ଅନୁଗୋଳ: ଜଙ୍ଗଲ ଅଧିବାସୀଙ୍କ ଭୋଟ ବର୍ଜନ ଧମକ । ରାସ୍ତାଘାଟ, ଶିକ୍ଷା, ସ୍ବାସ୍ଥ୍ୟ ଭଳି ସବୁ କ୍ଷେତ୍ରରେ ଅବହେଳା ଅଭିଯୋଗ କରିଛନ୍ତି ଅଞ୍ଚଳବାସୀ । ସୂଚନା ଅନୁଯାୟୀ, ଅନୁଗୋଳ ଜିଲ୍ଲାର ସାତକୋଶିଆ ଅଭୟାରଣ୍ୟ ପୁରୁଣାକୋଟ ରେଞ୍ଜ ଅଧୀନରେ ରହିଛି ରାଜସ୍ବ ଗ୍ରାମ ଛୋଟକେଇ । ପୁରୁଣାକୋଟ ଠାରୁ ଘଞ୍ଚ ଜଙ୍ଗଲ ଭିତରେ ପ୍ରାୟ ୭କିମି ଗଲେ ପଡେ ଛୋଟକେଇ ଗାଁ । କାହିଁ କେଉଁ ଆବାହମାନ କାଳରୁ ୨୦୦ରୁ ଅଧିକ ଆଦିବାସୀ ପରିବାର ଏଠାରେ ବସବାସ କରି ଆସୁଛନ୍ତି । ଧାନ, ପନିପରିବା ଓ ଡାଲି ଜାତୀୟ ଫସଲ ଚାଷକରି ନିଜର ପରିବାର ପ୍ରତିପୋଷଣ କରୁଥିବା ବେଳେ କିଛି ବର୍ଷ ହେଲା ବଣୁଆ ହାତୀ ଓ ଅନ୍ୟ ଜଙ୍ଗଲୀ ଜନ୍ତୁଙ୍କ ପ୍ରାଦୁର୍ଭାବ ଯୋଗୁ ଆଉ ଫସଲ ହେଉ ନାହିଁ । ତେଣୁ ଲୋକେ ବହୁ କଷ୍ଟରେ ଜୀବନ ଅତିବାହିତ କରୁଛନ୍ତି ।
ସେହିପରି ବନ ବିଭାଗର କଟକଣା ଯୋଗୁଁ ଗାଁରେ କୌଣସି ଉନ୍ନୟନ ମୂଳକ କାମ ହୋଇ ପାରୁ ନାହିଁ । ତେବେ ଗାଁ ଚାରିପଟେ ସୋଲାର ତାରବାଡ଼ ଲଗାଇ ସେମାନଙ୍କ ଫସଲକୁ ସୁରକ୍ଷା ଯୋଗାଇ ଦେବାକୁ ଗ୍ରାମବାସୀ ଦୀର୍ଘ ବର୍ଷ ହେଲା ଅଭୟାରଣ୍ୟ କର୍ତ୍ତୃପକ୍ଷଙ୍କୁ ଦାବି କରି ଆସୁଛନ୍ତି । ଏପରିକି ବହୁ ବାର ଆନ୍ଦୋଳନ ଓ ବିକ୍ଷୋଭ ପ୍ରଦର୍ଶନ ମଧ୍ୟ କରିଛନ୍ତି । କିନ୍ତୁ ବର୍ତ୍ତମାନ ସୁଦ୍ଧା ତାହା ହୋଇ ପାରି ନାହିଁ । ଲୋକେ ଅଭିଯୋଗ କରିଛନ୍ତି ଯେ ଯେଉଁ ଗାଁରେ ଆଦୌ ଫସଲ ହେଉ ନାହିଁ ସେଭଳି ଗାଁ ଚାରିପଟେ ସୋଲାର ତାରବାଡ଼ ଲଗା ଯାଇଛି । କିନ୍ତୁ ଛୋଟକେଇ ଭଳି ଚାଷବାସ ହେଉଥିବା ଗାଁ ପ୍ରତି ବନ ବିଭାଗ ଅବହେଳା କରି ଆସୁଛି । ଚାଷବାସ ହେଉ ନଥିବାରୁ ଲୋକଙ୍କ ବଞ୍ଚିବା କଷ୍ଟକର ହୋଇ ତଥାପି ବନ ବିଭାଗର ଚେତା ପଶୁନି । ଆଗକୁ ଏହାର ପ୍ରତିବାଦ ସ୍ବରୂପ ଭୋଟ ବର୍ଜନ କରିବାକୁ ବାଧ୍ୟ ହେବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।