சிவகங்கை: கீழடியில் கடந்த 2015ஆம் ஆண்டு மத்திய தொல்லியல் துறை சார்பில் நதிக்கரை நாகரீகம் பற்றி அறிய அகழாய்வு பணிகள் தொடங்கின. இதில் 2600 ஆண்டுகளுக்கு முன்பு வாழ்ந்த மக்கள் பயன்படுத்திய கண்ணாடி மணிகள், சூது பவள மணிகள், மண்பாண்டங்கள், சில அணிகலன்களின் பாகங்கள், விளையாட்டு பொருட்கள், ஓடுகள் உள்ளிட்ட பொருட்கள் கிடைத்தன.
நகர நாகரீகத்திற்கு இணையான வகையில் வாழ்ந்திருப்பது அவர்கள் பயன்படுத்திய பொருட்களில் இருந்து கண்டறிய முடிந்தது. கீழடி அகழாய்வில் கிடைத்த பொருட்கள் 2600 ஆண்டுகளுக்கு முன் வாழ்ந்த மக்கள் பயன்படுத்தியது என ஆய்வுகள் மூலம் தெரிய வந்துள்ளது. இதனையடுத்து கீழடியில் உலக தரம் வாய்ந்த அருங்காட்சியகம் கட்டப்பட்டு சீப்பு, வரிவடிவ எழுத்துகள், பானை ஓடுகள், தங்க காதணிகள் உள்ளிட்ட 13 ஆயிரத்து 344 பொருட்கள் ஆறு கட்டட தொகுதிகளில் தனித்தனியே காட்சிப்படுத்தப்பட்டுள்ளன.
கடந்தாண்டு மார்ச் மாதம் திறக்கப்பட்ட அருங்காட்சிகத்தை காண தினசரி ஏராளமான சுற்றுலா பயணிகள் வந்து செல்கின்றனர். இந்த நிலையில், நேற்று அருங்காட்சியகத்தை காண அமெரிக்கா, மியான்மர், பிலிப்பைன்ஸ், கொரியா, ஜப்பான், தாய்லாந்து, கம்போடியா, சிங்கப்பூர் உள்ளிட்ட நாடுகளில் இருந்து பத்து பேர் கொண்ட கல்வியாளர்கள் அடங்கிய குழு வந்திருந்தது
பல்வேறு பல்கலைக்கழகங்களில் பேராசிரியர்களாக பணியாற்றும் இவர்கள் இந்தியாவின் கல்வி முறை, மக்களின் பழக்க வழக்கங்கள், வாழ்வியல் முறை உள்ளிட்டவைகள் பற்றி அறிந்து கொள்வதற்காக ஒரு மாத கால பயணமாக இந்தியா வந்துள்ளனர். அதனிடையே கீழடி அருங்காட்சியகத்தை பற்றி கேள்விப்பட்டு, தமிழ்நாடு சுற்றுலா வளர்ச்சி கழகம் மூலமாக அருங்காட்சியகத்தை கண்டு ரசித்தனர்.