ராகுல் காந்தியின் குடியுரிமை தொடர்பாக நிலைப்பாடு என்ன?-மத்திய அரசுக்கு டெல்லி உயர் நீதிமன்றம் கேள்வி

புதுடெல்லி உயர் நீதிமன்றத்தின் தலைமை நீதிபதி பொறுப்பு வகிக்கும் நீதிபதி பக்ரு மற்றும் நீதிபதி கெடேலா ஆகியோர் கொண்ட அமர்வு, ராகுலின் குடியுரிமை குறித்து என்ன நிலைப்பாடு என்று மத்திய அரசுக்கு கேள்வி உள்ளது.

புதுடெல்லி:மக்களவை எதிர்க்கட்சித் தலைவர் ராகுல் காந்தியின் குடியுரிமை குறித்து பாஜக தலைவர் சுப்ரமணியன் சுவாமி தாக்கல் செய்துள்ள மனு மீது மத்திய அரசின் உள்துறை அமைச்சகம் கருத்துத் தெரிவிக்க வேண்டும் என டெல்லி உயர் நீதிமன்றம் கேட்டுள்ளது.

புதுடெல்லி உயர் நீதிமன்றத்தின் தலைமை நீதிபதி பொறுப்பு வகிக்கும் நீதிபதி பக்ரு மற்றும் நீதிபதி கெடேலா ஆகியோர் கொண்ட அமர்வு, ராகுல் காந்தி குடியுரிமை தொடர்பான விவகாரத்தில் தொடர்புடைய மத்திய அரசின் அதிகாரிகளிடம் அரசின் நிலைப்பாட்டை பெற்று நீதிமன்றத்தில் தெரிவிக்கும்படி மத்திய அரசின் வழக்கறிஞருக்கு உத்தரவிட்டது.

"இந்த விவகாரத்தில் எந்த ஒரு உத்தரவையும் பிறப்பிக்கும் முன்பு, அரசு வழக்கறிஞரிடம் இருந்து அரசின் நிலையை அறிய விரும்புகின்றோம்,"என வாய்மொழி உத்தரவில் குறிப்பிட்டனர். வழக்கு தொடுத்திருக்கும் சுப்ரமணியம் சுவாமி, சம்பந்தப்பட்ட தரப்பினருக்கு நோட்டீஸ் அனுப்பும்படி கோரிக்கை விடுத்தார். இதையடுத்து கருத்துத் தெரிவித்த நீதிபதிகள்,"அவர்களின் (மத்திய அரசு) நிலைப்பாடு என்ன என்பதை பார்க்க வேண்டும். அதன் பின்னர், தேவைப்பட்டால் அவர்களின் பதில் பெறப்படும்,"என்று கூறினர்.

இதனைத்தொடர்ந்து இந்த வழக்கு அடுத்த ஆண்டு ஜனவரி 13ஆம் தேதிக்கு ஒத்திவைக்கப்பட்டது. இந்த நிலையில் சுப்ரமணியன் சுவாமி சார்பாக ஆஜரான வழக்கறிஞர் சத்யா சபர்வால், "கடந்த 2019ஆம் ஆண்டு ஆகஸ்ட் 6ஆம் தேதி, அமைச்சகத்துக்கு கடிதம் எழுதப்பட்டது. அதில், தாம் பிரிட்டிஷ் பாஸ்போர்ட் வைத்திருப்பதாகவும் பிரிட்டிஷ் அரசிடம் தாமாக முன் வந்து தாம் ஒரு பிரிட்டிஷ் குடியுரிமை பெற்றவர் என்று ராகுல் காந்தி கூறியதாக," சுட்டிக்காட்டப்பட்டுள்ளது.

இதையும் படிங்க:ஐஐஎம் போட்டியில் சாதித்த பெண் ஆட்டோ ஓட்டுநர்கள்; இவர்களின் பிசினஸ் மாடல் என்ன?

இதனிடையே இது குறித்து மனுவில் கூறியுள்ள சுப்ரமணியன் சுவாமி, "இந்திய குடியுரிமையும் வைத்திருக்கும் ராகுல் காந்தி அரசியல் சட்டத்தின் பிரிவு 9ன் கீழான குடியுரிமை சட்டத்தை மீறியிருக்கிறார். எனவே அவரது இந்திய குடியுரிமையை பறிக்க வேண்டும். தமது புகாரின் நிலை குறித்து உள்துறை அமைச்சகத்துக்கு பல கோரிக்கைகள் முன் வைத்துள்ளேன். இது குறித்து எந்த நடவடிக்கையும் எடுக்கப்படவில்லை, அது குறித்து தமக்கு தெரிவிக்கப்படவிலலை,"என்றும் குறிப்பிட்டுள்ளார்.

டெல்லி உயர் நீதிமன்றத்தில் இன்று நடைபெற்ற விசாரணையின் போது இது போன்ற வழக்கு ஒன்றை அலகாபாத் உயர் நீதிமன்றத்தில் ஏற்கனவே தாக்கல் செய்திருக்கும் கர்நாடகா பாஜக நிர்வாகி விக்னேஷ் ஷிஷிர், அந்த வழக்கின் முன்னேற்றம் குறித்து நீதிமன்றத்தில் தெரிவித்தார்.

இதனிடையே இந்த வழக்கில் அவரையும் இணைந்து கொள்ளும்படி டெல்லி உயர் நீதிமன்றம் கூறியது.மேலும் அலகாபாத் உயர் நீதிமன்றத்தில் தாக்கல் செய்யப்பட்டுள்ள பொது நல வழக்கில் நேரிடும் முன்னற்றங்கள் குறித்து அபிடவிட் தாக்கல் செய்யும்படியும் டெல்லி உயர் நீதிமன்றம் தெரிவித்துள்ளது. இதற்கிடையே இது குறித்து கருத்துத் தெரிவித்துள்ள சுப்ரமணியன் சுவாமி, அலகாபாத் உயர் நீதிமன்றத்தில் நிலுவயில் இருக்கும் விஷயத்துடன் இது தொடர்புடையது அல்ல. இரண்டின் கோரல்களும் வித்தியாசமானவை என்று கூறியுள்ளார். சுப்ரமணியன் சுவாமியின் வழக்கு,பன்முகத்தன்மை மற்றும் இணையான நடவடிக்கைகளுக்கு வழிவகுப்பதாக ஷிஷிர் கூறியுள்ளார்.