சென்னை: சூர்யா நடித்துள்ள கங்குவா திரைப்படம் இன்று உலகம் முழுவதும் பிரமாண்டமான முறையில் தமிழ், தெலுங்கு, மலையாளம், கன்னடம், ஹிந்தி ஆகிய மொழிகளில் வெளியாகியுள்ளது. ஸ்டுடியோ கிரீன் ஞானவேல் ராஜா தயாரிப்பில் சிவா இயக்கத்தில் சூர்யா, பாபி தியோல், திஷா பதானி உள்ளிட்ட பலர் நடித்துள்ள திரைப்படம் 'கங்குவா'. பீரியட் டிராமாவாக உருவாகியுள்ள கங்குவா திரைப்படத்திற்கு தேவி ஸ்ரீபிரசாத் இசையமைத்துள்ளார்.
சூர்யா திரை வாழ்வில் அதிக பட்ஜெட் கொண்ட திரைப்படமாக ’கங்குவா’ உருவாகியுள்ளது. இத்திரைப்படம் அறிவிக்கப்பட்டது முதல் சிவா இயக்கத்தில் இவ்வளவு பிரமாண்ட படமா என ரசிகர்கள் ஆச்சர்யத்தில் இருந்தனர். சூர்யா கங்குவா, ஃபிரான்சிஸ் என இரட்டை வேடங்களில் இப்படத்தில் நடித்துள்ளார். மேலும் கங்குவா படத்தின் டீசர், டிரெய்லர் ஆகியவை மேலும் எதிர்பார்ப்பை அதிகரிக்கச் செய்தது.
சூர்யா நடிப்பில் திரையரங்குகளில் வெளியான கடைசி திரைப்படம் ‘எதற்கும் துணிந்தவன்’. அதற்கு பிறகு ’விக்ரம்’ படத்தில் சூர்யா நடித்த ரோலக்ஸ் கேரக்டர் மாபெரும் வரவேற்பை பெற்றது. இந்நிலையில் இரண்டு வருடங்களுக்கு பிறகு பிரமாண்டமான சூர்யா திரைப்படம் திரையரங்குகளில் இன்று வெளியாகியுள்ளது. கங்குவா வெளியீட்டை முன்னிட்டு திரையரங்குகளில் ரசிகர்கள் அதிகாலை முதலே கொண்டாடி வருகின்றனர்.