ਨਵੀਂ ਦਿੱਲੀ: ਪਾਕਿਸਤਾਨ ਦੇ ਸਟਾਰ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਸ਼ਾਹੀਨ ਸ਼ਾਹ ਅਫਰੀਦੀ ਸ਼ਨੀਵਾਰ (24 ਅਗਸਤ) ਨੂੰ ਬੇਟੇ ਦੇ ਪਿਤਾ ਬਣੇ ਅਤੇ ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਦੇ ਇਸ ਖਾਸ ਪਲ ਨੂੰ ਪਾਕਿਸਤਾਨ ਅਤੇ ਬੰਗਲਾਦੇਸ਼ ਵਿਚਾਲੇ ਰਾਵਲਪਿੰਡੀ ਕ੍ਰਿਕਟ ਸਟੇਡੀਅਮ 'ਚ ਚੱਲ ਰਹੇ ਪਹਿਲੇ ਟੈਸਟ ਦੌਰਾਨ ਇਸ ਪਲ ਦਾ ਖੂਬ ਜਸ਼ਨ ਮਨਾਇਆ।
ਸ਼ਾਹੀਨ ਅਫਰੀਦੀ ਦਾ ਵਿਕਟ ਸੈਲੀਬ੍ਰੇਸ਼ਨ ਵਾਇਰਲ:ਇਸ 24 ਸਾਲਾ ਤੇਜ਼ ਗੇਂਦਬਾਜ਼ ਨੇ 163ਵੇਂ ਓਵਰ ਦੀ ਆਖਰੀ ਗੇਂਦ 'ਤੇ ਹਸਨ ਮਹਿਮੂਦ ਨੂੰ ਆਊਟ ਕਰਕੇ ਮੈਚ ਦੀ ਆਪਣੀ ਪਹਿਲੀ ਵਿਕਟ ਲਈ। ਮੁਹੰਮਦ ਰਿਜ਼ਵਾਨ ਵੱਲੋਂ ਕੈਚ ਪੂਰਾ ਕਰਨ ਤੋਂ ਬਾਅਦ ਸ਼ਾਹੀਨ ਨੇ ਖੂਬ ਜਸ਼ਨ ਮਨਾਇਆ, ਜਿਸ ਦੀ ਵੀਡੀਓ ਹੁਣ ਇੰਟਰਨੈੱਟ 'ਤੇ ਵਾਇਰਲ ਹੋ ਰਹੀ ਹੈ।
ਅਲੀ ਯਾਰ ਰੱਖਿਆ ਪੁੱਤ ਦਾ ਨਾਮ: ਬੰਗਲਾਦੇਸ਼ ਦੇ ਖਿਲਾਫ ਚੱਲ ਰਹੇ ਟੈਸਟ 'ਚ ਪਾਕਿਸਤਾਨ ਦੇ ਤੇਜ਼ ਗੇਂਦਬਾਜ਼ਾਂ ਦੀ ਅਗਵਾਈ ਕਰ ਰਹੇ ਸ਼ਾਹੀਨ ਨੇ ਪਿਛਲੇ ਸਾਲ ਅੰਸ਼ਾ ਅਫਰੀਦੀ ਨਾਲ ਵਿਆਹ ਕੀਤਾ ਸੀ, ਉਹ ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਅਤੇ ਅਨੁਭਵੀ ਆਲਰਾਊਂਡਰ ਸ਼ਾਹਿਦ ਅਫਰੀਦੀ ਦੀ ਬੇਟੀ ਹੈ। ਸ਼ਾਹੀਨ ਅਤੇ ਅੰਸ਼ਾ ਨੇ ਆਪਣੇ ਬੇਟੇ ਦਾ ਨਾਂ ਅਲੀ ਯਾਰ ਰੱਖਿਆ ਹੈ।
ਅਫਰੀਦੀ ਨੇ 2 ਵਿਕਟਾਂ ਲਈਆਂ:24 ਸਾਲਾ ਇਸ ਤੇਜ਼ ਗੇਂਦਬਾਜ਼ ਨੇ ਪਹਿਲੀ ਪਾਰੀ 'ਚ 88 ਦੌੜਾਂ ਦੇ ਕੇ ਕੁੱਲ 2 ਵਿਕਟਾਂ ਲਈਆਂ। ਹਸਨ ਨੂੰ 18 ਗੇਂਦਾਂ 'ਤੇ ਆਊਟ ਕਰਨ ਤੋਂ ਬਾਅਦ ਬੰਗਲਾਦੇਸ਼ ਦੀ ਪਹਿਲੀ ਪਾਰੀ ਦੇ 167ਵੇਂ ਓਵਰ ਦੀ ਪਹਿਲੀ ਗੇਂਦ 'ਤੇ ਮੇਹਦੀ ਹਸਨ ਮਿਰਾਜ਼ ਨੂੰ ਆਊਟ ਕਰ ਦਿੱਤਾ।
ਬੰਗਲਾਦੇਸ਼ ਵਿਰੁੱਧ ਸੰਘਰਸ਼ ਕਰ ਰਿਹਾ ਪਾਕਿਸਤਾਨ:ਪਾਕਿਸਤਾਨ ਅਤੇ ਬੰਗਲਾਦੇਸ਼ ਵਿਚਾਲੇ ਰਾਵਲਪਿੰਡੀ 'ਚ ਪਹਿਲਾ ਟੈਸਟ ਖੇਡਿਆ ਜਾ ਰਿਹਾ ਹੈ। ਇਸ ਮੈਚ 'ਚ ਪਾਕਿਸਤਾਨ ਦੀ ਟੀਮ ਬੰਗਲਾਦੇਸ਼ ਖਿਲਾਫ ਸੰਘਰਸ਼ ਕਰਦੀ ਨਜ਼ਰ ਆ ਰਹੀ ਹੈ। ਪਾਕਿਸਤਾਨ ਦੇ ਪਹਿਲੀ ਪਾਰੀ ਦੇ 448-6 ਦੇ ਸਕੋਰ ਦੇ ਜਵਾਬ ਵਿੱਚ ਬੰਗਲਾਦੇਸ਼ ਨੇ ਪਹਿਲੀ ਪਾਰੀ ਵਿੱਚ 565 ਦੌੜਾਂ ਬਣਾ ਕੇ 117 ਦੌੜਾਂ ਦੀ ਮਹੱਤਵਪੂਰਨ ਬੜ੍ਹਤ ਹਾਸਲ ਕਰ ਲਈ ਹੈ। ਚੌਥੇ ਦਿਨ ਸਟੰਪ ਖਤਮ ਹੋਣ ਤੱਕ ਪਾਕਿਸਤਾਨ ਨੇ 1 ਵਿਕਟ ਗੁਆ ਕੇ 23 ਦੌੜਾਂ ਬਣਾ ਲਈਆਂ ਹਨ। ਫਿਲਹਾਲ ਉਹ ਬੰਗਲਾਦੇਸ਼ ਤੋਂ 94 ਦੌੜਾਂ ਪਿੱਛੇ ਹੈ।
