதவி செய்துள்ளாரா என்ற கோணத்தில் விசாரணை நடத்துவதற்கான ஆவணங்களை கேட்டுள்ளதாக தகவல் வெளியாகி உள்ளது. தொடர்ந்து ஜாபர் சாதிக்கின் போதைப்பொருள் கடத்தல் வழக்கினை தேசிய புலனாய்வு முகமை அதிகாரிகள் கண்காணித்து வருவதாக கூறப்படுகிறது.

இந்நிலையில், என்சிபி அதிகாரிகளிடம் இருந்து பெறப்படும் ஆவணங்களை ஆய்வு செய்த பின்பு, தடை செய்யப்பட்ட அமைப்புகளுக்கு ஏதேனும் பணம் கொடுக்கப்பட்டிருந்தால், வழக்குப் பதிவு செய்து தேசிய புலனாய்வு முகமை அதிகாரிகள் இந்த வழக்கை கையில் எடுக்க வாய்ப்புள்ளதாக அதிகாரிகள் தரப்பில் தெரிவிக்கப்பட்டுள்ளது.

ஜாபர் சாதிக் வேறு ஏதேனும் தொழிலில் முதலீடு செய்து உள்ளாரா என்றும், ஆயுதம் கடத்தல் போன்ற விவகாரத்திலும் ஈடுபட்டு உள்ளாரா என்று கோணத்திலும் விசாரணை நடைபெற்று வருவதாகவும் தகவல் வெளியாகி உள்ளது. ஏற்கனவே சட்ட விரோத பணப்பரிமாற்ற வழக்கில் அமலாக்கத்துறை அதிகாரிகள் வழக்குப் பதிவு செய்து விசாரணை செய்ய உள்ள நிலையில், டெல்லி தேசிய புலனாய்வு முகமை அதிகாரிகள் ஆவணங்களை கேட்டிருப்பது குறிப்பிடத்தக்கது.

முன்னதாக, போதைப்பொருள் கடத்தலுக்கு உடந்தையாக இருந்த திருச்சியைச் சேர்ந்த சதா என்கிற சதானந்தம் என்பவரையும், நேற்று இரவு சென்னையில் வைத்து மத்திய போதைப்பொருள் தடுப்பு பிரிவுகள் கைது செய்து டெல்லி அழைத்துச் சென்றுள்ளனர்.

இந்நிலையில், இந்த வழக்கில் இதுவரை மொத்தம் ஐந்து பேர் கைதாகியுள்ள நிலையில், அவர்களிடம் மத்திய போதைப்பொருள் தடுப்பு பிரிவு அதிகாரிகள் தீவிர விசாரணை மேற்கொண்டு வருகின்றனர். மேலும், போதைப்பொருள் கடத்தல் மூலம் ஈட்டிய வருவாயை இவர்கள் சினிமா, கட்டுமானப் பணிகள், அரசியல் உள்ளிட்டவைகளுக்கு பயன்படுத்தியுள்ளதாக கூறப்படுகிறது.

இதையும் படிங்க:புதிய இந்தியத் தேர்தல் ஆணையர்களாக ஞானேஷ் குமார் மற்றும் சுக்பீர் சிங் சந்து!