ଭୁବନେଶ୍ବର/ କଟକ: ଆଜି ଉପସ୍ଥାପିତ ହୋଇଛି 2024-25 ଆର୍ଥିକ ବର୍ଷ ପାଇଁ କେନ୍ଦ୍ରୀୟ ବଜେଟ । ବଜେଟକୁ ନେଇ ବିଭିନ୍ନ ମହଲରୁ ପ୍ରତିକ୍ରିୟା ପ୍ରକାଶ ପାଇଛି । ରାଜନୈତିକ, ଅର୍ଥନୈତିକ ଓ ସାଧାରଣ ବର୍ଗ ତଥା ବୁଦ୍ଧିଜୀବୀ ଭିନ୍ନ ଭିନ୍ନ ପ୍ରତିକ୍ରିୟା ରଖିଛନ୍ତି । କେହି କେହି ଏହାକୁ ଆଭରେଜ ବା ଚଳଣୀୟ ବଜେଟ କହିଥିବା ବେଳେ ଓଡିଶା ପ୍ରତି ଅନୁଦାନ ପରିମାଣକୁ ନେଇ ସାମାନ୍ୟ ନିରାଶା ମଧ୍ୟ ବିଭିନ୍ନ ବର୍ଗ ମଧ୍ୟରେ ଦେଖିବାକୁ ମିଳିଛି ।
ଉତ୍କଳ ଚ୍ୟାମ୍ବର ଅଫ୍ କମର୍ସର ବଜେଟ ପ୍ରତିକ୍ରିୟା (ETV Bharat Odisha) ବଜେଟକୁ ଆଭରେଜ କହିଲା ଉତ୍କଳ ଚ୍ୟାମ୍ବର ଅଫ୍ କମର୍ସ:-
ଆଜି ବଜେଟ ଉପସ୍ଥାପନ ହେବା ପରେ ‘ଉତ୍କଳ ଚ୍ୟାମ୍ବର ଅଫ୍ କମର୍ସ’ ପକ୍ଷରୁ ଏହାର ବ୍ୟୟବରାଦ ସମ୍ପର୍କରେ ତର୍ଜମା କରଯାଇଥିଲା । ବଜେଟର ସମସ୍ତ ଦିଗକୁ ତର୍ଜମା କରିବା ପରେ ସଂସ୍ଥା ବଜେଟକୁ ୧୦ରୁ ୬ ନମ୍ବର ଦେଇଥିବା କହିଛି । ଚାମ୍ବର ସଭାପତି ଏ.କେ ସାରଦା କହିଛନ୍ତି, ଏହା ଏକ ଆଭରେଜ ବଜେଟ ଭାବେ ସେମାନେ ଏହାକୁ 6 ନମ୍ବର ଦେଇଛନ୍ତି । ସ୍ୱତନ୍ତ୍ର ରେଲଓ୍ବେ ବଜେଟ ଉପରେ ସେମାନେ ନଜର ରଖିଛନ୍ତି । ରେଲୱେ ବଜେଟରେ ଓଡିଶା ପାଇଁ ଅଧିକ ପ୍ରାଧାନ୍ୟ ଦିଆଯିବ ବୋଲି ଆଶା ଅଛି । ମ୍ୟାନୁଫାକ୍ଚରକୁ ଗୁରୁତ୍ୱ ଦିଆଯାଇଛି । କ୍ଳାଇମେଟ ଚେଞ୍ଜକୁ ନେଇ ଏଥର ସରକାର ଗୁରୁତ୍ୱ ଦେଇଛନ୍ତି, ଆମେ ପ୍ରଶଂସା କରୁଛୁ । ଟ୍ରାଇବାଲ ଅଞ୍ଚଳ ପାଇଁ ଗୁଡାଏ ସ୍କିମ ଆସିବା ନେଇ ଗୁରୁତ୍ୱ ଦିଆଯାଇଛି । MSME କୁ ନେଇ ଯେତେ ଆଶା ଥିଲା ସେତେ ହୋଇନାହିଁ । ମୁଦ୍ରା ଲୋନ ବଢିଛି ତାହା ପ୍ରଶଂସାଯୋଗ୍ୟ, ହେଲେ ଏସମ୍ପର୍କରେ କିନ୍ତୁ କ୍ଲିୟର ରୋଡ଼ମ୍ୟାପ ନାହିଁ । ସେହିପ ପୂର୍ବ ସରକାର ଓଡିଶାରେ ଥିବାବେଳେ ଓଡ଼ିଶାକୁ ସେତେ ପ୍ରାଧାନ୍ୟ ଦିଆଯାଉ ନଥିଲା । ହେଲେ ଏବେ ଓଡିଶାରେ ଡ଼ବଲ ଇଞ୍ଜିନ୍ ସରକାର ଅଛି। ଓଡ଼ିଶାକୁ ଅଧିକ ଗୁରୁତ୍ୱ ଦେବାର ଥିଲା ବୋଲି କହିଛନ୍ତି ଚାମ୍ବର ସଦସ୍ୟ ।
କଣ କହୁଛନ୍ତି ବରିଷ୍ଠ ସାମ୍ବାଦିକ (ETV Bharat Odisha)
'ଆନ୍ଧ୍ର ଓ ବିହାରକୁ ମିଳିଲା, ଓଡିଶାକୁ ନାହିଁ':-
ଆନ୍ଧ୍ର ପ୍ରଦେଶ ଓ ବିହାରକୁ ମିଳିଛି ସ୍ୱତନ୍ତ୍ର ପ୍ୟାକେଜ । ଏ କ୍ଷେତ୍ରରେ ପୁନର୍ବାର କେନ୍ଦ୍ର ଅଣଦେଖାର ଶିକାର ହୋଇଛି ଓଡିଶା । ଏହାର ପ୍ରଭାବ ଓଡିଶା ଉପରେ ପଡିବ । ଡବଲ ଇଞ୍ଜିନ ସରକାର ଥିବାବେଳେ ଓଡିଶାକୁ ଅବହେଳା ଜନସାଧାରଣଙ୍କ ଉପରେ ପ୍ରଭାବ ପଡିବ । ପର୍ଯ୍ୟଟନ କ୍ଷେତ୍ରରେ ଓଡିଶାରେ ଅପାର ସମ୍ଭାବନା ଥିବାରୁ ସ୍ୱତନ୍ତ୍ର ଅର୍ଥ ସହାୟକ ହେବ ବୋଲି କହିଛନ୍ତି ବରିଷ୍ଠ ସାମ୍ବାଦିକ ପ୍ରଭୁକଲ୍ୟାଣ ମହାପାତ୍ର ।
ମହାପାତ୍ର ଆହୁରି ମଧ୍ୟ କହିଛନ୍ତି, "କେନ୍ଦ୍ରୀୟ ବଜେଟରେ ଓଡିଶା କେତେଦୂର ଲାଭବାନ ହେବ ତାହା ସବୁଠାରୁ ବଡ଼ କଥା । ପରିବର୍ତ୍ତିତ ପରିସ୍ଥିତିରେ ଡବଲ ଇଞ୍ଜିନ ସରକାରର ଓଡିଶାରେ ହୋଇଛି । କେନ୍ଦ୍ର ଓ ରାଜ୍ୟରେ ବିଜେପି ସରକାର ଥିବାରୁ ସ୍ଵାଭାବିକ ଭାବେ ଆଶା ବଢ଼ିଥିଲା । ଓଡିଶା ଆର୍ଥିକ ଦୃଷ୍ଟିରୁ ବିଶେଷ ଭାବେ ବହୁ ମାତ୍ରାରେ ଲାଭବାନ ହେବ ବୋଲି ଆଶା ଥିଲା । କିନ୍ତୁ ଓଡିଶାର ସ୍ୱତନ୍ତ୍ର ରାଜ୍ୟ ମାନ୍ୟତା ଓ ସ୍ୱତନ୍ତ୍ର ପ୍ୟାକେଜ ଦାବିକୁ କେନ୍ଦ୍ର ସରକାର ନାକଚ କରିଛନ୍ତି । ଗତ 50 ବର୍ଷର ଏହି ଦାବି ଥିଲା । ସେହିପରି ନବୀନ ସରକାର ଆସିବାଠାରୁ ଏହି ଦାବି ରହିଛି । ନବୀନ ସରକାର ଲୋକଙ୍କୁ ନେଇ ଦିଲ୍ଲୀରେ ଆନ୍ଦୋଳନ କରି ଚାପ ପକାଇବାକୁ ଚେଷ୍ଟା କରିଥିଲେ । 2014 ନିର୍ବାଚନରେ ବିଜେପି ଇସ୍ତାହାରରେ ଓଡିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ପ୍ରତିଶ୍ରୁତି ରଖିଥିଲା । ବର୍ତ୍ତମାନ ସମୟ ବଦଳି ଯାଇଛି । ଏବେ ରାଜ୍ୟରେ ବିଜେପି ସରକାର । ଅଧିକ ଆର୍ଥିକ ଅନୁଦାନ ଆଶା ଥିଲା । ସ୍ୱତନ୍ତ୍ର ରାଜ୍ୟ ମାନ୍ୟତା ବ୍ୟବସ୍ଥା ନଥିବାରୁ ସ୍ପେଶାଲ ଫୋକ୍ସ ଷ୍ଟେଟ ଓ ସ୍ୱତନ୍ତ୍ର ପ୍ୟାକେଜ ଲାଗି ଆଶା ଥିଲା । କିନ୍ତୁ ଏ ବର୍ଷ ସେ ଆଶା ପୂରଣ ହେଲାନାହିଁ । ଆନ୍ଧ୍ରପ୍ରଦେଶ ଓ ବିହାରକୁ ସ୍ୱତନ୍ତ୍ର ପ୍ୟାକେଜ ଦିଆଯାଇଛି । ଏ କ୍ଷେତ୍ରରେ ଓଡିଶା ବିଫଳ ହୋଇଛି । ଏହାର ପ୍ରତିକୂଳ ପ୍ରଭାବ ଓଡିଶା ଓ ଓଡିଶାବାସୀଙ୍କ ଉପରେ ପଡିବ ।’’
ଏହା ମଧ୍ୟ ପଢନ୍ତୁ :- Union Budget 2024: ପ୍ରଧାନମନ୍ତ୍ରୀ କହିଲେ ସମାଜର ପ୍ରତ୍ୟେକ ବର୍ଗ ସଶକ୍ତ ହେବ, ବିରୋଧୀ କହିଲେ ‘କୁର୍ସି ବଚାଓ ବଜେଟ୍’
ନୂତନତ୍ବ ନାହିଁ, ଚଳନୀୟ ବଜେଟ କହିଲେ ଅର୍ଥନୀତି ବିଶେଷଜ୍ଞ:-
ବଜେଟକୁ ନେଇ ପ୍ରତିକ୍ରିୟା ରଖିଛନ୍ତି ଅର୍ଥନୀତି ବିଶେଷଜ୍ଞ । ରେଭେନ୍ସା ବିଶ୍ବବିଦ୍ୟାଳୟର ଅର୍ଥନୀତି ବିଭାଗୀୟ ମୁଖ୍ୟ ପ୍ର.ଲିପିଶ୍ରୀ ଦାସ କହିଛନ୍ତି, ‘‘ଏହି ବଜେଟରେ କିଛି ନୂତନତ୍ବ ନାହିଁ । ପୁରୁଣା ବଜେଟରେ ଯାହାଥିଲା ସେଥିରେ ଅଳ୍ପ କିଛି ପରିବର୍ତ୍ତନ ହୋଇଛି । ଷ୍ଟାଣ୍ଡର୍ଡ ଦିଡ଼କ୍ସନ ପୂର୍ବରୁ ୫୦ହଜାର ଥିଲା, ମାତ୍ର ଏଥିରେ ଅଳ୍ପ ବୃଦ୍ଧି ପାଇଛି ଯାହାକି ୭୫ ହଜାର ହୋଇଛି । ପୂର୍ବରୁ ୬ଲକ୍ଷ ଟଙ୍କା ବାର୍ଷିକ ଆୟ ଥିବା ବ୍ୟକ୍ତି ଆୟକର ଦେଉନଥିଲେ । ଏବେ ଏହାକୁ ୭ ଲକ୍ଷ ଟଙ୍କା କରାଯାଇଛି । ନିମ୍ନ ମଧ୍ୟବିତ୍ତ ଲୋକ ଏହା ଦ୍ୱାରା ଉପକୃତ ହୋଇଇପାରିବେ । କୃଷକମାନଙ୍କ ପାଇଁ ଏହି ବଜେଟ ବେଶ ସହାୟକ ହେବ ।ଏପରିକି ଚାଷୀମାନଙ୍କୁ କୃଷି ପାଇଁ ଏହା ଉତ୍ସାହିତ କରିବ । ମହିଳାମାନଙ୍କ ପାଇଁ ମଧ୍ୟ ବଜେଟରେ ପ୍ରବଧାନ ରହିଛି । କିଛି ଦିଗ ପ୍ରତି ଏହି ବଜେଟରେ ଧ୍ୟାନ ଦେଇଛନ୍ତି କେନ୍ଦ୍ର ସରକାର । ତାହା ହେଲା ରୋଜଗାର,ସ୍କିଲ ଡେଭଲପମେଣ୍ଟ,MSME ଓ ମହିଳାମାନଙ୍କ ପାଇଁ ମଧ୍ୟ ଏହି ବଜେଟରେ ପ୍ରବଧାନ ରଖାଯାଇଥିବା ବିଶେଷଜ୍ଞ କହିଛନ୍ତି ।
ଇଟିଭି ଭାରତ, ଭୁବନେଶ୍ବର/ କଟକ
