"2026ஆம் ஆண்டு ஒரு புதிய அரசியல் களத்தின் புத்தாண்டு. நம்பிக்கையோடு இருங்கள் வெற்றி நிச்சயம்" என்று கூறிக்கொண்டு தனது உறையை முடித்துகொண்ட விஜய் மேடையின் கீழே அமர்ந்திருந்த தனது தாய் தந்தையிடம் ஆசி பெற்றார்.
TVK Conference Live: "2026ஆம் ஆண்டு ஒரு புதிய அரசியல் களத்தின் புத்தாண்டு" - விஜய் நம்பிக்கை!
தவெக மாநாட்டு அரங்கம் (Credit - ETV Bharat Tamil Nadu)
Published : Oct 27, 2024, 12:18 PM IST
விழுப்புரம்: நடிகர் விஜய் தனது அரசியல் கட்சியை பிப்ரவரி 2ஆம் தேதி தொடங்கினார். தமிழக வெற்றிக் கழகம் என்று பெயர் சூட்டப்பட்டுள்ள இக்கட்சிக்கு இன்று (அக்.27) தான் முதல் மாநில மாநாடுஎன்றாலும், பலம்பெறும் அரசியல் கட்சியின் மாநாடுபோல ஏற்பாடுகள் செய்யப்பட்டுள்ளது. விழுப்புரம் மாவட்டம் விக்கிரவாண்டியில் சென்னை - திருச்சி தேசிய நெடுஞ்சாலையில் அமைந்துள்ள வி.சாலை என்ற கிராமத்தில் 85 ஏக்கர் நிலத்தை மாநாடு நடத்துவதற்கு த.வெ.க கட்சியினர் தேர்வு செய்தனர். அக்டோபர் 4 ஆம் தேதி மாநாட்டிற்கான பணிகளை தொடங்கி, மாநாட்டிற்காக பந்தல், மேடை , விளக்குகள் அமைக்கும் பணிகளில் 500-க்கும் மேற்பட்ட தொழிலாளர்கள் கடந்த 20 நாட்களுக்கும் மேலாக முழு வீச்சில் ஈடுபட்டனர்.
மாநாடு நடைபெறக்கூடிய பகுதியில் வேலு நாச்சியார், பெரியார், அம்பேத்கர், காமராஜர், தமிழன்னை மற்றும் தமிழ் மூவேந்தர்களான சேர, சோழ, பாண்டியர் ஆகியோரின் கட் அவுட்களுடன் விஜயின் கட் அவுட் வைக்கப்பட்டுள்ளது. இது தவிர்த்து அழகு முத்துக்கோன், பெரும்பிடுகு முத்தரையர், வீரபாண்டிய கட்டபொம்மன், பூலித்தேவர், மருது சகோதரர்கள் உள்ளிட்டவர்களின் புகைப்படங்களும் வைக்கப்பட்டுள்ளது, அனைவரது கவனத்தையும் ஈர்க்கிறது.
இந்த நிலையில், இன்று (அக்.) மாலை நடைபெறும் மாநாட்டில் பங்கேற்பதற்கு, இன்று காலை முதலாக த.வெ.க தொண்டர்கள், விஜய் ரசிகர்கள் மற்றும் பொதுமக்கள் என ஏராளமானோர் தங்களது குடும்பங்களுடன் வந்துகொண்டிருக்கின்றனர். இதனால் மாநாடு நடைபெறும் பகுதியில் அதிக கூட்டம் காணப்படுகிறது.
LIVE FEED
தாய் தந்தையிடம் ஆசி பெற்ற விஜய்!
விஜய் வாய்ஸில் வெளியான கட்சி பெயரின் விளக்க காணொளி!
விஜய் வாய்ஸில் கட்சி பெயரின் விளக்க காணொளி வெளியானது. அதில், "நேர்மறை அர்த்தம், நேர்மறை அடர்த்தி, நேர்மறை அதிர்வு, நேர்மறை வலிமை இவை அனைத்தையும் ஒருசேர கொண்ட சொல் உள்ளது. அது என்றுமே தன்னுடைய தன்மையை இழக்காத சொல் அது. அந்த வார்த்தையை உச்சரிப்பவர்களை மட்டும் அல்லாது அதை கேட்கும் ஒட்டுமொத்த கூட்டதையும் உணச்சியோட உச்சத்தில் வைத்து, உற்சாகப்படுத்தும் சொல் அது. நமது மக்களின் நாடி நரம்புகளில் நானேற்றும் அந்த சொல்தான் வெற்றி. பல அர்த்தங்களைக் கொண்ட சொல்லான வெற்றி தான் நமது கட்சியின் மைய சொல்லாகவும் மந்திர சொல்லாகவும் அமைந்துள்ளது. நமது கட்சியின் முதல் வார்த்தை நமது மக்களுக்கான அடையாளமாக இருக்கவேண்டும் என்பதற்காக தேர்ந்தெடுக்கப்பட்டதுதான் தமிழகம். கட்சியின் மூன்றாவது வார்த்தையான கழகம் என்பதற்கு படைபயிளும் இடம் என்று அர்த்தம் உள்ளது. அந்தவகையில், நமது இளம் சிங்கங்கள் பயிலும் இடம்தான் நமது கட்சி. இந்த மூன்று வார்த்தைகளையும் கொண்டு அரசியலில் எழுந்துள்ள அணையா பெரும் சுடர்தான் தமிழக வெற்றிக் கழகம்" என்று விளக்கப்பட்டது
"த.வெ.க வென்றால் தமிழகத்தில் கூட்டணி ஆட்சி" - விஜய் உறுதி!
"தவெக வென்றால் தமிழகத்தில் கூட்டணி ஆட்சி அமையும். கூட்டணி கட்சிக்கு ஆட்சி அதிகாரத்தில் பங்கு அளிக்கப்படும். இங்கு மேடையில் பேசும்போது சில அரசியல்வாதிகளின் பெயர்களை சொல்லாமல் விட்டதற்கு காரணம் தில் இல்லை என்பது அல்ல. முன்பு சொன்னதுபோல நாங்கள் யாரையும் தாக்கி பேசுவதற்கோ, தரக்குறைவாக பேசுவதற்கோ அரசியலுக்கு வரவில்லை" - விஜய்
அவுங்க பாசிசம்னா? நீங்க என்ன பாயசமா? - விஜய் சரமாரி கேள்வி
"ஏ டீம், பி டீம் என்று முத்திரை குத்தி இந்த படையை வீழ்த்திவிட முடியாது. மக்களுக்காக நிற்பதுதான் எங்களுக்கான அரசியல். 2026ஆம் ஆண்டு தேர்தலில் 234 தொகுதிகளிலும் மக்கள் த.வெ.க-விற்கு வாக்களிப்பார்கள். களமிறங்கிவிட்டேன், இனி ஒருபோதும் பின்வாங்க மாட்டேன். அதிகாரத்தை கையில் வைத்துக்கொண்டு பிறரை அடிபணிய வைக்க மாட்டேன். இவர்களுக்கு எப்போது பார்த்தாலும் பாசிசம்.. பாசிசம்.. என்று மட்டும்தான் சொல்வார்கள். ஒற்றுமையாக இருக்கும் நமது மக்கள் மத்தியில் சிறுபாண்மை, பெறும்பாண்மை என்று ஒரு பிறிவினை பயத்த காட்டி ஃபுல் டைம்மா சீனபோடுரதே வேலையாபோச்சு. அப்போ அவுங்க பாசிசம்னா? நீங்க என்ன பாயசமா? நீங்க அவுங்களுக்கு சலச்சவங்களா? மக்கள் விரோத ஆட்சிய திராவிட மாடல் ஆட்சினு சொல்லி மக்களை ஏமாத்துரிங்க" - விஜய்
பெண்களை அரசியல் வழிகாட்டிகளாக ஏற்கும் முதல் அரசியல் கட்சி தவெக!
"பெண்களை அரசியல் வழிகாட்டிகளாக ஏற்கும் முதல் அரசியல் கட்சி நமது தமிழக வெற்றிக் கழகம் தான். வேலுநாச்சியார், அஞ்சலை அம்மாள் ஆகியோர்தான் எங்களது கொள்கை தலைவர்கள். அனைவருக்கும் ஒரு வேண்டுகோள், நம்மள பார்த்து யாரும் விசிலடிச்சான் குஞ்சுகள் என சொல்லிடக் கூடாது. படம் நடிச்சோமா நாலுகாசு சம்பாதிச்சு நாம நல்லா இருந்தோமா என்றுதான் ஆரம்பத்தில் இருந்தேன். ஆனா, நாம மட்டும் நல்லா இருக்க வேண்டும் என நினைப்பது சுயநலம். ஒரு லெவலுக்கு மேல காசு சேர்த்து என்ன செய்ய போறோம். நம்மல நல்லா வெச்சிகிடவுங்களுக்கு எதாவது நல்லது செய்யனும்னுதான் அரசியலுக்கு வந்தேன். இறங்கியாச்சு. இனி எதைப்பத்தியும் யோசிக்கக் கூடாது. பிறபொக்கும் எல்லா உயிருக்கும் என்று நாம் அறிவித்த போதே நம்முடைய எதிரி யார் என்று அறிவித்து விட்டோம். அப்போதே கதறல் சத்தம் கேட்டுச்சு. இந்த மாநாட்டுக்கு அப்புறம் இன்னமும் கதறல் அதிகரிக்கும்" - விஜய்
"சொல் முக்கியமல்ல செயல்தான் முக்கியம்" - உணர்ச்சிப் பெருக்கெடுத்த விஜய்!
த.வெ.க மாநாட்டில் தொடர்ச்சியாக பேசிய விஜய், "அறிவியல், தொழில்நுட்பம் தான் மாற வேண்டுமா? அரசியலும் இங்கு மாற வேண்டும். அரசியல் என்ற பாம்பை கண்டு பயமில்லை. நான், நீ, என்ற பாகுபாடெல்லாம் இல்லை. நாம் அனைவரும் ஒன்றே. சொல் முக்கியமல்ல செயல்தான் முக்கியம். எந்த நோக்கத்திற்காக அரசியலுக்கு வந்தோமோ அது நிறைவேறும் வரையில் நெருப்பாக்கத்தான் இருப்போம். அதற்காக இந்த வெறுப்பு அரசியல் எல்லாம். செய்ய தேவையில்லை. வலிமையை நிரூபிக்க அரசியல் நிலைப்பாடே முக்கியம். இங்கு சமரசத்திற்கு இடமில்லை" என்று உணர்ச்சிப் பெருக்கெடுக்க பேசினார்.
"பெரியார் சொன்ன அனைத்தையும் நாங்கள் முன்னெடுக்க போகிறோம்" - விஜய் தீர்க்கம்
த.வெ.க மாநாட்டில் பேசிய விஜய், "என் நெஞ்சினில் குடியிருக்கும் எல்லோருக்கும் என் உயிர் வணக்கங்கள். பெரியார் எங்கள் கொள்கை தலைவர். பெரியார் சொன்ன கடவுள் மறுப்பு கொள்கையை மட்டும் நாங்கள் கையில் எடுக்க போவதில்லை. எங்களுக்கு அதில் உடன்பாடும் இல்லை. யாருடைய கடவுள் நம்பிக்கைக்கும் நாங்கள் எதிரானவர்கள் இல்லை. அண்ணா கூறியபடி, ஒன்றே குலம் ஒருவனே தேவன் என்பதுதான் எங்கள் நிலைப்பாடு. ஆனாலும் பெண் கல்வி பெண்கள் முன்னேற்றம் சமூக சீர்திருத்தம் சமூக நீதி பகுத்தறிவு சிந்தனை, பெரியார் சொன்ன இவை அனைத்தையும் நாங்கள் முன்னெடுக்க போகிறோம்." என்று தெரிவித்தார்.
த.வெ.க செயல் திட்டங்கள்..
- ஆளுநர் பதவியை அகற்ற வேண்டும்
- மதுரையில் தலைமைச் செயலகத்தின் கிளை அமைக்கப்படும்
- சட்டமன்ற உறுப்பினர்கள் மற்றும் அமைச்சர்களுக்கு நடத்தை நெறிமுறைகள் வகுக்கப்படும்
- கல்வியை மாநில பட்டியலுக்கு கொண்டுவர நடவடிக்கைகள் மேற்கொள்ளப்படும்.
- காமராஜர் மாதிரி அரசுப் பள்ளிகள் மாவட்டந்தோறும் அமைக்கப்படும்.
- தமிழகம் முழுவதும் புதிய நீர் தேகங்கள் அமைக்கப்படும்.
- பனைத்தொழில் ஊக்குவிக்கப்படும்.
- பதநீர் தமிழ்நாட்டின் மாநில பாணமாக அறிவிக்கப்படும்.
- ஆவின் பாலகத்தில் கருப்பட்டி பால் வழங்கப்படும்.
- அரசு ஊழியர்கள் வாரத்திற்கு இரண்டு முறை கதர் ஆடை அணிய அறிவுறுத்தப்படும்.
- மணல் மற்றும் கனிமவள கொள்ளையை தடுக்க சிறப்பு பாதுகாப்பு சட்டம் உருவாக்கப்படும்.
- வர்ணாசிம கொள்கைகள் முற்றிலுமாக நிராகரிக்கப்படும்.
த.வெ.க கட்சியின் கொள்கைகள்..
- பிறபொக்கும் எல்லா உயிர்க்கும்.
- மொழி, இனம், சாதி, மதம் ஆகியவற்றிற்குள் மனித சமூகத்தை சுருக்கக் கூடாது.
- மக்களை பாகுபடுத்தாமல், அவர்களுக்கு சம உரிமைகளை வழங்க வேண்டும்.
- மத்திய மற்றும் மாநில அரசுகளின் மக்கள் விரோத செயல்களை எதிர்க்கப்படும்.
- விகிதாச்சார இட ஒதுக்கீடே உண்மையான சமூக நீதி என்று அமைக்கப்பட வேண்டும்.
- அனைத்து வகையிலும் ஆண்களும், பெண்களும் சமமாக கருதப்பட வேண்டும்.
- இருமொழி கொள்கையே த.வெ.க-வின் மொழிக்கொள்கையாக கருதப்படும்.
- மாநில தன்னாட்சிக்கு உட்பட்ட உரிமைகளை மீட்பது முக்கிய நோக்கமாக கொண்டு செயல்படும்.
- தமிழை வழக்காடு மொழியாக்குவது த.வெ.க-வின் முக்கிய கொள்கையாகும்.
- பகுத்தறிவு சார்ந்த சிந்தனைகள் மக்கள் மத்தியில் வளர்க்கப்படும்.
- பிற்போக்கு சிந்தனைகள் நிராகரிக்கப்படும்
- அரசு மற்றும் தனியார் துறைகளில் ஊழலற்ற நிர்வாகம் கடைப்பிடிக்கப்படும்.
- சுற்றுச்சூழல் மற்றும் இயற்கை வலங்கள் பாதுகாக்கப்படும்.
- போதையில்லா தமிழகம் உருவாக்கப்படும்.
கட்சியின் கொள்கைகள் வெளியீடு!
பிறபொக்கும் எல்லா உயிர்க்கும் என்ற தலைப்பில் வெளியான கட்சியின் கொள்கைகள் வெளியிடப்பட்டுள்ளது. இதில் பிறபொக்கும் எல்லா உயிர்க்கும் முதல் கோட்பாடாக உள்ளது.
கொள்கை விளக்கப் பாடலில் விஜய் வாய்ஸ்!
'வெற்றி.. வெற்றி..' என தொடங்கும் த.வெ.க கொள்கை விளக்கப் பாடல் வெளியிடப்பட்டது. இந்த கொள்கை விளக்கப் பாடலில் "தமிழக வெற்றிக் கழகம் தமிழ்நாட்டை உயர்த்தும் கழகம்" என்று விஜய் வாய்ஸ் இடம்பெற்றுள்ளது.
"வாழ்நாள் முழுவதும் தளபதிக்கு நன்றி கடன்பட்டிருக்கிறேன்" - புஸ்ஸி ஆனந்த்
த.வெ.க பொதுச் செயலாளர் புஸ்ஸி ஆனந்த் வரவேற்புரை அளித்தார். அப்போது, "வாழ்நாள் முழுவதும் தளபதிக்கு நன்றி கடன்பட்டிருக்கிறேன்" என்று குறிப்பிட்டு அனைவரையும் வரவேற்றுப் பேசினார்.
த.வெ.க கட்சியின் உறுதிமொழி!
த.வெ.க மாநாட்டில், "தமிழக அரசியலை அதிர வைக்க வந்திருக்கும் தமிழக வெற்றிக் கழகத்தின் ஈடு இணையற்ற தலைவர், தமிழக வெற்றிக் கழகம் பிறபொக்கும் எல்லா உயிர்க்கும்" என்று கூறி த.வெ.க கட்சியின் பொருளாளர் வெங்கட்ராமன் அக்கட்சியின் உறுதிமொழியை வாசித்தார்.
அந்த உறுதிமொழியில்,
- விடுதலைக்காகவும், மக்களின் உரிமைகளுக்காகவும், தமிழ் மண்ணிலிருந்து வீரத்துடன் போராடி உயிர் நீத்த எண்ணற்ற வீரர்களின் தியாகத்தை எப்போதும் போற்றுவேன்
- நமது அன்னை தமிழ் மொழியைக் காக்க உயிர்த்தியாகம் செய்த மொழிப்போர் தியாகிகளின் இலக்கை நிறைவேற்றும் வகையில் தொடர்ந்து பாடுபடுவேன்
- இந்திய அரசியலமைப்பு சட்டத்தின் மீதும், இறையாண்மை மீதும் நம்பிக்கை வைத்து, அனைவருடன் ஒற்றுமை, மதநல்லிணக்கம், சமத்துவம் ஆகியவற்றை பேணிக்காககும் பொறுப்புள்ள தனிமனிதாபிமானத்துடன் செயல்படுவேன்
- மக்களாட்சி, மதச்சார்பின்மை , சமூக நீதிப்பாதையில் பயணித்து என்றும் மக்கள் நல சேவகராக பணியாற்றுவேன் என உறுதியளிக்கிறேன்
- சாதி மதம் பாலினம், பிறந்த இடம் ஆகியவற்றின் பெயரில் உள்ள வேற்றுமைகளை களைந்து மக்களிடையே விழிப்புணர்வை ஏற்படுத்தி, அனைவருக்கும் சமவாய்ப்பு, சம உரிமை கிடைக்க பாடுபடுவேன்
- பிறபொக்கும் எல்லா உயிர்க்கும் என்ற சமத்துவ கொள்கையை கடைப்பிடிப்பேன்" என உறுதிமொழியேற்கப்பட்டது.
த.வெ.க தொண்டர்கள் உறுதிமொழியேற்பு!
தமிழ்த்தாய் வாழ்த்து பாடல் பாடப்பட்டதைத் தொடர்ந்து த.வெ.க கட்சியின் உறுதி மொழியை அக்கட்சியின் பொருளாளர் வெங்கட்ராமன் வாசிக்க அனைவரும் பின் தொடர்ந்து கூறினர்.
த.வெ.க கொடியை ஏற்றி வைத்தார் விஜய்!
தமிழக வெற்றிக் கழகத்தின் கட்சிக் கொடியை 100 அடி உயர கொடிக்கம்பத்தில் அக்கட்சியின் தலைவர் விஜய் ஏற்றி வைத்தார்
மொழிப்போர் தியாகிகளுக்கு மலர் தூவி மரியாதை..
இந்திய சுதந்திரப் போராட்ட வீரர்கள், சுதந்திரப் போராட்ட தியாகிகள் மற்றும் மொழிப்போர் தியாகிகள் ஆகியோரின் உருவப் படத்திற்கு மலர் தூவி மரியாதை செலுத்தினார் விஜய்
த.வெ.க மாநாட்டை அதிர வைத்த விஜயின் ரேம்ப் வாக்..!
மாநாட்டின் மேடையில் இருந்து தொண்டர்கள் நடுவே போடப்பட்டுள்ள இணைப்பு பாலத்தில் விஜய் ரேம்ப் வாக் செய்தபடி மக்கள் அனைவருக்கு வணக்கம் கூறினார். அப்போது, தொண்டர்கள் அளித்த கட்சி துண்டு அனைத்தையும் வாங்கி அணிந்துகொண்டார்
தவெக மாநாட்டு மேடையில் தோன்றினார் விஜய்...
மாநாடு மேடைக்கு வருகை தந்தார் தமிழக வெற்றிக் கழகத்தின் தலைவர் விஜய்
தளபதி கோஷம்!
இன்னும் சற்று நேரத்தில் மாநாடு மேடைக்கு விஜய் வருகைதரவுள்ள நிலையில், மாநாட்டுத் திடலில் "தளபதி... தளபதி..." என தொண்டர்கள் தொடர்ச்சியாக கோஷம் எழுப்பி வருகின்றனர்.
மேடையை அலங்கரித்த மயிலாட்டம்!
மயிலாட்டம், ஒயிலாட்டம், பொய்க்கால் குதிரை ஆட்டம், தேவராட்டம் என பல்வேறு ஆட்டங்களை பறை இசைக்கும், உருமி இசைக்கும் கலைஞர்கள் ஆடி மாநாட்டுக்கு வருகைதந்துள்ளவர்களை உற்சாகப்படுத்தி வருகின்றனர்.
பாரம்பரிய கலை நிகழ்ச்சியுடன் களைக்கட்டும் மாநாடு!
விஜயின் 50ஆவது படமான சுறா படத்தில் இடம்பெற்ற வெற்றிக் கொடி பாடல் ஒலிக்கப்பட்டதை அடுத்து தொண்டர்கள் அனைவரும் ஆரவாரம் செய்தனர். அதனைத் தொடர்ந்து, மாநாட்டு மேடையில் போர் பறையாட்டம் உள்ளிட்ட தமிழக நாடுப்புர கலை நிகழ்ச்சிகள் நடைபெற்று வருகின்றன.
தொடங்கியது த.வெ.க மாநாடு!
விஜயின் தமிழக வெற்றிக் கழகத்தின் முதல் மாநில மாநாடு தொண்டர்களின் ஆர்ப்பரிப்புகளுக்கு மத்தியில் த.வெ.க கட்சி பாடலுடன் தொடங்கியது.
விஜய்க்கு துணை முதலமைச்சர் உதயநிதி ஸ்டாலின் வாழ்த்து!
நடிகர் விஜய்க்கு துணை முதலமைச்சர் உதயநிதி ஸ்டாலின் வாழ்த்து கூறியுள்ளார்.
தயார் நிலையில் மருத்துவ முகாம்கள்!
தவெக மாநாட்டிற்கு 11 மருத்துவ முகாம்கள் உள்ளன. இதில் 300 மருத்துவர்கள் மற்றும் 25 ஆம்புலன்ஸ்கள் ஏற்பாடு செய்யப்பட்டுள்ளது. இவ்வாறு ஏற்பாடு செய்யப்பட்டிருக்கும் ஒவ்வொரு முகாம்களிலும் 50 நபர்களுக்கு மேல் சிகிச்சை பெற்றுள்ளனர். மேலும், அவர்கள் அனைவரும் பெரும்பாலும் அதிக வெயிலின் காரணமாகவே வருகின்றனர்.
சாலையில் ஸ்தம்பித்த வாகனங்கள்.. மாநாட்டிற்கு நடந்தே செல்லும் தொண்டர்கள்!
த.வெ.க மாநாட்டிற்கு திருச்சி - சென்னை சாலையில் வந்த வாகனங்கள் அனைத்தும் கடும் போக்குவரத்து நெரிசலால் விக்கிரவாண்டி சுங்கச்சாவடியில் முடங்கியது. இந்த நிலையில், சாலையின் அனைத்து திசைகளிலும் ஆங்காங்கே நிறுத்தப்பட்ட வாகனங்கள் மூலம் மாநாட்டிற்கு வந்த தொண்டர்கள், சாலை மார்க்கமாக சுங்கச்சாவடியில் இருந்து சுமார் 7கி.மீ தூரமுள்ள மாநாட்டு திடலுக்கு நடந்தே செல்கின்றனர்.
பைக் விபத்தில் உயிரிழந்த த.வெ.க தொண்டர்!
சென்னை சென்ட்ரல் மூர் மார்க்கெட் பகுதியிலிருந்து த.வெ.க மாநாட்டிற்கு இருசக்கர வாகனத்தில் புறப்பட்டு சென்ற இளைஞர்கள் இருவர் தேனாம்பேட்டை டிஎம்எஸ் மெட்ரோ ரயில் நிலையம் நோக்கி வந்து கொண்டிருந்தபோது, எதிர்த்திசையில் எம் சாண்ட் மணலுடன் வந்த லாரி ஒன்று எதிர்பாராத விதமாக இரு சக்கர வாகனம் மீது மோதி விபத்து ஏற்பட்டுள்ளது. இதில் ஒருவர் உயிரிழந்த நிலையில், மற்றொருவர் படுகாயங்களுடன் மருத்துவமனையில் அனுமதிக்கப்பட்டுள்ளார்.
விபத்தில் சிக்கிய த.வெ.க மாநாட்டிற்கு சென்ற தொண்டர்கள்!
சென்னை நன்மங்கலத்தில் இருந்து த.வெ.க மாநாட்டிற்கு செல்வதற்காக விழுப்புரம் நோக்கி சென்ற வேன் சேலையூர் சந்தோசபுரம் அருகே கவிழ்ந்து விபத்தில் சிக்கியது. இந்த விபத்தில் நல்வாய்ப்பாக வேனில் பயணித்த 11 பேர் சிறு காயங்களுடன் உயிர் தப்பிய நிலையில், விபத்துக்குள்ளான வேனின் ஓட்டுநர் மட்டும் படுகாயங்களுடன் மருத்துவமனையில் அனுமதிக்கப்பட்டுள்ளார்.
சென்னையில் இருந்து த.வெ.க மாநாட்டிற்கு வந்த தொண்டர் ரயில் விபத்தில் உயிரிழப்பு!
சென்னையில் இருந்து த.வெ.க மாநாட்டிற்கு செல்வதற்காக விழுப்புரத்திற்கு டிக்கெட் எடுத்த 2 பேர் விக்கிரவாண்டி தாண்டியதும் ரயிலிலிருந்து குதித்துள்ளனர். இதனால் படுகாயம் அடைந்த இருவர் மருத்துவமனையில் அனுமதிக்கப்பட்ட நிலையில் நிதிஷ் குமார் என்பவர் உயிரிழந்துள்ளார். இது குறித்த போலீசார் விசாரணையில், மாநாட்டு பந்தலின் மின் விளக்குகளை பார்த்ததும் உற்சாக மிகுதியில் குதித்ததாக தெரியவந்துள்ளது.
வெயிலால் பாதிக்கப்பட்ட 50-க்கும் மேற்பட்ட மக்கள்!
த.வெ.க மாநாட்டிற்கு 300 மருத்துவர்கள் கொண்ட 11 மருத்துவ முகாம்கள் மற்றும் 25 ஆம்புலன்ஸ் ஏற்பாடு செய்யப்பட்டுள்ளது. இந்த நிலையில், ஏற்பாடு செய்யப்பட்டிருக்கும் இந்த மருத்துவ முகாம்களில் தற்போது வரையில் 50 நபர்களுக்கும் மேல் சிகிச்சை பெற்றுள்ளனர். மேலும், அவர்கள் அனைவரும் பெரும்பாலும் அதிக வெயிலின் காரணமாகவே பாதிக்கப்பட்டு சிகிச்சை பெற்றதாக தெரிவிக்கப்பட்டுள்ளது.
மாநாட்டில் மயங்கி விழுந்த மாணவன்!
வேலூரிலிருந்து மாநாட்டில் பங்கேற்க வந்த பத்தாம் வகுப்பு படிக்கும் மாணவர் மாநாட்டு பந்தலில் திடீரென மயங்கி விழுந்துள்ளார். இந்த நிலையில், அந்த மாணவருக்கு அங்கிருந்த மருத்துவ குழுவினர் தீவிர சிகிச்சை அளித்து வருவதாக தெரிவிக்கப்பட்டுள்ளது.
சுட்டெரிக்கும் வெயிலிலும் விஜய்க்காக காத்திருக்கும் தொண்டர்கள்!
மாநாடு நடைபெறும் விக்கிரவாண்டி பகுதியில் வெயிலின் தாக்கம் அதிகம் இருப்பதால் மாநாட்டுக்கு வந்த தொண்டர்கள் உட்காரும் சேர்களை எடுத்து தலையில் கவிழ்த்துக் கொண்டும், துண்டு மற்றும் குடையை பிடித்தபடியும் அமர்ந்துள்ளன. இதுகுறித்து ஈடிவி பாரத் தமிழ்நாடு ஊடகத்திடம் பேசிய தொண்டர்கள், "வெயில் கடுமையாக இருந்தாலும் விஜய்க்காக இங்கு வந்துள்ளோம். வெயில், மழை பார்க்காமல் எவ்வளவு நேரம் ஆனாலும் இருந்து அவரை பார்த்துவிட்டு தான் செல்வோம்" என கூறினர்.
சிற்றுண்டிக்கு போட்டா போட்டி!
த.வெ.க மாநாட்டு பந்தலில் உணவு மற்றும் சிற்றுண்டிகள் வழங்கப்பட்டபோதிலும், சாலையின் இருபுறங்களிலும் உணவு மற்றும் தின்பண்டங்கள் விற்கப்பட்டு வருகின்றன. இந்த நிலையில், மாநாட்டில் வழங்கப்பட்ட சிற்றுண்டிகள் மற்றும் தண்ணீர் பாட்டில் வாங்க தொண்டர்கள் முண்டியடித்துக்கொண்டு போட்டி போட்டதால் சிறிது நேரம் பரபரப்பு ஏற்பட்டது.
தயார் நிலையில் உள்ள மருத்துவ குழு!
மாநாட்டு முகப்பின் முன்பாக ஏராளமான போலீசார் பாதுகாப்புக்காக குவிக்கப்பட்டுள்ளனர். மேலும், தொண்டர்களுக்கு உடல் நலக்குறைவு ஏற்பட்டால் அவர்களுக்கு உடனுக்குடன் சிகிச்சை அளிப்பதற்காக மருத்துவ குழுவும் தயார் நிலையில் உள்ளது.
"20 லட்சம் பேர் கூட மாநாட்டுக்கு வருவார்கள்" - த.வெ.க நிர்வாகிகள் பெருமிதம்!
உணவு வசதிகள் குறித்துஈடிவி பாரத் தமிழ்நாடு ஊடகத்திற்கு பேட்டியளித்த த.வெ.க நிர்வாகிகள், "மாநாட்டுக்கு 5 லட்சம் பேர் வருவார்கள் என்ற எதிர்பார்ப்புடன் அதற்கு ஏற்ற வகையில் உணவு ஏற்பாடு செய்யப்பட்டுள்ளது. மேலும், மிக்சர், பிஸ்கெட், தண்ணீர் பாட்டில் கொண்ட சிற்றுண்டி பாக்கெட்டுகள் தொண்டர்களுக்கு வழங்கப்படுகிறது. தொடர்ந்து வரும் தொண்டர்கள் எண்ணிக்கையை பார்க்கும்போது 20 லட்சம் பேர் கூட மாநாட்டுக்கு வருவார்கள் என்று தெரிகிறது. அதிகம் பேர் வந்தாலும் கூட அதனை சமாளிக்கும் வகையில் ஏற்பாடுகள் மேற்கொள்ளப்பட்டுள்ளன" என்று கூறினர்.
தவெக நிர்வாகிகள் பேட்டி (Credit - ETV Bharat Tamil Nadu)
கியூ.ஆர் கோட் மூலம் அட்டெண்டன்ஸ்!
தமிழக வெற்றிக் கழக மாநாட்டிற்கு வருகை தரும் தொண்டர்களின் எண்ணிக்கையை கியூ.ஆர் கோட் (QR Code) மூலம் பதிவு செய்ய ஏற்பாடுகள் செய்யப்பட்டுள்ளன. மாநாட்டிற்கு வந்தவர்களின் விவரங்கள் மற்றும் வருகையைப் பதிவு செய்வதற்காக இந்த ஏற்பாடுகள் செய்யப்பட்டுள்ளதாக தெரிவிக்கப்பட்டுள்ளது. மேலும், இதற்காக மாநாடு அரங்கம் முழுவதும் ஆங்காங்கே கியூ.ஆர் கோட்கள் வைக்கப்பட்டுள்ளது.
மாநாட்டு பந்தலில் குவிந்து வரும் தொண்டர்கள்!
விக்கிரவாண்டியில் நடிகர் விஜயின் த.வெ.க முதல் மாநில மாநாட்டில் பங்கேற்பதற்காக ஏராலமான தொண்டர்கள் விடிய விடிய மாநாடு நடைபெறும் அரங்குக்கு த.வெ.க கொடிகளை கட்டியபடி இருசக்கர வாகனங்கள், கார்கள், வேன்கள், பேருந்துகளில் வருகை தந்தபடி உள்ளனர்.