ਨਵੀਂ ਦਿੱਲੀ:ਭਾਰਤੀ ਉਦਯੋਗਪਤੀ ਅਤੇ ਮਹਿੰਦਰਾ ਗਰੁੱਪ ਦੇ ਚੇਅਰਮੈਨ ਆਨੰਦ ਮਹਿੰਦਰਾ ਨੇ ਮੰਗਲਵਾਰ ਨੂੰ ਭਾਰਤੀ ਪੈਰਾ-ਤੀਰਅੰਦਾਜ਼ ਅਤੇ ਹਾਲ ਹੀ ਵਿੱਚ ਅਰਜੁਨ ਪੁਰਸਕਾਰ ਜੇਤੂ ਸ਼ੀਤਲ ਦੇਵੀ ਨੂੰ 'ਮਹਿੰਦਰਾ ਸਕਾਰਪੀਓ ਐਨ' ਗਿਫਟ ਕੀਤੀ। ਆਨੰਦ ਮਹਿੰਦਰਾ ਨੇ ਸ਼ੀਤਲ ਨੂੰ ਇਕ ਕਾਰ ਗਿਫਟ ਕਰਨ ਦਾ ਵਾਅਦਾ ਕੀਤਾ ਸੀ, ਜਿਸ ਨੂੰ ਉਨ੍ਹਾਂ ਨੇ ਪੂਰਾ ਕੀਤਾ। ਉਨ੍ਹਾਂ ਪੈਰਾ ਐਥਲੀਟ ਦੇ ਹੌਂਸਲੇ ਅਤੇ ਦ੍ਰਿੜ ਇਰਾਦੇ ਦੀ ਵੀ ਸ਼ਲਾਘਾ ਕੀਤੀ। ਪਿਛਲੇ ਸਾਲ ਸ਼ੀਤਲ ਨੇ ਪੈਰਿਸ ਪੈਰਾਲੰਪਿਕ ਵਿੱਚ ਤੀਰਅੰਦਾਜ਼ੀ ਦੇ ਮਿਸ਼ਰਤ ਟੀਮ ਕੰਪਾਊਂਡ ਮੁਕਾਬਲੇ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ।
ਆਨੰਦ ਮਹਿੰਦਰਾ ਤੋਂ ਮਿਲੇ ਤੋਹਫ਼ੇ 'ਤੇ ਸ਼ੀਤਲ ਦੇਵੀ ਨੇ ਖੋਲ੍ਹਿਆ ਰਾਜ਼
ਆਨੰਦ ਮਹਿੰਦਰਾ ਤੋਂ ਮਿਲੇ ਇਸ ਤੋਹਫ਼ੇ 'ਤੇ ਸ਼ੀਤਲ ਦੇਵੀ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ਐਕਸ 'ਤੇ ਪੋਸਟ ਕੀਤਾ ਅਤੇ ਲਿਖਿਆ, 'ਬਹੁਤ ਬਹੁਤ ਧੰਨਵਾਦ'। ਜਦੋਂ ਮੈਂ 16 ਸਾਲਾਂ ਦੀ ਸੀ, ਮੈਨੂੰ ਮੇਰੇ ਪਰਿਵਾਰ ਦਾ ਫੋਨ ਆਇਆ। ਆਨੰਦ ਮਹਿੰਦਰਾ ਸਰ ਮੈਨੂੰ ਆਪਣੀ ਪਸੰਦ ਦੀ ਮਹਿੰਦਰਾ ਕਾਰ ਗਿਫਟ ਕਰ ਰਹੇ ਸਨ। ਮੈਂ ਏਸ਼ੀਅਨ ਪੈਰਾ ਖੇਡਾਂ ਦੌਰਾਨ ਰੁੱਝੀ ਹੋਈ ਸੀ ਅਤੇ ਮੈਂ ਸੋਚਿਆ ਕਿ ਇਹ ਸ਼ਰਾਰਤ ਹੈ ਅਤੇ ਮੇਰੇ ਨਾਲ ਕੋਈ ਮਜ਼ਾਕ ਕਰ ਰਿਹਾ ਹੈ ਪਰ ਜਦੋਂ ਮੈਨੂੰ ਅਹਿਸਾਸ ਹੋਇਆ ਕਿ ਇਹ ਸੱਚ ਹੈ, ਤਾਂ ਮੈਂ ਬਹੁਤ ਉਤਸ਼ਾਹਿਤ ਸੀ,'।
ਸ਼ੀਤਲ ਦੇਵੀ ਨੇ ਅੱਗੇ ਲਿਖਿਆ, 'ਮੈਂ 18 ਸਾਲ ਦੀ ਉਮਰ 'ਚ ਕਾਰ ਖਰੀਦਣ ਦਾ ਫੈਸਲਾ ਕੀਤਾ ਸੀ। ਮੈਂ ਆਪਣੇ ਜਨਮਦਿਨ ਤੋਂ ਬਾਅਦ ਆਨੰਦ ਮਹਿੰਦਰਾ ਸਰ ਨੂੰ ਮਿਲੀ ਸੀ, ਜੋ ਕਿ ਇੱਕ ਵੱਡਾ ਸਨਮਾਨ ਹੈ। ਤੁਹਾਡੀ ਦਿਆਲਤਾ ਅਤੇ ਹੱਲਾਸ਼ੇਰੀ ਲਈ ਧੰਨਵਾਦ, ਸਰ.. ਮਹਿੰਦਰਾ ਕਾਰ ਚੁਣਨਾ ਮੁਸ਼ਕਿਲ ਸੀ ਪਰ ਸਕਾਰਪੀਓ N ਮੇਰਾ ਦਿਲ ਜਿੱਤ ਲਿਆ। ਇਹ ਕਾਰ ਮੇਰੇ ਪਿੰਡ ਦੀਆਂ ਕੱਚੀਆਂ ਸੜਕਾਂ ਲਈ ਬਿਲਕੁਲ ਸਹੀ ਹੈ।