ਨਵੀਂ ਦਿੱਲੀ: ਸਿਆਸੀ ਪਾਰਟੀਆਂ ਨੂੰ ਮਿਲੇ ਚੰਦੇ ਦੀ ਸਾਲਾਨਾ ਆਡਿਟ ਰਿਪੋਰਟ ਤੋਂ ਨਵੇਂ ਖੁਲਾਸੇ ਹੋਏ ਹਨ। ਆਡਿਟ ਰਿਪੋਰਟ ਮੁਤਾਬਿਕ ਲੋਕ ਸਭਾ ਚੋਣਾਂ 2024 ਤੋਂ ਪਹਿਲਾਂ ਭਾਜਪਾ ਨੂੰ ਮਿਲੇ ਚੰਦੇ 'ਚ 87 ਫੀਸਦੀ ਦਾ ਵਾਧਾ ਹੋਇਆ ਹੈ, ਜੋ 3,967.14 ਕਰੋੜ ਰੁਪਏ ਤੱਕ ਪਹੁੰਚ ਗਿਆ ਹੈ। ਸੱਤਾਧਾਰੀ ਭਾਜਪਾ ਦੀ 2023-24 ਦੀ ਸਾਲਾਨਾ ਆਡਿਟ ਰਿਪੋਰਟ ਹਾਲ ਹੀ ਵਿੱਚ ਭਾਰਤੀ ਚੋਣ ਕਮਿਸ਼ਨ ਦੁਆਰਾ ਪ੍ਰਕਾਸ਼ਿਤ ਕੀਤੀ ਗਈ ਹੈ।
ਹਾਲਾਂਕਿ, ਪਿਛਲੇ ਵਿੱਤੀ ਸਾਲ ਦੇ ਮੁਕਾਬਲੇ, 2023-24 ਵਿੱਚ ਚੋਣ ਬਾਂਡ ਰਾਹੀਂ ਆਮਦਨ ਵਿੱਚ ਭਾਜਪਾ ਦਾ ਹਿੱਸਾ ਘਟਿਆ ਹੈ। ਭਾਜਪਾ ਨੂੰ ਚੋਣ ਬਾਂਡ ਦੇ ਰੂਪ ਵਿੱਚ 1,294.14 ਕਰੋੜ ਰੁਪਏ ਪ੍ਰਾਪਤ ਹੋਏ, ਜਦੋਂ ਕਿ 2022-23 ਵਿੱਚ ਚੋਣ ਬਾਂਡਾਂ ਰਾਹੀਂ 2,360 ਕਰੋੜ ਰੁਪਏ ਪ੍ਰਾਪਤ ਹੋਏ।
ਰਿਪੋਰਟ ਦੇ ਅਨੁਸਾਰ, ਭਾਜਪਾ ਨੂੰ 2023-24 ਵਿੱਚ ਸਵੈਇੱਛਤ ਦਾਨ ਵਜੋਂ 3,967.14 ਕਰੋੜ ਰੁਪਏ ਪ੍ਰਾਪਤ ਹੋਏ, ਜਦੋਂ ਕਿ 2022-23 ਵਿੱਚ ਇਹ 2,120.06 ਕਰੋੜ ਰੁਪਏ ਸੀ।
ਭਾਜਪਾ ਦੀ 2023-24 ਦੀ ਸਾਲਾਨਾ ਆਡਿਟ ਰਿਪੋਰਟ ਵਿੱਚ ਦਿਖਾਇਆ ਗਿਆ ਹੈ ਕਿ ਭਾਜਪਾ ਨੂੰ ਚੋਣ ਬਾਂਡ ਦੇ ਰੂਪ ਵਿੱਚ 1,685.62 ਕਰੋੜ ਰੁਪਏ ਪ੍ਰਾਪਤ ਹੋਏ, ਜੋ ਕਿ ਉਸਦੇ ਕੁੱਲ ਚੰਦੇ ਦਾ 43 ਪ੍ਰਤੀਸ਼ਤ ਹੈ। 2022-23 ਵਿੱਚ, ਪਾਰਟੀ ਨੂੰ ਚੋਣ ਬਾਂਡ ਦੇ ਰੂਪ ਵਿੱਚ 1,294.14 ਕਰੋੜ ਰੁਪਏ ਮਿਲੇ ਸਨ, ਜੋ ਕੁੱਲ ਚੰਦੇ ਦਾ 61 ਪ੍ਰਤੀਸ਼ਤ ਸੀ।
ਭਾਜਪਾ ਦੇ ਚੋਣ ਖਰਚੇ ਵਿੱਚ ਵਾਧਾ
ਭਾਜਪਾ ਦੇ ਚੋਣ ਖਰਚੇ ਵਿੱਚ ਵੀ ਉਛਾਲ ਆਇਆ ਹੈ, ਜੋ 2022-23 ਵਿੱਚ 1,092.15 ਕਰੋੜ ਰੁਪਏ ਤੋਂ ਵੱਧ ਕੇ 2023-24 ਵਿੱਚ 1,754.06 ਕਰੋੜ ਰੁਪਏ ਹੋ ਗਿਆ ਹੈ। ਰਿਪੋਰਟ ਮੁਤਾਬਿਕ ਭਾਜਪਾ ਨੇ ਇਸ਼ਤਿਹਾਰਾਂ ਅਤੇ ਪ੍ਰਚਾਰ 'ਤੇ 591.39 ਕਰੋੜ ਰੁਪਏ ਖਰਚ ਕੀਤੇ, ਜਿਸ ਨਾਲ ਲੋਕ ਸਭਾ ਚੋਣਾਂ ਕਾਰਨ ਖਰਚ ਵਧਦਾ ਗਿਆ।
ਕਾਂਗਰਸ ਦੇ ਚੰਦੇ 'ਚ 320 ਫੀਸਦੀ ਦਾ ਵਾਧਾ
2023-24 ਵਿੱਚ ਕਾਂਗਰਸ ਨੂੰ ਮਿਲੇ ਚੰਦੇ ਵਿੱਚ ਵਾਧਾ ਹੋਇਆ ਹੈ। ਪਾਰਟੀ ਦੇ ਕੁੱਲ ਚੰਦੇ ਵਿੱਚ 320 ਫੀਸਦੀ ਦਾ ਵਾਧਾ ਹੋਇਆ ਹੈ। ਕਾਂਗਰਸ ਨੂੰ 2022-23 ਵਿੱਚ 268.62 ਕਰੋੜ ਰੁਪਏ ਦਾ ਦਾਨ ਮਿਲਿਆ ਸੀ, ਜੋ 2023-24 ਵਿੱਚ ਵੱਧ ਕੇ 1,129.66 ਕਰੋੜ ਰੁਪਏ ਹੋ ਗਿਆ। ਕਾਂਗਰਸ ਦੇ ਕੁੱਲ ਚੰਦੇ ਦਾ 73 ਪ੍ਰਤੀਸ਼ਤ ਚੋਣ ਬਾਂਡ ਹਨ। ਕਾਂਗਰਸ ਨੂੰ ਚੋਣ ਬਾਂਡ ਵਜੋਂ 828.36 ਕਰੋੜ ਰੁਪਏ ਮਿਲੇ ਸਨ, ਜਦੋਂ ਕਿ ਪਿਛਲੇ ਸਾਲ ਇਸ ਨੂੰ 171.02 ਕਰੋੜ ਰੁਪਏ ਮਿਲੇ ਸਨ।
ਕਾਂਗਰਸ ਦਾ ਚੋਣ ਖਰਚ 2023-24 ਵਿੱਚ ਵਧ ਕੇ 619.67 ਕਰੋੜ ਰੁਪਏ ਹੋ ਗਿਆ, ਜਦੋਂ ਕਿ 2022-23 ਵਿੱਚ ਇਹ 192.55 ਕਰੋੜ ਰੁਪਏ ਸੀ।
ਇਸੇ ਤਰ੍ਹਾਂ, ਤ੍ਰਿਣਮੂਲ ਕਾਂਗਰਸ ਦੀ 2023-24 ਦੀ ਸਾਲਾਨਾ ਆਡਿਟ ਰਿਪੋਰਟ ਦੇ ਅਨੁਸਾਰ, ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦੀ ਪਾਰਟੀ ਟੀਐਮਸੀ ਦੀ ਆਮਦਨ ਵੱਧ ਕੇ 646.39 ਕਰੋੜ ਰੁਪਏ ਹੋ ਗਈ, ਜਦੋਂ ਕਿ ਪਿਛਲੇ ਸਾਲ ਪਾਰਟੀ ਦੀ ਕੁੱਲ ਆਮਦਨ 333.46 ਕਰੋੜ ਰੁਪਏ ਸੀ। ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਟੀਐਮਸੀ ਨੂੰ ਮਿਲੇ ਚੰਦੇ ਵਿੱਚ ਚੋਣ ਬਾਂਡ ਦੀ ਹਿੱਸੇਦਾਰੀ ਲਗਭਗ 95 ਪ੍ਰਤੀਸ਼ਤ ਹੈ।
