சென்னை: ஸ்டார் மூவிஸ் ப்ரீத்தி தியாகராஜன் தயாரிப்பில், இயக்குநர் தியாகராஜன் இயக்கத்தில் நடிகர் பிரசாந்த் நடித்துள்ள திரைப்படம் 'அந்தகன்'. இப்படம் இந்தியில் ஆயூஷ்மான் குரானா நடிப்பில் வெளியான அந்தாதூன் படத்தின் ரீமேக் ஆகும். கடந்த 2019ஆம் ஆண்டு தொடங்கிய இப்படத்தின் படப்பிடிப்பு கரோனா உள்ளிட்ட காரணங்களால் தாமதமானது. இந்நிலையில், இப்படம் வருகிற ஆகஸ்ட் 15ஆம் தேதி வெளியாக உள்ளது.
இப்படத்தில் பிரசாந்த், கார்த்திக், ப்ரியா ஆனந்த், ஊர்வசி உள்ளிட்டோர் நடித்துள்ளனர். இப்படத்தின் புரோமோ பாடலை நடிகர் விஜய் வெளியிட்டார். அந்தகன் படத்தின் புரோமோ பாடல் வெளியீடு சென்னையில் நடைபெற்றது. இந்த நிகழ்ச்சியில் நடிகர்கள் பிரசாந்த், தியாகராஜன், பெசன்ட் ரவி, இயக்குநர் கே.எஸ்.ரவிக்குமார், நடிகைகள் பிரியா ஆனந்த், ஊர்வசி, வனிதா விஜயகுமார் ஆகியோர் கலந்து கொண்டனர்.
இந்த நிகழ்ச்சியில் பேசிய நடிகர் பிரசாந்த், "முதலில் புரோமோ பாடல் ரிலீஸ் செய்த நடிகர் விஜய்க்கு நன்றி. இந்த படத்திற்கு நிறைய வேலை செய்துள்ளோம். ஒவ்வொரு கதாபாத்திரத்திற்கும் தகுந்த நடிகர்களைப் பார்த்து நடிக்க வைத்துள்ளோம். படம் பார்த்தவர்கள் நன்றாக இருந்தது என்று சொன்னதாக கூறியுள்ளனர். ரசிகர்கள் நீங்கள் காட்டிய அன்பும், ஆதரவுக்கும் நன்றி என்றார்.
நான் நிறைய இயக்குநர்களுடன் வேலை செய்து இருக்கிறேன். ஆனால், இந்த படத்தில் நடிக்கும் போது எனது தந்தை தியாகராஜனுடன் சேர்ந்து வேலை செய்தது சந்தோஷமாக உள்ளது. பின்னர் செய்தியாளர்களின் கேள்விக்கு பதிலளித்த பிரசாந்த், நிறைய படங்கள் சிம்ரனுடன் நடித்துள்ளீர்கள். இந்த படத்தில் கெமிஸ்ட்ரி எப்படி என்ற கேள்விக்கு, கெமிஸ்ட்ரி மாதிரி தான் நன்றாக இருந்தது என்றார்.