கள்ளக்குறிச்சி மரணம்: பெற்றோரை இழந்த குழந்தைகளுக்கு 5 லட்சம், மாதந்தோறும் 5 ஆயிரம்.. முதல்வர் அறிவிப்பு! - kallakurichi parents death

tamilnadu cm relief fund: கள்ளக்குறிச்சி சம்பவத்தில் தாய், தந்தை இருவரையும் இழந்த குழந்தைகளுக்கு 18 வயது வரை மாத பராமரிப்புத் தொகையாக ரூ.5000 மற்றும் நிலையான வைப்புதொகையாக 5 லட்சம் வழங்கப்படும் என முதலமைச்சர் மு.க.ஸ்டாலின் அறிவித்துள்ளார்.

சென்னை: கள்ளக்குறிச்சி விவகாரம் தொடர்பாக. சட்டப்பேரவையில் முதலமைச்சர் மு.க.ஸ்டாலின் இன்று விரிவான உரை நிகழ்த்தியபோது முக்கியமான சில அறிவிப்பை வெளியிட்டார். அப்போது அவர், கள்ளக்குறிச்சி சம்பவத்தில் பெற்றோரை இழந்து தவிக்கும் குழந்தைகளுக்கு கூடுதலாக நிதி ஒதுக்கீடு செய்யப்படும் என தெரிவித்துள்ளார்.

அதன்படி, கள்ளக்குறிச்சி சம்பவத்தில் பாதிக்கப்பட்ட குழந்தைகளுக்கு மறுவாழ்வு அளிக்கவும் அவர்கள் எதிர்கால நலனை கருத்தில் கொண்டும் ஏற்கனவே அறிவிக்கப்பட்ட 10 லட்ச ரூபாய் நிதியோடு பின்வரும் நிவாரணங்கள் கூடுதலாக வழங்கப்படவுள்ளது.

''பெற்றோர் இருவரையோ அல்லது ஒருவரையோ இழந்து வாழும் குழந்தைகளுக்கு பட்டப்படிப்பு படிக்க கல்வி கட்டணம் மற்றும் விடுதி கட்டணம் உள்ளிட்ட அனைத்து செலவினமும் தமிழக அரசே ஏற்றுக் கொள்ளும்.

பெற்றோர் இருவரையும் இழந்து ஆதரவின்றி தவிக்கும் ஒவ்வொரு குழந்தையும் பாதுகாவலர் பராமரிப்பில் வளர அவர்கள் 18 வயது அடையும்வரை மாத பராமரிப்பு தொகையாக தலா 5000 ரூபாய் வழங்கப்படும்.

பெற்றோர் இருவரையும் இழந்த குழந்தைகளுக்கு உடனடி நிவாரண தொகையாக அவர்களின் பெயரில் 5 லட்சம் ரூபாய் முதலமைச்சரின் பொது நிவாரணத்தில் இருந்து நிலையான வைப்புத்தொகை வைக்கப்படும். அவர்கள் 18 வயது பூர்த்தி அடைந்தவுடன் வட்டியுடன் அவர்களுக்கு அந்த தொகை வழங்கப்படும்.

பெற்றோர் இருவரில் ஒருவரை இழந்து வாழும் குழந்தைகளுக்கு மூன்று லட்ச ரூபாய் தமிழக அரசு வழங்கும். பெற்றோர் இருவரை அல்லது ஒருவரை இழந்து வாடும் குழந்தைகளுக்கு அரசின் அனைத்து நலத்திட்ட உதவிகளும் முன்னுரிமை உடன் முதலில் வழங்கப்படும்.

பெற்றோர் இருவரையோ அல்லது ஒருவரையோ இழந்து வாடும் குழந்தைகளின் விருப்பத்திற்கேற்ப அரசு அல்லது அரசு நிதி பெறும் இல்லங்களிலோ, விடுதியிலோ சேர்க்கப்படுவார்கள். அவர்களது உயர் கல்வி கட்டணம், விடுதி கட்டணம் அனைத்தையும் அரசே ஏற்கும்'' என முதல்வர் அறிவித்துள்ளார்.

இதையும் படிங்க:கள்ளச்சாராய விவகாரம்: கருணாபுரத்தில் அடங்காத மரண ஓலம்; கள்ளக்குறிச்சி மக்களின் தற்போதைய மனநிலை என்ன?