ਬੱਚੇ ਨੂੰ ਅੱਗ ਨਾਲ ਖੇਡਣਾ ਪਿਆ ਮਹਿੰਗਾ, ਅਦਾਕਾਰ ਵਿਜੇ ਦੇ ਜਨਮਦਿਨ ਉਤੇ ਕਰ ਰਿਹਾ ਸੀ ਅਨੌਖਾ ਸਟੰਟ, ਦੇਖੋ ਵੀਡੀਓ - Vijay Birthday

Boy Hand Catches Fire At Vijay Birthday: ਸ਼ਨੀਵਾਰ ਨੂੰ ਚੇੱਨਈ ਦੇ ਨੀਲੰਕਾਰਈ ਇਲਾਕੇ 'ਚ ਅਦਾਕਾਰ ਵਿਜੇ ਦੇ 50ਵੇਂ ਜਨਮਦਿਨ ਦੇ ਮੌਕੇ 'ਤੇ ਇੱਕ ਐਡਵੈਂਚਰ ਸਟੰਟ ਸ਼ੋਅ ਦਾ ਆਯੋਜਨ ਕੀਤਾ ਗਿਆ। ਸਟੰਟ ਸ਼ੋਅ ਦੌਰਾਨ ਇੱਕ ਲੜਕੇ ਦੇ ਹੱਥ ਨੂੰ ਅੱਗ ਲੱਗ ਗਈ। ਹੁਣ ਅਦਾਕਾਰ ਵਿਜੇ ਦੀ ਤਰਫੋਂ ਇੱਕ ਬਿਆਨ ਜਾਰੀ ਕੀਤਾ ਗਿਆ ਹੈ, ਜਿਸ ਵਿੱਚ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੂੰ ਇਸ ਤਰ੍ਹਾਂ ਜਨਮਦਿਨ ਨਾ ਮਨਾਉਣ ਬਾਰੇ ਕਿਹਾ।

ਚੇੱਨਈ (ਤਾਮਿਲਨਾਡੂ): ਅਦਾਕਾਰ ਵਿਜੇ ਤਾਮਿਲਗਾ ਵੇਤਰੀ ਕਜ਼ਗਮ ਪਾਰਟੀ ਦੇ ਨੇਤਾ ਹਨ, ਸ਼ਨੀਵਾਰ ਨੂੰ ਉਹ ਆਪਣਾ 50ਵਾਂ ਜਨਮਦਿਨ ਮਨਾ ਰਹੇ ਹਨ। ਇਸ ਮੌਕੇ 'ਤੇ ਉਨ੍ਹਾਂ ਦੇ ਪ੍ਰਸ਼ੰਸਕ ਪੂਰੇ ਤਾਮਿਲਨਾਡੂ ਵਿੱਚ ਵੱਖ-ਵੱਖ ਥਾਵਾਂ 'ਤੇ ਚੈਰਿਟੀ ਸਮਾਗਮਾਂ ਅਤੇ ਮਨੋਰੰਜਨ ਸ਼ੋਅ ਆਯੋਜਿਤ ਕਰਕੇ ਜਸ਼ਨ ਮਨਾ ਰਹੇ ਹਨ।

ਅਜਿਹਾ ਹੀ ਇੱਕ ਜਨਮਦਿਨ ਸਮਾਗਮ ਚੇੱਨਈ ਦੇ ਨੀਲੰਕਾਰਈ ਇਲਾਕੇ 'ਚ ਕਰਵਾਇਆ ਗਿਆ, ਜਿੱਥੇ ਬੱਚਿਆਂ ਲਈ ਖਤਰਨਾਕ, ਸਾਹਸੀ ਗਤੀਵਿਧੀਆਂ ਦਾ ਆਯੋਜਨ ਕੀਤਾ ਗਿਆ, ਜਿਸ 'ਚ ਹੱਥਾਂ 'ਤੇ ਪੈਟਰੋਲ ਪਾਉਣਾ ਅਤੇ ਟਾਈਲਾਂ ਤੋੜਨਾ ਸ਼ਾਮਲ ਸੀ। ਅਜਿਹੇ ਇੱਕ ਪ੍ਰਦਰਸ਼ਨ ਵਿੱਚ ਇੱਕ ਲੜਕੇ ਨੇ ਆਪਣੇ ਹੱਥ 'ਤੇ ਅੱਗ ਲਾ ਕੇ ਟਾਈਲਾਂ ਤੋੜ ਦਿੱਤੀਆਂ ਪਰ ਉਹ ਅੱਗ ਬੁਝਾਉਣ ਵਿੱਚ ਅਸਫਲ ਰਿਹਾ, ਜੋ ਤੇਜ਼ੀ ਨਾਲ ਉਸਦੀ ਉੱਪਰਲੀ ਬਾਂਹ ਤੱਕ ਫੈਲ ਗਈ।

ਫਿਰ ਲੜਕੇ ਨੇ ਚੀਕਣਾ ਸ਼ੁਰੂ ਕਰ ਦਿੱਤਾ ਅਤੇ ਤੇਜ਼ੀ ਨਾਲ ਫੈਲ ਰਹੀਆਂ ਲਾਟਾਂ ਤੋਂ ਛੁਟਕਾਰਾ ਪਾਉਣ ਲਈ ਆਪਣਾ ਹੱਥ ਹਿਲਾਉਣਾ ਸ਼ੁਰੂ ਕੀਤਾ। ਇਸ ਮੌਕੇ 'ਤੇ ਸ਼ੋਅ ਦੇ ਇੱਕ ਫੈਸਿਲੀਟੇਟਰ ਦੁਆਰਾ ਰੱਖੇ ਪੈਟਰੋਲ ਕੈਨ ਨੂੰ ਅੱਗ ਲੱਗ ਗਈ ਅਤੇ ਸਟੇਜ ਦੇ ਕੁਝ ਹਿੱਸਿਆਂ ਨੂੰ ਵੀ ਅੱਗ ਲੱਗ ਗਈ।

ਮੌਕੇ 'ਤੇ ਮੌਜੂਦ ਲੋਕਾਂ ਨੇ ਜਾ ਕੇ ਅੱਗ 'ਤੇ ਕਾਬੂ ਪਾਇਆ। ਉਨ੍ਹਾਂ ਨੇ ਲੜਕੇ ਨੂੰ ਬਚਾਇਆ ਅਤੇ ਇਲਾਜ ਲਈ ਨੀਲੰਕਾਰਈ ਦੇ ਇੱਕ ਨਿੱਜੀ ਹਸਪਤਾਲ ਵਿੱਚ ਲੈ ਗਏ। ਉੱਥੇ ਉਸ ਦੀ ਸਖਤ ਦੇਖਭਾਲ ਕੀਤੀ ਜਾ ਰਹੀ ਹੈ।

ਹੁਣ ਜਦੋਂ ਤੋਂ ਇਹ ਵੀਡੀਓ ਸ਼ੋਸਲ ਮੀਡੀਆ ਉਤੇ ਵਾਇਰਲ ਹੋ ਰਹੀ ਹੈ, ਲੋਕ ਤਰ੍ਹਾਂ-ਤਰ੍ਹਾਂ ਦੇ ਕਮੈਂਟ ਕਰ ਰਹੇ ਹਨ। ਇੱਕ ਹੋਰ ਉਪਭੋਗਤਾ ਨੇ ਲਿਖਿਆ, "ਇਹ ਕਿਸੇ ਦਾ ਜਨਮਦਿਨ ਮਨਾਉਣ ਦਾ ਕੋਈ ਤਰੀਕਾ ਨਹੀਂ ਹੈ।" ਇੱਕ ਹੋਰ ਨੇ ਲਿਖਿਆ, "ਭਿਆਨਕ...ਇਹ ਬਹੁਤ ਜੋਖ਼ਮ ਭਰਿਆ ਹੈ।"

ਇਸ ਦੌਰਾਨ ਅਦਾਕਾਰ ਵਿਜੇ ਦੇ ਵਰਕਫਰੰਟ ਦੀ ਗੱਲ ਕਰੀਏ ਤਾਂ ਅਦਾਕਾਰ ਵਿਜੇ-ਸਟਾਰਰ ਫਿਲਮ 'ਦਿ ਗੋਟ-ਗ੍ਰੇਟੈਸਟ ਆਫ ਆਲ ਟਾਈਮ' ਦੇ ਨਿਰਮਾਤਾਵਾਂ ਨੇ ਫਿਲਮ ਦੀ ਇੱਕ ਛੋਟੀ ਜਿਹੀ ਝਲਕ ਜਾਰੀ ਕੀਤੀ ਹੈ। ਦਿ ਗੋਟ ਵੈਂਕਟ ਪ੍ਰਭੂ ਦੁਆਰਾ ਨਿਰਦੇਸ਼ਿਤ ਹੈ ਅਤੇ 5 ਸਤੰਬਰ ਨੂੰ ਰਿਲੀਜ਼ ਹੋਣ ਵਾਲੀ ਹੈ।