ଭୟଙ୍କର ଅଗ୍ନିକାଣ୍ଡ, ଜଳିଗଲା ୩ ପରିବାରର ୧୦ ବଖରା ଘର

ବ୍ରହ୍ମପୁର: ୩ଟି ପରିବାରକୁ ଛାରଖାର କରିଦେଲା ଅଗ୍ନିକାଣ୍ଡ । ହୁତୁହୁତୁ ହୋଇ ଜଳିଗଲା ୧୦ ବଖରା ଘର ସହିତ ସମସ୍ତ ସମ୍ପତ୍ତି । ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଳକ ଅନ୍ତର୍ଗତ ତୁଳସୀପୁର ପଞ୍ଚାୟତର କମଳାପଦର ଗ୍ରାମର ଉପର ସାହିରେ ଏଭଳି ବଡ଼ ଧରଣର ଅଗ୍ନିକାଣ୍ଡ ଘଟିଛି । ଗ୍ରାମର କାମ୍ପ ଜେନାଙ୍କ ଘରେ ଅସାବଧାନତା ବସତଃ ଭୋର ୪ଟାରେ ରୋଷେଇ ଘରେ ନିଆଁ ଲାଗିଯାଇଥିଲା । ନିଆଁ ସମ୍ପ୍ରସାରିତ ହେବା ସହିତ ରୋଷେଇ ଘରେ ରହିଥିବା ଗ୍ୟାସ ସିଲିଣ୍ଡର ପାଇପରେ ଲାଗିଥିଲା। ପରେ ଗ୍ୟାସ ସିଲିଣ୍ଡର ବିସ୍ଫୋରଣ ହୋଇଥିଲା । ନିଆଁର ବେଗ ଏତେ ପ୍ରଖରଥିଲା ଯେ, ଆଖି ପିଛୁଳାକେ ଆଖ ପାଖରେ ଥିବା ୩ଟି ପରିବାରର ପ୍ରାୟ ୧୦ ବଖରା ଘରକୁ ନିଆଁ ବ୍ୟାପି ଯାଇଥିଲା । ଗ୍ରାମବାସୀ ଉଠି ପ୍ରଥମେ ନିଆଁକୁ ପାଣି ପକାଇ ଲିଭାଇବା ପାଇଁ ଉଦ୍ୟମ କରିଥିଲେ । ହେଲେ ପରବର୍ତ୍ତୀ ସମୟରେ ନିଆଁ ଲିଭାଇବା ପାଇଁ ଖବର ପାଇ ଅଗ୍ନିଶମବାହିନୀ ପହଞ୍ଚି ପ୍ରାୟ ୨ ଘଣ୍ଟାର ଅକ୍ଳାନ୍ତ ପରିଶ୍ରମ କରିବା ପରେ ନିଆଁକୁ ଆୟତ୍ତ କରିଥିଲେ । 
 

ଅଗ୍ନିକାଣ୍ଡ ପ୍ରଭାବରେ କମଳାପଦର ଗ୍ରାମର କାମ୍ପ ଜେନା, କୁନ୍ତଳା ପହାନ, ଭୋବନୀ ପାହାନଙ୍କ ଘରର ସମସ୍ତ ଆସବାବପତ୍ର, ଟଙ୍କା,ଚାଉଳ, ମୂଲ୍ୟବାନ କାଗଜପତ୍ର ସହିତ ଘରର ଆବଶ୍ୟକୀୟ ସାମଗ୍ରୀ ପୋଡି ନଷ୍ଟ ହୋଇଯାଇଛି । ଅଗ୍ନିକାଣ୍ଡ ପରେ ସମସ୍ତ ପରିବାର ଏବେ ଏକ ପ୍ରକାର ବାସହରା ହୋଇଥିବାବେଳେ ସରକାରୀ ସହାୟତାକୁ ସମସ୍ତେ ଅପେକ୍ଷା କରି ରହିଛନ୍ତି  । ଅଗ୍ନିକାଣ୍ଡ ପରେ ସ୍ଥାନୀୟ ତହସିଲଦାର ସମେତ ରାଜସ୍ୱ ନିରୀକ୍ଷକ ଘଟଣାସ୍ଥଳକୁ ଯାଇ କ୍ଷୟକ୍ଷତିର ଆକଳନ କରି ଉଚ୍ଚ କର୍ତ୍ତୁପକ୍ଷଙ୍କ ନିକଟକୁ ପଠାଇଛନ୍ତି । ଅଗ୍ନିକାଣ୍ଡରେ ବିପନ୍ନଙ୍କୁ ଜରିପାଲ ଯୋଗାଇ ଦିଆଯାଇଥିବାବେଳେ ୩ଟି ପରିବାର ସହାୟତା ପାଇଁ ପୁଣି ସ୍ବାଭାବିକ ସ୍ଥିତିକୁ ଆସିବା ପର୍ଯ୍ୟନ୍ତ ଗ୍ରାମର କୋଠଘରେ ରହିବାକୁ ପଞ୍ଚାୟତର ସମିତି ସଭ୍ୟଙ୍କୁ ପରାମର୍ଶ ଦେଇଥିବା କହିଛନ୍ତି ତହସିଲଦାର ।
 

ଇଟିଭି ଭାରତ, ବ୍ରହ୍ମପୁର