ਨਵੀਂ ਦਿੱਲੀ:ਭਾਰਤ ਬਨਾਮ ਨਿਊਜ਼ੀਲੈਂਡ ਕ੍ਰਿਕਟ ਟੀਮ ਦੇ ਟੈਸਟ ਮੈਚ ਦੇ ਚੌਥੇ ਦਿਨ ਭਾਰਤੀ ਟੀਮ ਲਈ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ 99 ਦੌੜਾਂ ਬਣਾਈਆਂ। ਹਾਲਾਂਕਿ ਨਿਰਾਸ਼ਾਜਨਕ ਗੱਲ ਇਹ ਰਹੀ ਕਿ ਪੰਤ ਸਿਰਫ 1 ਦੌੜ ਨਾਲ ਆਪਣਾ ਸੈਂਕੜਾ ਬਣਾਉਣ ਤੋਂ ਖੁੰਝ ਗਏ। ਪੰਤ ਨੇ ਇਸ ਪਾਰੀ 'ਚ 9 ਚੌਕੇ ਅਤੇ 5 ਛੱਕੇ ਵੀ ਲਗਾਏ। ਇਨ੍ਹਾਂ 'ਚੋਂ ਇਕ ਛੱਕਾ ਅਜਿਹਾ ਸੀ ਜਿਸ ਨੂੰ ਕੀਵੀ ਖਿਡਾਰੀ ਦੇਖਦੇ ਹੀ ਰਹਿ ਗਏ ਅਤੇ ਇਹ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਗਿਆ।
ਪੰਤ ਨੇ ਲਗਾਇਆ ਸਕਾਈਸਕ੍ਰੈਪਰ ਛੱਕਾ
ਦਰਅਸਲ, ਭਾਰਤੀ ਪਾਰੀ ਦੇ 87ਵੇਂ ਓਵਰ 'ਚ ਪੰਤ ਨੇ ਟਿਮ ਸਾਊਥੀ ਦੀ ਪਹਿਲੀ ਹੀ ਗੇਂਦ 'ਤੇ ਵੱਡਾ ਸ਼ਾਟ ਖੇਡਣ ਦਾ ਫੈਸਲਾ ਕੀਤਾ, ਹਾਲਾਂਕਿ ਪੰਤ ਪਹਿਲੀ ਗੇਂਦ 'ਤੇ ਖੁੰਝ ਗਏ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਦੂਜੀ ਗੇਂਦ 'ਤੇ ਧਿਆਨ ਨਾਲ ਖੇਡਿਆ। ਸਾਊਥੀ ਨੇ ਜਿਵੇਂ ਹੀ ਪੰਤ ਦੇ ਸਾਹਮਣੇ ਤੀਜੀ ਗੇਂਦ ਸੁੱਟੀ, ਉਹ ਅੱਗੇ ਆਏ ਅਤੇ ਸਲੋਗ ਸਵੀਪ ਦੇ ਨਾਲ ਮਿਡਵਿਕਟ 'ਤੇ ਛੱਕਾ ਜੜ ਦਿੱਤਾ।
ਪੰਤ ਨੇ ਇਹ ਛੱਕਾ 107 ਮੀਟਰ ਲੰਬਾ ਮਾਰਿਆ। ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਰਿਸ਼ਭ ਪੰਤ ਨੇ 90 ਦੌੜਾਂ 'ਤੇ ਖੇਡਦੇ ਹੋਏ ਇਹ ਛੱਕਾ ਲਗਾਇਆ। ਉਨ੍ਹਾਂ ਦਾ ਛੱਕਾ ਇੰਨਾ ਸ਼ਾਨਦਾਰ ਸੀ ਕਿ ਨਿਊਜ਼ੀਲੈਂਡ ਦੇ ਗਲੇਨ ਫਿਲਿਪਸ ਬੋਲਣ ਤੋਂ ਰਹਿ ਗਏ। ਇਸ ਛੱਕੇ ਤੋਂ ਬਾਅਦ ਉਹ ਆਪਣੇ ਸੈਂਕੜੇ ਦੇ ਬਹੁਤ ਨੇੜੇ ਆ ਗਏ ਪਰ ਫਿਰ ਵੀ ਪੰਤ ਨੇ ਆਪਣੇ ਆਪ ਨੂੰ ਰੋਕਿਆ ਨਹੀਂ। ਇਸ ਕਾਰਨ ਉਹ ਆਪਣਾ ਸੈਂਕੜਾ ਗੁਆ ਬੈਠੇ।