ମହାପ୍ରଭୁଙ୍କ ଦର୍ଶନ କଲେ କଣ୍ଠଶିଳ୍ପୀ ସୋନୁ ନିଗମ, ଜଗା ଦୁଆରେ ଗାଇଲେ ଭଜନ

Sonu Nigam Visits Puri ପୁରୀ: ମହାପ୍ରଭୁଙ୍କ ଦର୍ଶନ କଲେ ବଲିଉଡର ପ୍ରସିଦ୍ଧ କଣ୍ଠଶିଳ୍ପୀ ସୋନୁ ନିଗମ ।  ଆଜି ଶ୍ରୀମନ୍ଦିର ଆସି ଚତୁର୍ଦ୍ଧାମୂର୍ତ୍ତିଙ୍କୁ ଦର୍ଶନ କରିଛନ୍ତି ସୋନୁ ନିଗମ । ଦୀର୍ଘ ଦିନ ପରେ ମହାପ୍ରଭୁଙ୍କ ଦର୍ଶନ ପାଇ ସେ ବେଶ ଭାବବିହ୍ୱଳ ହୋଇପଡ଼ିଥିଲେ । ମହାପ୍ରଭୁଙ୍କ ଦର୍ଶନ ପାଇ ସେ ନିଜକୁ ଭାଗ୍ୟବାନ ମନେ କରିଥିବା କହିଛନ୍ତି । ସେବାୟତ ମାନେ ଶ୍ରୀମନ୍ଦିର ସିଂହଦ୍ଵାରରେ ତାଙ୍କୁ ଖଣ୍ଡୁଆ ଦେଇ ସ୍ବାଗତ କରିବା ସହ ମହାପ୍ରଭୁଙ୍କ ଦର୍ଶନ କରାଇଥିଲେ । ପରେ ଶ୍ରୀମନ୍ଦିର ଭିତର ବେଢା଼ରେ ଥିବା ପାର୍ଶ୍ଵ ଦେବଦେବୀଙ୍କ ମନ୍ଦିର ମଧ୍ୟ‌ ସୋନୁ ନିଗମ ବୁଲି ଦର୍ଶନ କରିଥିଲେ ।  

ମହାପ୍ରଭୁଙ୍କ ଦର୍ଶନ କରି ସୋନୁ ନିଗମ କହିଛନ୍ତି, ‘ପୂର୍ବରୁ ବି ଆସିଛି । ବହୁତ ଭଲ ଭାବେ ମହାପ୍ରଭୁଙ୍କ ଦର୍ଶନ ହେଲା । ଏଥିପାଇଁ ବହୁତ ଖୁସି ।’ ଏହି ଅବସରରେ ମହାପ୍ରଭୁଙ୍କ ପାଇଁ ଗୀତ ବୋଲିଥିଲେ କଣ୍ଠଶିଳ୍ପୀ ସୋନୁ ନିଗମ । ସୂଚନା ଥାଉକି, ଗତକାଲି କଟକ ବାଲିଯାତ୍ରା ପଡ଼ିଆରେ ଅନୁଷ୍ଠିତ ହୋଇଥିବା ସାଂସ୍କୃତିକ କାର୍ଯ୍ୟକ୍ରମରେ ଯୋଗଦେବା ପାଇଁ କଟକ ଆସିଥିଲେ ସୋନୁ ନିଗମ । ଏହି ଅବସରରେ ଆଜି ସେ ପୁରୀ ଆସି ମହାପ୍ରଭୁଙ୍କ ଦର୍ଶନ କରିଛନ୍ତି । 

ଇଟିଭି ଭାରତ, ପୁରୀ