மைசூர் தசரா கொண்டாட்டம்: கவர்ச்சிகரமான காட்சிகளால் ஈர்க்கப்பட்ட சுற்றுலாப் பயணிகள்!

மைசூர் தசரா கொண்டாட்டத்தின் ஒரு பகுதியாக கண்கவர் ஊர்வலம் நடத்தப்பட்டது. இதில் கடந்து சென்ற பல்வேறு காட்சிகளைக் கண்டு பொதுமக்கள் ஆனந்த முழக்கங்களை எழுப்பினர்.

கர்நாடகம்: தமிழகம் மட்டுமின்றி இந்தியா முழுவதும் தசரா பண்டிகை பல்வேறு பெயர்களால் கொண்டாடப்படுகிறது. தசரா என்றாலே கர்நாடகா மாநிலம் மைசூருவுக்கு தனி இடம் உண்டு. தேவி பார்வதி சாமுண்டீஸ்வரி அவதாரம் எடுத்தி மகிஷன் என்ற அரக்கனை அழித்தற்காக இவ்விழா எடுக்கப்படுகிறது. விஜய நகர மன்னர்கள் ஆட்சி காலத்தில் இருந்தே இங்கு தசரா விழா வெகு விமரிசையாக கொண்டாடப்பட்டு வருகிறது.

நாடு சுதந்திரம் அடைந்த பிறகு தசரா பண்டிகை ஆண்டுதோறும் கர்நாடக அரசின் சார்பில் அரசு விழாவாக பிரமாண்டமாக கொண்டாடப்படுகிறது. தசரா பண்டிகையின் முதல் நாள் மைசூர் உடையார் வம்ச மன்னர் சாமுண்டீஸ்வரி அம்மனை வணங்கி சிறப்பு பூஜைகள் செய்து விழாவினை தொடங்கி வைப்பார். தசராவின் ஒன்பது நாட்களும் சிறப்பு பூஜைகளும், கொண்டாட்டங்களும், கலை நிகழ்ச்சிகளும் மைசூரில் நடக்கும்.

விழாவின் கடைசி நாளான விஜய தசமி அன்று ஜம்பு சவாரி எனப்படும் யானைகள் அணிவகுப்பு நடைபெறும். அதில் அலங்கரிக்கப்பட்ட தலைமை யானையின் மீது சாமுண்டீஸ்வரி அம்மன் 750 கிலோ எடை கொண்ட தங்க மண்டபத்தில் பவனி வரும் நிகழ்வு நடைபெறும். அதன் பின் வான வேடிக்கை, நடன நிகழ்ச்சிகள், இசை நிகழ்ச்சிகள், பஞ்சின கவாயத்து என்ற தீப ஒளி அணிவகுப்புகள் நடைபெறும்.

அந்த வகையில் 414வது ஆண்டாக தசரா விழா கடந்த 3ஆம் தேதி தொடங்கியது. இதனை முன்னிட்டு எப்போதும் போல மைசூர் மாநகரம் விழாக்கோலம் பூண்டது. விழாவின் கடைசி நாளான நேற்று மைசூரு பாஜக எம்.பியும்.,மைசூரு மன்னருமான யதுவீர் அரண்மனை வளாகத்தில் உள்ள பன்னி மரத்திற்கு பூஜை செய்தார். அதன் பின் ஜம்பு சவாரி எனப்படும் யானை ஊர்வலம் நடைபெற்றது. தங்க அம்பாரியில் பவனி வந்த சாமுண்டீஸ்வரி அம்மன், அங்கு கூடியிருந்த லட்சக்கணக்கான பக்தர்களுக்கு அருள்பாலித்தார்.

இதையும் படிங்க:சீதையைத் தேடிச் செல்வது போல சிறை கைதிகள் எஸ்கேப்.. ராமலீலா நாடகத்தில் நடந்த ட்விஸ்ட்..!

அதன் பின் நடைபெற்ற கண்கவர் நிகழ்ச்சிகளை பொதுமக்களும், சுற்றுலாப் பயணிகளும் ஆவலுடன் கண்டுகளித்தனர். மைசூர் பட்டுகளைத் தயாரிக்கும் கர்நாடக பட்டுத் தொழில் கழகம் வெளியிட்ட உண்மையான ஜரிகை புடவைகளின் காட்சிகளை சித்தரிக்கும் காட்சிப் படமும், மைசூர் சந்தன சோப்பு, சந்தனக் குச்சிகள் மற்றும் கலைப்படைப்புகளை சித்தரிக்கும் கர்நாடக சோப் மற்றும் டிடர்ஜென்ட்ஸ் லிமிடெட் நிறுவனத்தின் காட்சிப் படமும் பார்வையாளர்களுக்கு ஆர்வத்தைத் தூண்டியது.

ராணுவத்தின் பைக் ஸ்டண்ட் பார்வையாளர்களை பிரமிப்பில் ஆழ்த்தியது. பைக் மீது ஏறி நின்று உடற்பயிற்சி செய்வது, ஒற்றை காலில் பயிற்சிகள் செய்வது உள்ளிட்ட பல்வேறு செயல்களுடன் பைக்குகளை மின்னல் வேகத்தில் ஓட்டி காட்டி அசத்தினர். நகர ஆயுத படை, மாவட்ட ஆயுத படை, ஊர்க்காவல் படை உள்ளிட்ட 18 படையினர் நடத்திய அணிவகுப்பு கவனத்தை ஈர்த்தது. தேசிய கொடி, சந்திரயான், சூரிய குடும்பம், உலகம், இந்தியா, கர்நாடக வரைபடம், திமிங்கலம், கழுகு, புலி உள்ளிட்டவற்றை ட்ரோன்கள் மூலம் காட்சிப்படுத்தினர்.

300க்கும் மேற்பட்ட கலைஞர்கள் பல்வேறு பாடல்களுக்கு நடனமாடி பார்வையாளர்களை மகிழ்வித்தனர். யட்சகானம், பஞ்சாபி நடனம், பழங்குடியினர் நடனம், புலி குனிதா, மேற்கத்திய நடனம், பரத நாட்டியம் உள்ளிட்ட நடன நிகழ்ச்சிகள் அரங்கேறின.