மாணவி பாலியல் வன்கொடுமை வழக்கை சிபிஐக்கு மாற்ற வேண்டும்-எடப்பாடி பழனிசாமி வலியுறுத்தல்!

மாணவி பாலியல் வன்கொடுமை வழக்கில் குற்றம் சாட்டப்பட்டுள்ளவர் திமுகவைச் சேர்ந்தவராக இருப்பதாக செய்திகள் வெளிவந்துள்ளன. மாணவிக்கு நீதி கிடைக்க இந்த வழக்கை சிபிஐயிடம் ஒப்படைக்க வேண்டும் என எடப்பாடி பழனிசாமி கோரிக்கை விடுத்துள்ளார்.

சென்னை: ஞானசேகரன் திமுகவைச் சேர்ந்தவராக இருப்பதாக செய்திகள் வெளிவந்துள்ளன. இதையெல்லாம் பார்க்கின்ற பொழுது ஆளுங்கட்சியை சேர்ந்தவரை தப்பிக்க வைக்க இந்த காவல்துறை செயல்படுகிறது என்ற அச்சம் மக்களுக்கு ஏற்படுகிறது. நடுநிலையோடு பாதிக்கப்பட்ட மாணவிக்கு நீதி கிடைக்க வேண்டும் என்றால் இந்த வழக்கை சிபிஐ வசம் ஒப்படைக்க வேண்டும் என எடப்பாடி பழனிசாமி பழனிசாமி கோரிக்கை விடுத்துள்ளார்.

சார் என அழைக்கப்பட்டவர் யார்?: அதிமுக தலைமை அலுவலகத்தில் செய்தியாளர்களிடம் பேசிய அதிமுக பொது செயலாளரும், எதிர்கட்சி தலைவருமான எடப்பாடி பழனிசாமி, "தமிழ்நாட்டையே உலுக்க கூடிய அதிர்ச்சியான சம்பவம் அண்ணா பல்கலைக்கழகத்தில் நடந்திருக்கிறது. இந்திய அளவில் மிகச்சிறந்த கல்வி நிலையமாக அண்ணா பல்கலைக்கழகம் திகழ்கிறது. அண்ணா பல்கலைக்கழகம் என்று சொன்னால் தமிழகம் மட்டுமல்ல இந்தியா மட்டுமல்ல உலக அளவில் புகழ்மிக்க பல்கலைக்கழகமாக விளங்கிக் கொண்டிருக்கிறது.

பல்கலைக்கழக வளாகத்துக்குள் 23ஆம் தேதி இரவு 7.45 மணியளவில் நுழைந்த ஞானசேகரன் என்பவர் பல்கலைக்கழக மாணவர், மாணவி இருவரும் பேசிக்கொண்டிருக்கும் போது மாணவனை அடித்து உதைத்து விட்டு, அங்கிருந்து மாணவியை பலாத்காரமாக அழைத்துச் சென்றுள்ளார். அப்போது மாணவியை பாலியல் வன்கொடுமை செய்ய முயற்சி செய்திருக்கிறார்.அதோடு பாலியல் வன்கொடுமை செய்கின்ற செயல்பாட்டினை அவருடைய செல்போனில் படம் பிடித்து இருக்கிறார். அந்த நேரத்தில் ஞானசேகருக்கு செல்போன் அழைப்பு வந்ததாகவும் அவர் ஒருவரிடம் சார், சார் என்று பேசியதாகவும் அந்த மாணவி புகாரில் தெரிவித்து இருக்கிறார்.

அந்த சார் யார் என்பதை இதுவரை போலீசார் வெளிப்படுத்தவில்லை. அந்த மாணவி இது குறித்து காவல்துறையில் புகார் செய்திருக்கிறார். அந்த புகாரில் இதுவும் தெரிவிக்கப்பட்டிருக்கிறது..ஆனால் காவல் உயர் அதிகாரி அளித்த பேட்டியில், 'பாலியல் வன்கொடுமை செய்தது ஒருவர்தான். அவர் ஞானசேகரன் மட்டும் தான்,' என்று சொல்கிறார். ஞானசேகரன் சரித்திர பதிவேடு குற்றவாளி அவர் மீது 20க்கும்‌ மேற்பட்ட வழக்குகள் இருப்பதாக பத்திரிகையில் செய்தி வந்துள்ளது. சரித்திர பதிவேடு குற்றவாளி எப்படி தங்கு தடை இல்லாமல் அண்ணா பல்கலைக்கழகத்தில் நடமாட முடியும்? அதை எப்படி அனுமதித்தார்கள்.

அமைச்சர்களோடு ஞானசேகர் இருப்பதாக புகைப்படம் வந்திருக்கிறது..அதற்கு அமைச்சர் பல்வேறு காரணங்களை சொல்கிறார்.. திமுகவில் அந்த நபர் பொறுப்பில் இருப்பதாக பத்திரிகைகளில் செய்தி வந்து கொண்டிருக்கிறது. வழக்கு பதிவு செய்தவுடன் அவர் பெயர் உள்ள விளம்பர பேனர்கள், போஸ்டர்கள் எல்லாம் அகற்றப்படுவதாக செய்திகள் வருகிறது..

மாணவி புகாரில் குறிப்பிட்டுள்ள ஞானசேகரன், சார் என்று அழைத்த நபர் யார் என்பது குறித்து காவல்துறை அதிகாரிகள் மறைக்கிறார்கள். இது வன்மையாக கண்டிக்கத்தக்கது. ஆயிரக்கணக்கான மாணவர்கள் படிக்கும் அண்ணா பல்கலைக்கழக கல்லூரியில் ஞானசேகரன் எப்படி அடிக்கடி சுற்றி திரிந்து இருக்க முடியும்? எந்த பாதுகாப்பும் இல்லாத சூழ்நிலையில்தான் மாணவிகள் அண்ணா பல்கலைக்கழகத்தில் பொறியியல் படிப்பு படித்துக் கொண்டிருக்கிறார்களா? அவர்களுக்கு என்ன பாதுகாப்பு இருக்கிறது?

முரண்பட்ட கருத்து:இந்த சம்பவத்தால் மாணவர்களின் பெற்றோர் அச்சப்படுகிறார்கள். அரசை நம்பித்தான் பெற்றோர் தங்கள் பிள்ளைகளை அண்ணா பல்கலைத்தில் படிக்க அனுப்புகின்றனர். அண்ணா பல்கலைக்கழகத்தில் சுமார் 70 சிசிடிவி கேமரா பொருத்தப்பட்டிருப்பதாகவும், அதில் 56 சிசிடி கேமராக்கள் மட்டுமே வேலை செய்வதாகவும் செய்தி வருகிறது. மற்றவை ஏன் இயங்கவில்லை? ஒரு வெக்ககேடான செயல்.

அதிமுக ஆட்சியில் சட்டத்தின் ஆட்சி நடைபெற்றது. யார் தவறு செய்தாலும் காவல்துறையினர் உடனடியாக கைது செய்தார்கள்..23ஆம் தேதி ஞானசேகரன் இந்த சம்பவத்தில் ஈடுபட்டிருக்கிறார் 24ஆம் தேதி மாணவி புகார் செய்திருக்கிறார். புகார் செய்ததும் ஞானசேகரன் அழைத்து விசாரித்து இருக்கிறார்கள் உடனே விடுவித்து இருக்கிறார்கள்.

இதையும் படிங்க:ஆளுநரின் கீழ் செயல்படும் அண்ணா பல்கலை பாதுகாப்புக்கு என்ன நடவடிக்கை எடுத்தது?-திமுக கேள்வி!

100 என்ற உதவி எண்ணுக்கு வந்த புகாரின் பேரில் வழக்கு பதிவு செய்யப்பட்டதாக காவல் உயர் அதிகாரி சொல்கிறார். ஆனால் அந்த துறை அமைச்சர் புகார் வரவில்லை என்று சொல்கிறார். நேரடியாக காவல் நிலையத்தில் தான் அந்த மாணவி புகார் தெரிவித்தார் என்ற கருத்தை தெரிவிக்கிறார்.மாணவி தெரிவித்த கருத்துக்கும் அமைச்சர்கள் கூறியதற்கும் முரண்பட்ட கருத்து இருக்கிறது.

ஆளுநரிடம் புகார்: எனவே, இந்த வழக்கை சிபிஐயிடம் ஒப்படைக்க வேண்டும். இந்த வழக்கில் ஆளுங்கட்சியை சேர்ந்த நபர்கள் சம்பந்தப்பட்டிருப்பதாக பத்திரிகை செய்திகள் வருகின்றன. ஞானசேகரன் திமுகவைச் சேர்ந்தவராக இருப்பதாக செய்திகள் வெளிவந்துள்ளன. இதையெல்லாம் பார்க்கின்ற பொழுது ஆளுங்கட்சியை சேர்ந்தவரை தப்பிக்க வைக்க இந்த காவல்துறை செயல்படுகிறது என்ற அச்சம் மக்களுக்கு ஏற்படுகிறது. நடுநிலையோடு பாதிக்கப்பட்ட மாணவிக்கு நீதி கிடைக்க வேண்டும் என்றால் இந்த வழக்கை சிபிஐ வசம் ஒப்படைக்க வேண்டும்.

இது மட்டுமல்ல, சென்னை மாநகரை சுற்றி பல்வேறு பாலியல் வன்கொடுமைகள் நடைபெற்று வருகிறது..அண்ணாநகர் பகுதியில் பத்து வயது சிறுமி பாலியல் தொந்தரவு கொடுக்கப்பட்ட வழக்கில் உயர் நீதிமன்றமே தாமாக முன்வந்து இந்த வழக்கை விசாரித்து, வழக்கு உண்மையாக நடைபெற வேண்டும் பாதிக்கப்பட்டவர்களுக்கு நீதி கிடைக்க வேண்டும், சிபிஐ விசாரிக்க வேண்டும் என்று உத்தரவிட்டார்.

சிந்தாதிரிப்பேட்டையில் மனநலம் குன்றிய கல்லூரி மாணவியை 10க்கும் மேற்பட்டார் பாலியல் வன்கொடுமை செய்திருக்கிறார்கள். இந்த ஆட்சியில் பெண்களுக்கு பாதுகாப்பு கிடையாது. இன்றைக்கு தமிழகத்தில் குற்றவாளிகள் கொஞ்சம் கூட அச்சம் இல்லாமல் குற்றங்களில் ஈடுபடுகிறார்கள். ஸ்டாலின் மாடல் ஆட்சியில் குற்றவாளிகள் சுதந்திரமாக திரிகிறார்கள் .வேலியே பயிரை மேய்ந்த கதையாக தமிழ்நாடு நிலைமை இருக்கிறது. எஃப் ஐ ஆரில் மாணவி பெயர் வரக்கூடாது. எஃப் ஐ ஆர் எப்படி வெளியில் வந்தது? திமுக அரசின் மீது உடனடி நடவடிக்கை எடுக்க வேண்டும் என்று ஆளுநரை விரைவில் சந்தித்து புகார் அளிக்க இருக்கிறோம்,"என்றார்.

மேலும் பேசிய எதிர்க்கட்சித் தலைவர் எடப்பாடி பழனிசாமி, "மறைந்த முன்னாள் பிரதமர்மன்மோகன் சிங் எளிமையானவர், பொருளாதாரம் நிபுணர், அவர் நிதி அமைச்சராக இருந்த பொழுது அவருடைய திறமையால் இந்தியாவை பொருளாதார வீழ்ச்சியிலிருந்து மீட்டார்..மன்மோகன் சிங் பத்தாண்டு காலம் பிரதமராக இருந்து சிறப்பாக ஆட்சி புரிந்தார். .அவரை இழுந்து வாடும் அவரது குடும்பத்தாருக்கும் காங்கிரஸ் கட்சியை சேர்ந்த தலைவர்களுக்கும் நிர்வாகிகளுக்கும் தொண்டர்களுக்கும் ஆழ்ந்த வருத்தத்தை தெரிவித்துக் கொள்கிறேன்,"என்றார்.